આંધ્રપ્રદેશના વિશાખાપટ્ટનમમાં આવેલી એચપીસીએલની વિશાળ રિફાઇનરીમાં સોમવારે રાત્રે ભીષણ આગ લાગવાની ઘટના સામે આવી છે. આગ લાગતા પહેલાં ત્યાં ધડાકા જેવી તેજ અવાજો સંભળાયા હોવાની માહિતી સામે આવી છે. ઘટનાને પગલે આસપાસના વિસ્તારોમાં રહેતા લોકોમાં ચિંતા ફેલાઈ હતી.
રિફાઇનરીમાંથી ઘન ધુમાડાના ગોટેગોટા ઊઠતા દૂર સુધી દેખાયા હતા. જોકે, વહીવટી તંત્રે લોકોને ગભરાવાની જરૂર ન હોવાનું જણાવ્યું છે.
પ્રાથમિક માહિતી મુજબ, રિફાઇનરીની સલ્ફર પિચ ટાંકીમાં આગ લાગી હતી. અધિકારીઓના જણાવ્યા અનુસાર, આગ હાલ આ જ વિસ્તાર સુધી મર્યાદિત છે અને પ્લાન્ટના અન્ય મહત્વના ભાગો સુધી ફેલાઈ નથી. જેના કારણે મોટા અકસ્માતની આશંકા ટળી હોવાનું જણાવાયું છે.
https://www.instagram.com/reel/DfP7s7yEoO0/?utm_source=ig_web_button_share_sheet
ઘટનાની જાણ થતાં જ એચપીસીએલની ફાયર બ્રિગેડ ટીમો સહિત અન્ય ફાયર કર્મચારીઓ પણ સ્થળ પર પહોંચી ગયા હતા. અનેક ફાયર વાહનો દ્વારા આગ પર કાબૂ મેળવવા સતત પ્રયાસો કરવામાં આવી રહ્યા છે. અધિકારીઓ સમગ્ર પરિસ્થિતિ પર નજર રાખી રહ્યા છે.
વિશાખાપટ્ટનમના પોલીસ કમિશનરે જણાવ્યું કે આગ માત્ર ટાંકી સુધી મર્યાદિત છે અને હાલ અન્ય કોઈ ભાગને જોખમ નથી. અધિકારીઓના જણાવ્યા મુજબ, ધુમાડાને પણ હાલ જોખમી માનવામાં આવતો નથી.
સૌથી રાહતની વાત એ છે કે અત્યાર સુધી કોઈ વ્યક્તિ ઘાયલ થઈ હોય કે જાનમાલનું નુકસાન થયું હોય તેવી માહિતી સામે આવી નથી. આગ પર સંપૂર્ણ કાબૂ મેળવવા માટે રાહત અને બચાવ કામગીરી સતત ચાલુ છે.
આ પણ વાંચો : Rajkot: હાઈપ્રોફાઈલ દારૂ પાર્ટી કેસમાં 40 કલાક બાદ પણ તપાસના નામે મીંડું, વગદારોને બચાવવાના આક્ષેપ