કેન્દ્રીય શિક્ષણ મંત્રી ધર્મેન્દ્ર પ્રધાનની ફોલો-અપ બેઠક બાદ નેશનલ ટેસ્ટિંગ એજન્સી (NTA)એ પરીક્ષા વ્યવસ્થાને વધુ સુરક્ષિત અને પારદર્શક બનાવવા માટે મોટા ફેરફારોની જાહેરાત કરી છે. બેઠકમાં પરીક્ષાઓ સરળતાથી યોજાય અને સુરક્ષા તથા મૂળભૂત સુવિધાઓ વધુ મજબૂત બને તે માટે જરૂરી પગલાં લેવા સૂચના આપવામાં આવી હતી.
NTAના ડાયરેક્ટર જનરલે બેઠક દરમિયાન એજન્સી દ્વારા કરવામાં આવેલી કામગીરી અંગે માહિતી આપી હતી. તેમણે જણાવ્યું કે પરીક્ષા ટીમમાં મોટો ફેરફાર કરવામાં આવ્યો છે. આ અંતર્ગત આશરે 600 નિષ્ણાતોને હટાવી નવા નિષ્ણાતોને ટીમમાં સામેલ કરવામાં આવી રહ્યા છે.
પ્રશ્નપત્રની તપાસ પ્રક્રિયાને વધુ મજબૂત બનાવવા માટે હવે ચાર સ્તરીય પ્રશ્નપત્ર ચકાસણી સિસ્ટમ લાગુ કરવામાં આવશે. આ વ્યવસ્થાનો હેતુ પ્રશ્નપત્રમાં કોઈપણ પ્રકારની ભૂલ કે ખામીની શક્યતા ઘટાડવાનો છે. આગામી બે-ત્રણ સપ્તાહમાં 20થી 25 નવા અધિકારીઓને પણ NTAમાં સામેલ કરવામાં આવશે. ત્યારબાદ વધુ અધિકારીઓની ભરતી અંગે પણ સમીક્ષા કરવામાં આવશે.
NTAના ડાયરેક્ટર જનરલે વધુમાં જણાવ્યું કે NTAની ઓફિસોને ટૂંક સમયમાં નવી જગ્યાએ ખસેડવામાં આવશે. નવી ઓફિસમાં CISFની ટીમ દ્વારા સુરક્ષા વ્યવસ્થાને વધુ મજબૂત બનાવવામાં આવશે. આ સુધારા એવા સમયે કરવામાં આવી રહ્યા છે, જ્યારે NTAની પરીક્ષાઓની નિષ્પક્ષતા, પારદર્શિતા અને સુરક્ષાને લઈને સતત સવાલો ઉઠી રહ્યા છે. NTA JEE Main, NEET UG, CUET UG અને UGC-NET જેવી દેશની મહત્વપૂર્ણ પ્રવેશ અને પાત્રતા પરીક્ષાઓનું આયોજન કરે છે.
આ પહેલા શિક્ષણ મંત્રાલયે 17 ઓગસ્ટે જણાવ્યું હતું કે NTAએ 50થી વધુ કર્મચારીઓને હટાવ્યા છે અને 10 મહત્વપૂર્ણ પ્રોફેશનલ લીડરશિપ પદો પર ભરતી શરૂ કરી છે. તેમાં CTO, CFO, CISO, ટેસ્ટ સિક્યોરિટી માટે જનરલ મેનેજર તથા R&D અને સાયકૉમેટ્રિક્સ માટે જનરલ મેનેજર જેવા હોદ્દાઓનો સમાવેશ થાય છે.