ઉત્તર પ્રદેશમાં વર્ષ 2027માં યોજાનારી વિધાનસભા ચૂંટણી પૂર્વે એનડીએ ગઠબંધનના સહયોગી પક્ષો વચ્ચે બેઠકોની વહેંચણી બાબતે તણાવ શરૂ થઈ ગયો છે. સુહેલદેવ ભારતીય સમાજ પાર્ટીના વડા ઓમપ્રકાશ રાજભર અને નિષાદ પાર્ટીના અધ્યક્ષ ડૉ. સંજય નિષાદ વચ્ચે આઝમગઢ જિલ્લાની અતરૌલિયા વિધાનસભા સહિત ચાર બેઠકો પર દાવેદારી કરવાના મામલે ભારે ખેંચતાણ જોવા મળી રહી છે. નિષાદ પાર્ટીના અધ્યક્ષ ડૉ. સંજય નિષાદે આઝમગઢ વિસ્તારની અતરૌલિયા સહિત કુલ ચાર વિધાનસભા બેઠકો પર પોતાની દાવેદારી રજૂ કરી છે. તેમણે આ બેઠક ઉપર ઓમપ્રકાશ રાજભર દ્વારા કરવામાં આવેલા એકતરફી દાવા સામે આકરા સવાલો ઉઠાવ્યા છે. 

આવી એકપક્ષીય જાહેરાત માન્ય ગણી શકાય નહીં

સંજય નિષાદે સ્પષ્ટ દલીલ કરી છે કે એનડીએ ગઠબંધનમાં બેઠકોની વહેંચણી અંગે હજુ સુધી કોઈ અંતિમ નિર્ણય લેવાયો નથી. તેથી સાથી પક્ષો સાથે ઔપચારિક ચર્ચા કે સંમતિ વિના કોઈ એક પક્ષ દ્વારા આવી એકપક્ષીય જાહેરાત માન્ય ગણી શકાય નહીં. નિષાદ પાર્ટીના જણાવ્યા અનુસાર, વર્ષ 2022ની વિધાનસભા ચૂંટણીમાં પણ તેમની પાર્ટીએ આ બેઠક પરથી ચૂંટણી લડી હતી, જેના કારણે આ બેઠક પર તેમનો દાવો સંપૂર્ણપણે વ્યાજબી ઠરે છે. આ કારણોસર તેમણે પાર્ટીના રાષ્ટ્રીય મહાસચિવ પ્રશાંત સિંહને અતરૌલિયા બેઠક પરથી સંભવિત ઉમેદવાર તરીકે આગળ કર્યા છે. આ સાથે જ કાર્યકરોને ચૂંટણી તૈયારીઓ શરૂ કરવા આદેશ આપીને આ સમગ્ર મામલો ભાજપના મોવડીમંડળ સમક્ષ પણ રજૂ કર્યો છે. બીજી તરફ, એસબીએસપી પ્રમુખ ઓમપ્રકાશ રાજભર પણ અતરૌલિયા બેઠક પરથી પીછેહઠ કરવા તૈયાર નથી અને પોતાના પુત્ર અરુણ રાજભરને ચૂંટણી મેદાનમાં ઉતારવા સક્રિય તૈયારી કરી રહ્યા છે. 

ગઠબંધનમાં બેઠકોની વહેંચણી અંગેનો આખરી નિર્ણય

રાજભરે સ્પષ્ટ શબ્દોમાં જણાવ્યું છે કે તેમનો પક્ષ આ મહત્વની બેઠક પરના પોતાના દાવા પર અડગ રહેશે અને કોઈપણ સંજોગોમાં પાછળ હટશે નહીં.જોકે, તેમણે એ બાબતનો પણ ઉલ્લેખ કર્યો હતો કે ગઠબંધનમાં બેઠકોની વહેંચણી અંગેનો આખરી નિર્ણય તમામ સાથી પક્ષો પરસ્પર સંવાદ સાધીને સાથે મળીને કરશે. આમ, એક જ બેઠક માટે એનડીએના બે અગ્રણી સાથી પક્ષો આમને-સામને આવી જતાં ગઠબંધનમાં આંતરિક ખેંચતાણ ખુલ્લી પડી છે. ભાજપ અને તેના સહયોગી પક્ષો વચ્ચે હજુ સુધી બેઠક વહેંચણીની પ્રક્રિયા ઔપચારિક રીતે પૂર્ણ થઈ નથી, ત્યારે બંને પક્ષો દ્વારા કરાયેલા સામસામા દાવાઓએ ગઠબંધન સામે મોટો રાજકીય પેચ ઊભો કર્યો છે. ઉલ્લેખનીય છે કે અતરૌલિયા વિધાનસભા મતવિસ્તાર પર સમાજવાદી પાર્ટીનો મજબૂત રાજકીય પ્રભાવ રહેલો છે અને ત્યાંથી સપાના ડૉ. સંગ્રામ યાદવ ધારાસભ્ય તરીકે પ્રતિનિધિત્વ કરી રહ્યા છે. જેથી આ બેઠક જીતવા માટે એનડીએના પક્ષો વચ્ચે પરસ્પર સંકલન અનિવાર્ય માનવામાં આવે છે.

આ પણ વાંચોઃ Rajasthan: પંચાયતની ચૂંટણીમાં ધારાસભ્યના PAની પત્ની હારી જતાં ગામોમાંથી સ્ટ્રીટ લાઇટો હટાવી દીધી