ઉત્તર પ્રદેશના મુખ્યમંત્રી યોગી આદિત્યનાથની અધ્યક્ષતામાં આજે એક અત્યંત મહત્ત્વપૂર્ણ કેબિનેટ બેઠક યોજાઈ, કેબિનેટ બેઠકમાં 29માંથી 27 પ્રસ્તાવોને મંજૂરી આપવામાં આવી છે. આ બેઠકમાં સૌથી ચર્ચિત મુદ્દો શાહજહાંપુરના 'જલાલાબાદ' શહેરનું નામ બદલીને 'પરશુરામપુરી' કરવાનો છે. લાંબા સમયથી ચાલી રહેલી આ માંગણીને હવે કેબિનેટની મંજૂરી મળી છે.
'ઉત્તર પ્રદેશ સ્ટાર્ટઅપ નીતિ 2026'નું લોન્ચિંગ
રાજ્ય સરકારના આર્થિક વિકાસના એજન્ડામાં આજે 'ઉત્તર પ્રદેશ સ્ટાર્ટઅપ નીતિ 2026'નું લોન્ચિંગ એક મુખ્ય આકર્ષણ છે. આગામી પાંચ વર્ષ માટે અમલમાં આવનારી આ નીતિનો મુખ્ય ઉદ્દેશ્ય ઉત્તર પ્રદેશને દેશના અગ્રણી સ્ટાર્ટઅપ હબ તરીકે પ્રસ્થાપિત કરવાનો છે. આ નીતિ હેઠળ યુવા ઉદ્યોગસાહસિકોને પ્રોત્સાહન આપવામાં આવશે, જેથી રાજ્યમાં નવા રોકાણો આવે અને મોટા પાયે રોજગારીની તકો ઊભી થાય. ખાસ કરીને હાઇ-ટેક અને ડીપ-ટેક ક્ષેત્રોમાં કાર્યરત સ્ટાર્ટઅપ્સને વ્યાપક નાણાકીય સહાય અને માળખાગત સુવિધાઓ પૂરી પાડવાની જોગવાઈ આ નીતિમાં કરવામાં આવી છે.
સુવિધાઓના ભાગરૂપે લેવાશે અનેક મહત્વના નિર્ણયો
શહેરી માળખાગત સુવિધાઓને મજબૂત કરવાના ભાગરૂપે, ગોરખપુર અને મુરાદાબાદ મ્યુનિસિપલ કોર્પોરેશનો માટે પણ મહત્ત્વના નિર્ણયો લેવામાં આવશે. આ બંને શહેરોને મ્યુનિસિપલ બોન્ડ જાહેર કરવાની મંજૂરી આપવામાં આવશે, જેનાથી શહેરના વિકાસ કાર્યો માટે ભંડોળ એકત્ર કરવામાં સરળતા રહેશે.
સુરક્ષા અને સ્વાસ્થ્ય માટે એક મોટી ભેટ
આ ઉપરાંત, કેબિનેટમાં માનવીય અભિગમ સાથે જોડાયેલ એક મોટો નિર્ણય લેવાઈ શકે છે. રાજ્યના અંદાજે 1.60 લાખ હોમગાર્ડ સ્વયંસેવકો અને તેમના આશ્રિતોને હવે કેશલેસ સારવારની સુવિધા આપવાનો નિર્ણય લેવાયો છે. હાલમાં રાજ્યમાં 1.18 લાખ હોમગાર્ડ્સ કાર્યરત છે, જ્યારે 41,000 નવા હોમગાર્ડ્સની ભરતી પ્રક્રિયા પૂર્ણ થઈ ચૂકી છે. આ તમામ જવાનોને હવે સરકારી કે ખાનગી હોસ્પિટલોમાં કેશલેસ સારવારનો લાભ મળશે, જે તેમની સુરક્ષા અને સ્વાસ્થ્ય માટે એક મોટી ભેટ ગણાશે.
યુપીમાં આવશે મોટું પરિવર્તન
આ બેઠકમાં લેવાયેલા નિર્ણયો ઉત્તર પ્રદેશના બદલાતા ચિત્રને દર્શાવે છે. જ્યાં એક તરફ સાંસ્કૃતિક ઓળખ જાળવવા માટે નામ બદલવાની પ્રક્રિયા ચાલી રહી છે, ત્યાં બીજી તરફ સ્ટાર્ટઅપ નીતિ અને હોમગાર્ડ્સના કલ્યાણ દ્વારા રાજ્યને આધુનિક અને સુરક્ષિત બનાવવાની દિશામાં સરકાર કામ કરી રહી છે. આ બેઠકના પરિણામો રાજ્યના આવનારા સમયમાં રોજગાર અને માળખાગત વિકાસમાં મોટું પરિવર્તન લાવી શકે છે.
આ પણ વાંચોઃ Iran: ખામેનેઇના અંતિમ સંસ્કારમાં આ 13 દેશોએ બનાવી દૂરી, જાણો કેમ?
