27 ઓક્ટોબરે સોમવારે સાંજે લગભગ 7:47 વાગ્યે ઉત્તરાખંડના ચમોલીમાં હળવા ભૂકંપના ઝટકા અનુભવાયા છે. ભૂકંપની તીવ્રતા રિક્ટર સ્કેલ પર 3.4 નોંધાઈ છે. ભૂંકપનું કેન્દ્રબિંદુ કેન્દ્ર ચમોલીમાં નોંધાયું છે. ભૂકંપના ઝટકાથી ધરતી લગભગ 2 સેકન્ડ માટે ધ્રુજી હોવાના અહેવાલ છે, જેના કારણે લોકો ગભરાઈ ગયા અને પોતાના ઘર છોડીને ભાગી ગયા છે.
લોકોમાં ગભરાટ ફેલાયો
ભૂકંપમાં કોઈ જાનમાલનું નુકસાન થયું નથી. જિલ્લા આપત્તિ વ્યવસ્થાપન વિભાગના જણાવ્યા અનુસાર કોઈ નુકસાન થયું નથી, જે લોકો માટે રાહતની વાત છે. ભૂકંપની તીવ્રતા ઓછી હોવા છતાં તેનાથી લોકોમાં ગભરાટ ફેલાયો છે. જિલ્લા આપત્તિ વ્યવસ્થાપન અધિકારીના જણાવ્યા મુજબ ભૂકંપનું કેન્દ્ર ચમોલી હતું. તેમણે જણાવ્યું કે ભૂકંપ હળવો હોવાથી મોટાભાગના લોકો તેનાથી અજાણ હતા.
જિલ્લા મેજિસ્ટ્રેટે અફવાઓ પર ધ્યાન ન આપવા અપીલ કરી
આ દરમિયાન ચમોલી જિલ્લા મેજિસ્ટ્રેટે જનતાને શાંતિ જાળવવા અને અફવાઓ પર ધ્યાન ના આપવાની અપીલ કરી છે. તેમણે વહીવટીતંત્ર દ્વારા જાહેર કરાયેલા નિર્દેશોનું પાલન કરવાની પણ સલાહ આપી છે. તેમણે કહ્યું કે પરિસ્થિતિ પર નજર રાખવામાં આવી રહી છે અને કોઈ જાનહાનિના અહેવાલ નથી.
ઉત્તરાખંડ ભૂકંપ માટે ખૂબ જ સંવેદનશીલ
ઉત્તરાખંડ ભૂકંપ માટે અત્યંત સંવેદનશીલ છે. રાજ્યના મોટાભાગના વિસ્તારો ભૂકંપ ઝોન 4 અને 5માં આવે છે, જેના કારણે તે વારંવાર બનતું રહે છે. અહીં પહેલા પણ ઘણી વખત ભૂકંપ આવી ચૂક્યા છે. આ મહિનાની શરૂઆતમાં 2 ઓક્ટોબરના રોજ પુરોલા તાલુકાના ગુંડિયટ ગામ અને માહેર ગામ વિસ્તારોમાં રિક્ટર સ્કેલ પર 2.1ની તીવ્રતાનો ભૂકંપ આવ્યો હતો. 14 ઓક્ટોબરના રોજ મોરી અરાકોટ વિસ્તારમાં હળવો ભૂકંપ અનુભવાયો હતો, જેની રિક્ટર સ્કેલ પર 3.5ની તીવ્રતા હતી. સતત આવતા ભૂકંપથી લોકો ભયભીત થઈ ગયા છે.
