કોલકાતાથી મુંબઈ જતી એર ઇન્ડિયાની ફ્લાઇટમાં બુધવારે સવારે હાઇજેકની ધમકી મળતાં એરપોર્ટ પર અફરાતફરીનો માહોલ સર્જાયો હતો. વિમાન ઉડાન ભરવાની તૈયારીમાં હતું ત્યારે તેના વોશરૂમમાંથી ધમકીભરી ચિઠ્ઠી મળી આવી હતી. સુરક્ષા એજન્સીઓએ તાત્કાલિક કાર્યવાહી કરીને વિમાનને આઇસોલેશન બેમાં ખસેડ્યું અને તમામ 105 મુસાફરોને નીચે ઉતાર્યા હતા. જોકે, જરૂરી સુરક્ષા તપાસ અને પ્રોટોકોલની કાર્યવાહી બાદ ધમકી ખોટી હોવાનું સામે આવ્યું હતું. ત્યારબાદ ફ્લાઇટ સાંજે 5:38 વાગ્યે મુંબઈ માટે રવાના થઈ હતી.
વોશરૂમમાંથી મળી હાઇજેકની ધમકી આપતી ચિઠ્ઠી
આ ઘટના કોલકાતાના નેતાજી સુભાષ ચંદ્ર બોઝ આંતરરાષ્ટ્રીય એરપોર્ટ પર બની હતી. એર ઇન્ડિયાની ફ્લાઇટ AI 2772 બુધવારે સવારે લગભગ 10:30 વાગ્યે મુંબઈ માટે ઉડાન ભરવાની હતી. ઉડાન પહેલાં સવારે 10:37 વાગ્યે વિમાનના કેબિન ક્રૂને વોશરૂમમાં એક ચિઠ્ઠી મળી હતી. તેમાં વિમાનનું સવારે 11:10 વાગ્યે અપહરણ કરવામાં આવશે તેવી ધમકી આપવામાં આવી હતી. આ માહિતી મળતાં જ એરપોર્ટના અધિકારીઓ અને સુરક્ષા એજન્સીઓ સતર્ક થઈ ગઈ હતી.
105 મુસાફરોને વિમાનમાંથી ઉતાર્યા
ધમકી મળ્યા બાદ સુરક્ષા અધિકારીઓએ વિમાનને સામાન્ય પાર્કિંગ વિસ્તારમાંથી હટાવીને આઇસોલેશન બેમાં લઈ જવાનો નિર્ણય કર્યો હતો. આ દરમિયાન વિમાનમાં સવાર તમામ 105 મુસાફરોને સુરક્ષિત રીતે નીચે ઉતારવામાં આવ્યા હતા. ત્યારબાદ વિમાનની જરૂરી સુરક્ષા તપાસ શરૂ કરવામાં આવી હતી. નિયમો અને નિર્ધારિત પ્રોટોકોલ મુજબ તપાસ કરવામાં આવી, જેથી કોઈ શંકાસ્પદ વસ્તુ કે જોખમ ન રહે.
તપાસ બાદ ધમકી ખોટી સાબિત થઈ
કોલકાતા એરપોર્ટના ડિરેક્ટર વિક્રમ સિંહે જણાવ્યું હતું કે ધમકીભરી ચિઠ્ઠી મળ્યા બાદ જરૂરી તપાસ કરવામાં આવી હતી. તપાસ પૂર્ણ થયા પછી ધમકી ખોટી હોવાનું સામે આવ્યું હતું. સુરક્ષા તપાસ અને અન્ય જરૂરી પ્રક્રિયાઓ પૂરી થયા બાદ ફ્લાઇટ AI 2772 સાંજે 5:38 વાગ્યે મુંબઈ માટે રવાના થઈ હતી. આમ, સવારે 10:30 વાગ્યે નિર્ધારિત ઉડાનમાં લગભગ સાત કલાકનો વિલંબ થયો હતો.
એર ઇન્ડિયાનું સત્તાવાર નિવેદન બાકી
આ ઘટનાને પગલે એરપોર્ટ પર સુરક્ષા વ્યવસ્થા વધુ કડક કરવામાં આવી હતી. જોકે, તપાસમાં ધમકી ખોટી હોવાનું સામે આવતાં મુસાફરો અને તેમના પરિવારજનોએ રાહતનો શ્વાસ લીધો હતો. આ મામલે એર ઇન્ડિયા તરફથી હજુ સુધી સત્તાવાર નિવેદન જાહેર કરવામાં આવ્યું નથી. ધમકીભરી ચિઠ્ઠી કોણે મૂકી હતી અને તેની પાછળ કોનો હાથ હતો તે અંગેની વધુ વિગતો પણ સામે આવી નથી.
આ પણ વાંચો: Strait of Hormuz: ઓઇલ ટેન્કર પર હુમલો! જહાજમાં સવાર 3 ભારતીય નાવિકો સુરક્ષિત
