ઉત્તરાખંડના પૂર્વ મુખ્યમંત્રી અને વરિષ્ઠ કોંગ્રેસ નેતા હરીશ રાવતે 78 વર્ષની વયે પાર્ટી હાઇકમાન્ડના આદેશો વિરુદ્ધ જઈને એકલા હાથે "આભાર અને જનસંવાદ યાત્રા" શરૂ કરીને રાજ્યના રાજકારણમાં મોટો ભૂકંપ સર્જ્યો છે. કોંગ્રેસના સત્તાવાર કાર્યક્રમો અને સંગઠનને બાયપાસ કરીને પોતાની આક્રમક યાત્રા ચાલુ રાખતા એવા સવાલો ઉભા થયા છે કે શું હરીશ રાવત પક્ષ સામે બળવો કરી રહ્યા છે કે પછી પક્ષની અંદર પોતાની સોદાબાજી શક્તિ (Bargaining Power) મજબૂત કરવાનો પ્રયાસ કરી રહ્યા છે?

કે.સી. વેણુગોપાલે યાત્રા રોકવા વિનંતી કરી

આંતરિક વિવાદ એટલો વધી ગયો છે કે ઉત્તરાખંડ કોંગ્રેસના પ્રભારી કુમારી શેલજાએ ઔપચારિક પત્ર લખીને અને સંગઠન મહાસચિવ કે.સી. વેણુગોપાલે પણ હરીશ રાવત સાથે ચર્ચા કરીને આ યાત્રા રોકવા વિનંતી કરી હતી. પાર્ટી નેતૃત્વનું માનવું છે કે વિધાનસભા ચૂંટણી પહેલા રાજ્યમાં સંગઠનની એકતા દર્શાવવી અનિવાર્ય છે, અને પ્રદેશ નેતૃત્વની સલાહ વગર ચાલતી આવી સમાંતર યાત્રાઓથી જનતામાં ખોટો સંદેશ જાય છે. તેમ છતાં, રાવતે સ્પષ્ટ શબ્દોમાં જણાવી દીધું છે કે યાત્રાના આ તબક્કાને કોઈ રોકી શકે તેમ નથી અને તેઓ હરિદ્વારથી શરૂ કરીને હલ્દવાની, રામનગર અને કાશીપુર જેવા કુમાઉ વિસ્તારોમાં પોતાના કાર્યક્રમો અવિરત ચાલુ રાખી રહ્યા છે.

કોંગ્રેસ છોડી અન્ય પાર્ટીમાં જવું શક્ય નથી

રાજકીય વિશ્લેષકોનું માનવું છે કે 78 વર્ષની ઉંમરે હરીશ રાવત માટે કોંગ્રેસ છોડીને કોઈ અન્ય પક્ષમાં જવું કે નવી પાર્ટી બનાવવી વ્યવહારીક રીતે શક્ય નથી. આ પગલાને બળવા કરતા પાર્ટીમાં પોતાની સુસંગતતા, પાયાની પક્ડ અને પ્રભાવ જાળવી રાખવાના પ્રયાસ તરીકે જોવામાં આવી રહ્યો છે. ઉત્તરાખંડ કોંગ્રેસ લાંબા સમયથી પ્રીતમ સિંહ, યશપાલ આર્ય અને કરણ મહારા જેવા વિવિધ જૂથોમાં વહેંચાયેલી છે. જ્યારે રાવતને લાગ્યું કે નવા સંગઠનાત્મક સમીકરણો તેમને બાજુ પર ધકેલી રહ્યા છે, ત્યારે તેમણે જનતા સાથે સીધો સંપર્ક સાધવાનું વધુ યોગ્ય માન્યું.

કોંગ્રેસ માટે મુશ્કેલીઓ વધી

હરીશ રાવત આ યાત્રા દ્વારા હાઇકમાન્ડને એ સ્પષ્ટ સંદેશ આપવા માંગે છે કે ભલે તેમની ઉંમર વધી હોય, પરંતુ ઉત્તરાખંડની રાજનીતિમાં તેમને નજરઅંદાજ કરવા કે ટિકિટ વિતરણમાં તેમના સમર્થકોને બાકાત રાખવા કોંગ્રેસ માટે સરળ નહીં રહે.

આ પણ વાંચોઃ Flydubai Flightનું રહસ્ય, ક્રૂમાં સામેલ ન હોવા છતાં વિમાનમાં કેમ હાજર હતા બે વધારાના પાઇલટ?