શું લગ્ન પહેલાં સંમતિથી બનેલા પ્રેમ સંબંધો ખરાબ કેરેક્ટરનો આધાર હોય છે... ભારતમાં જો કોઈ છોકરા કે છોકરીના લગ્ન પહેલાં કોઈની સાથે શારીરિક સંબંધો બને છે, તો ઘણા લોકો તેને કેરેક્ટર લેસ સુધી કહી દે છે. જો કે, સુપ્રીમ કોર્ટનું કહેવું છે કે લગ્ન પહેલાં સંમતિથી બનેલા 'શારીરિક સંબંધો' કોઈના કેરેક્ટર પર કાળો ધબ્બો હોઈ શકે નહીં. આ રિલેશન ખરાબ નૈતિક ચારિત્ર્યનું સર્ટિફિકેટ માની શકાય નહીં. જસ્ટિસ મનોજ મિશ્રા અને જસ્ટિસ મનમોહનની પીઠે તેલંગાણા પોલીસ કોન્સ્ટેબલ ભરતી સાથે જોડાયેલા એક મામલામાં ઉમેદવાર ગજુલા તિરુપતિના પક્ષમાં ચુકાદો આપતા આ મોટું નિવેદન આપ્યું છે.
શું છે સમગ્ર મામલો
કેસ અનુસાર, ઉમેદવારની પસંદગી પોલીસ કોન્સ્ટેબલ પદ માટે થઈ હતી, પરંતુ બાદમાં તેની ઉમેદવારી રદ કરવામાં આવી હતી. સિલેક્શન બોર્ડે શોધી કાઢ્યું હતું કે તે પહેલા એક ક્રિમિનલ કેસમાં આરોપી રહી ચૂક્યો છે. આરોપ હતો કે તેણે પોતાની પડોશમાં રહેતી એક છોકરી સાથે લગ્નનું વચન આપીને ઘણા વર્ષો સુધી સંબંધો રાખ્યા, પરંતુ બાદમાં કોઈ બીજી છોકરી સાથે લગ્ન કરી લીધા. આ મામલો વર્ષ 2015માં લોક અદાલતમાં સમાધાનના માધ્યમથી સમાપ્ત થઈ ગયો હતો.
સુપ્રીમ કોર્ટનો ભરતી બોર્ડની માનસિકતા પર સવાલ
ઉમેદવારે ભરતી પ્રક્રિયા દરમિયાન આ ગુનાહિત મામલાની માહિતી પોતે પોતાના વેરિફિકેશન ફોર્મમાં આપી હતી. તેના પર કોઈ તથ્ય છુપાવવાનો આરોપ નહોતો. તેમ છતાં ભરતી બોર્ડે તેને 'નૈતિક અધોગતિ' સાથે જોડાયેલા ગુનામાં સામેલ માનીને પોલીસ સેવા માટે અયોગ્ય જાહેર કરી દીધો. સુપ્રીમ કોર્ટે કહ્યું કે એમ્પ્લોયર (નિયોક્તા) કોઈ ઉમેદવારની યોગ્યતાનું મૂલ્યાંકન કરી શકે છે, પરંતુ તેમનો નિર્ણય મનસ્વી ન હોવો જોઈએ. અદાલતે જોયું કે આ મામલામાં ભરતી બોર્ડે એવું માની લીધું હતું કે લોક અદાલતમાં થયેલું સમાધાન ગુનો સ્વીકારવા બરાબર છે, જ્યારે આના સમર્થનમાં કોઈ આધાર નહોતો.
એવો કોઈ કાયદો નથી જે...
સુપ્રીમ કોર્ટે કહ્યું કે આજના માહોલમાં લગ્ન પહેલાં શારીરિક સંબંધો સામાન્ય બાબત છે. માત્ર આ આધાર પર કોઈ વ્યક્તિના કેરેક્ટર પર નેગેટિવ કોમેન્ટ કરી શકાય નહીં. પીઠે કહ્યું કે આજના સમયમાં આવા લગ્ન પહેલાંના સંબંધો સામાન્ય છે. બે અપરિણિત પુખ્ત વયના લોકો વચ્ચે પરસ્પર સંમતિથી બનેલા શારીરિક સંબંધો કોઈ વ્યક્તિના ચારિત્ર્ય વિશે ધારણા બનાવવાનો આધાર ન હોવો જોઈએ. એવો કોઈ કાયદો નથી જે બે સંમત અપરિણિત પુખ્ત વયના લોકોને પોતાની પસંદગીના સંબંધો રાખતા અટકાવતો હોય.
સંબંધો બનાવ્યા પછી લગ્નનો ઇનકાર એ દગો નથી
અદાલતે કહ્યું કે દરેક પ્રેમ સંબંધ લગ્ન સુધી નથી પહોંચતો. માત્ર એટલા માટે કે સંબંધનો અંત લગ્નમાં ન થયો, એવું માની શકાય નહીં કે એક પક્ષે બીજા પક્ષ સાથે દગો કર્યો છે. અંતમાં સુપ્રીમ કોર્ટે ભરતી બોર્ડની સ્ક્રીનિંગ કમિટીના નિર્ણયને મનસ્વી ગણાવતા ઉમેદવારના પક્ષમાં ચુકાદો આપ્યો, તેલંગાણા હાઈકોર્ટની સિંગલ બેન્ચના આદેશને પુનઃસ્થાપિત કર્યો અને તેની નિમણૂક પર પુનર્વિચાર કરવાનો નિર્દેશ આપ્યો.
આ પણ વાંચો-Flop movie : 900 કરોડની બ્લોકબસ્ટર ફિલ્મનો વિલન, આજે 1 કરોડની કમાણી માટે પણ ફાંફા મારી રહ્યો છે!
