તેલંગાણાના ખમ્મમ જિલ્લામાંથી એક અત્યંત દુઃખદ અને ગંભીર દુર્ઘટના સામે આવી છે. સથુપલ્લી મંડલ સ્થિત બેથુપલ્લી તળાવમાં ફસાયેલા માછીમારોને સલામત બહાર કાઢવાના રેસ્ક્યૂ ઓપરેશન દરમિયાન સ્ટેટ ડિઝાસ્ટર રિસ્પોન્સ ફોર્સ (SDRF)ની બે બોટ અચાનક પલટી ગઈ હતી. આ અકસ્માતને કારણે SDRFના 10 કોન્સ્ટેબલ તળાવના ઊંડા પાણીમાં ગુમ થઈ ગયા છે. ઘટનાને પગલે સમગ્ર વિસ્તારમાં ભારે તણાવ અને ચિંતાનો માહોલ વ્યાપી ગયો છે.

5 માછીમારોને બચાવવા ગયેલા SDRFની બોટ પલટી

મળતી માહિતી મુજબ, બેથુપલ્લી તળાવમાં પાંચ માછીમારો ફસાયા હોવાના સમાચાર મળતાં SDRFની ટીમ તાત્કાલિક રાહત અને બચાવ કામગીરી માટે રવાના થઈ હતી. બોટ તળાવના મધ્ય ભાગમાં પહોંચી ત્યારે અચાનક હવામાન બગડ્યું હતું. અતિ ભારે પવન અને પાણીના તીવ્ર પ્રવાહના કારણે બોટ પરનું સંતુલન ખોવાઈ ગયું હતું અને જોતજોતામાં SDRFની બંને બોટ પલટી મારી ગઈ હતી. બોટમાં સવાર 10 કોન્સ્ટેબલ પાણીમાં ગરકાવ થઈ ગયા હતા.

કોન્સ્ટેબલોને શોધવા માટે સર્ચ ઓપરેશન

ઘટનાની જાણ થતાં જ વરિષ્ઠ પોલીસ અધિકારીઓ અને વહીવટી તંત્ર ઘટનાસ્થળે દોડી ગયું હતું. હાલમાં અનુભવી ડાઇવર્સ (ડૂબકીમારો) અને બચાવ કાર્યકરો દ્વારા ગુમ થયેલા 10 કોન્સ્ટેબલોને શોધવા માટે વ્યાપક સર્ચ ઓપરેશન ચલાવવામાં આવી રહ્યું છે. ઊંડા પાણી અને ખરાબ હવામાન વચ્ચે પણ રાહત બચાવ ટુકડીઓ સતત પ્રયત્નશીલ છે.
https://x.com/ANI/status/2118015405692444885?ref_src=twsrc%5Etfw%7Ctwcamp%5Etweetembed%7Ctwterm%5E2118015405692444885%7Ctwgr%5E%7Ctwcon%5Es1_c10&ref_url=

મુખ્યમંત્રી રેવંત રેડ્ડીએ ઉંડી દુઃખની લાગણી વ્યક્ત કરી

તેલંગાણાના મુખ્યમંત્રી રેવંત રેડ્ડીએ આ દુર્ઘટના અંગે ઊંડા દુઃખની લાગણી વ્યક્ત કરી છે અને સ્થિતિની ગંભીરતાને ધ્યાનમાં રાખીને વહીવટી તંત્રને તાત્કાલિક પગલાં લેવા નિર્દેશ આપ્યા છે. તેમણે ખમ્મમ જિલ્લા કલેક્ટરને સૂચના આપી છે કે SDRFના ગુમ થયેલા જવાનોને સુરક્ષિત બહાર કાઢવા માટે તમામ જરૂરી સંસાધનો અને બચાવ સામગ્રીનો ઉપયોગ કરવામાં આવે. આ ઉપરાંત મુખ્યમંત્રીએ મુખ્ય સચિવને સમગ્ર પરિસ્થિતિ પર સમયાંતરે નજર રાખવા અને અપડેટ લેવા જણાવ્યુ છે.
https://x.com/GUMMALLALAKSHM3/status/2118026388049670382?ref_src=twsrc%5Etfw%7Ctwcamp%5Etweetembed%7Ctwterm%5E2118026388049670382%7Ctwgr%5E%7Ctwcon%5Es1_c10&ref_url=

ગુમ થયેલા જવાનોની શોધખોળ શરૂ

રાજ્યના મહેસૂલ, ગૃહનિર્માણ અને માહિતી મંત્રી પોંગુલેટી શ્રીનિવાસ રેડ્ડીએ પણ ઘટના અંગે ચિંતા વ્યક્ત કરતાં જણાવ્યું હતું કે સરકાર માટે ગુમ થયેલા જવાનોની સુરક્ષા સૌથી પહેલી પ્રાથમિકતા છે. તેમણે અધિકારીઓને સંકલન સાધીને કામ કરવા અને રાહત પ્રયાસો ઝડપી બનાવવાની સૂચના આપી છે. મંત્રીએ ઉમેર્યું હતું કે તેઓ પરિસ્થિતિની સતત સમીક્ષા કરી રહ્યા છે અને સ્થળ પર પહોંચીને બચાવ કાર્યનું નિરીક્ષણ કરશે.

આ પણ વાંચોઃ November 5 News: PM મોદીની નીતિ આયોગ સાથે બેઠક, અમદાવાદમાં 3 નવા પોલીસ સ્ટેશનનું લોકાર્પણ