સરકારના નવા નિયમ મુજબ, ફોન નંબર આધારિત તમામ OTT મેસેજિંગ એપ્લિકેશનોના એકાઉન્ટ્સ સક્રિય સિમ કાર્ડ સાથે જોડાયેલા હોવા ફરજિયાત રહેશે. એટલે કે, જે નંબરથી એપ રજિસ્ટર છે, તે જ સિમ ફોનમાં હાજર અને એક્ટિવ હોવો જોઈએ. આ નિયમ ખાસ કરીને WhatsApp અને Telegram જેવી લોકપ્રિય એપ્સને અસર કરશે, પરંતુ તે ફક્ત અહીં પૂરતો મર્યાદિત નથી. અન્ય મેસેજિંગ એપ્સ પણ આ દાયરામાં આવશે.
સરકારનો નિર્ણય કેમ?
સરકારનું માનવું છે કે વધતી ડિજિટલ છેતરપિંડી, નકલી કોલ સેન્ટરો અને ફેક પ્રોફાઇલ્સને રોકવા માટે સિમ-બાઈન્ડિંગ જરૂરી છે. ટેલિકોમ્યુનિકેશન વિભાગ એટલે કે Department of Telecommunications (DoT) એ સ્પષ્ટ રીતે OTT પ્લેટફોર્મ્સને આ નિયમોનું પાલન કરવા જણાવ્યું છે. કેન્દ્રીય મંત્રી Jyotiraditya Scindiaના નિવેદન અનુસાર, “સુરક્ષા સૌથી પહેલા છે” અને આ નિયમોમાં કોઈ ઢીલ નથી અપાશે.
WhatsApp યુઝર્સને શું અસર પડશે?
- નવા નિયમો બાદ
- જો WhatsApp જે નંબરથી રજિસ્ટર છે તે સિમ ફોનમાં ન હોય, તો એપ મર્યાદિત કે બંધ થઈ શકે છે.
- એક જ નંબરથી અનેક ઉપકરણો પર WhatsApp ચલાવતા યુઝર્સને મુશ્કેલી પડી શકે છે.
- WhatsApp વેબ અથવા લિંક્ડ ડિવાઇસ વધુ વખત લોગઆઉટ થઈ શકે છે.
- QR કોડ વારંવાર સ્કેન કરવો પડશે.
- હાલમાં WhatsApp લિંક્ડ ડિવાઇસ 14 દિવસ સુધી સક્રિય રહે છે, પરંતુ નિયમ લાગુ થયા પછી વારંવાર સિમ ચકાસણી થશે, જેના કારણે ઉપયોગમાં વિક્ષેપ આવી શકે છે.
નાના વ્યવસાયો પર અસર
અહેવાલો મુજબ, 60–80% નાના વ્યવસાયો જે ગ્રાહકો સાથે WhatsApp દ્વારા સંવાદ કરે છે, તેમની દૈનિક કામગીરીમાં ખલેલ પડી શકે છે. ખાસ કરીને જે લોકો એક જ એકાઉન્ટને અનેક ડિવાઇસ પર ચલાવે છે.
શું ડિજિટલ છેતરપિંડી ઘટશે?
સરકારનું માનવું છે કે દરેક મેસેજિંગ એકાઉન્ટ સક્રિય અને અસલી સિમ સાથે જોડાયેલ હશે તો ગુનેગારોને ઓળખવું સરળ બનશે. તપાસ એજન્સીઓ માટે આ પગલું મહત્વપૂર્ણ સાબિત થઈ શકે છે.
ટેક કંપનીઓની ચિંતા
કેટલીક આંતરરાષ્ટ્રીય ટેક કંપનીઓએ આ નિયમને લઈને ગોપનીયતા અને કાનૂની સીમાઓ અંગે પ્રશ્ન ઉઠાવ્યા છે. તેમ છતાં, સરકાર હાલમાં નિયમો પાછા ખેંચવાના કોઈ સંકેત આપતી નથી.
આગળ શું?
1 માર્ચની સમયમર્યાદા નજીક છે. સામાન્ય યુઝર્સ માટે હજી કોઈ અલગ જાહેર સૂચના નથી, પરંતુ નિયમો લાગુ થયા બાદ WhatsApp, Telegram અને અન્ય મેસેજિંગ એપ્સનો ઉપયોગ સક્રિય સિમ વિના મુશ્કેલ બની શકે છે.
આ પણ વાંચો : India economic reforms : મનમોહન સિંહના સુધારાઓએ બદલી નાખ્યો ભારતનો આર્થિક નકશો: એન્જેલા મર્કેલ
