પશ્ચિમ બંગાળમાં મ્યુનિસિપલ ભરતી કૌભાંડને લઈને EDએ શનિવારે મોટી કાર્યવાહી હાથ ધરી છે. તપાસ એજન્સીએ મદન મિત્રા સાથે જોડાયેલા અનેક ઠેકાણાઓ પર એકસાથે દરોડા પાડ્યા છે. આ કાર્યવાહી મ્યુનિસિપલ ભરતી પ્રક્રિયામાં થયેલી ગેરરીતિ અને મની લોન્ડરિંગ કેસની તપાસ અંતર્ગત કરવામાં આવી રહી છે.
સાત ઠેકાણાઓ પર તપાસ
મળતી માહિતી મુજબ મદન મિત્રા સાથે જોડાયેલા કુલ સાત સ્થળોએ સર્ચ અભિયાન ચાલી રહ્યું છે. તેમાં કોલકાતાના ભવાનીપુર સ્થિત તેમનું નિવાસસ્થાન, દક્ષિણેશ્વરનો પાંચ માળનો એપાર્ટમેન્ટ અને જોકા વિસ્તારમાં ફ્લેટનો સમાવેશ થાય છે. ઉપરાંત ઉત્તર કોલકાતાના બેલેઘાટા અને ભવાનીપુર તેમજ સંતોષપુરના બે ક્લબોમાં પણ તપાસ કરવામાં આવી રહી છે. EDની ટીમે ભવાનીપુર સ્થિત તેમના ઘર પર પહોંચી પરિવાર સાથે પૂછપરછ પણ કરી છે.
નોકરી કૌભાંડ અને મની લોન્ડરિંગનો આરોપ
EDનો આરોપ છે કે મદન મિત્રાએ નગરપાલિકાઓમાં અયોગ્ય ઉમેદવારોની નિમણૂક માટે મધ્યસ્થીઓ મારફતે રોકડ અને સોનાના રૂપમાં લાંચ લીધી હતી. આ કેસમાં લગભગ 125 ગેરકાયદે નિમણૂકો સાથે તેમનો સંબંધ હોવાનું જણાવાયું છે. તપાસ એજન્સી દસ્તાવેજો અને નાણાકીય વ્યવહારોના પુરાવા એકત્રિત કરી રહી છે, જેથી ભરતી પ્રક્રિયામાં થયેલા ભ્રષ્ટાચારની પુષ્ટિ થઈ શકે.
એયાન સિલ સાથે જોડાણ
આ સમગ્ર કેસની તપાસમાં મુખ્ય આધાર એયાન સિલ પાસેથી મળેલી માહિતી પર છે, જેની 20 માર્ચ 2023ના રોજ ધરપકડ કરવામાં આવી હતી. તેમની કંપની ‘એબીએસ ઈન્ફોઝોન પ્રાઈવેટ લિમિટેડ’ ભરતી પ્રક્રિયા સંચાલનમાં જોડાયેલી હોવાનું જણાવાયું છે. કંપની OMR શીટ તૈયાર કરવી, પરીક્ષા લેવડાવવી અને ઈન્ટરવ્યૂ પ્રક્રિયા સંભાળવા જેવી કામગીરી કરતી હતી. તપાસ દરમિયાન ગંભીર ગેરરીતિઓ સામે આવી હતી.
કરોડોની ગેરકાયદે વસૂલાતનો આરોપ
EDના જણાવ્યા મુજબ ઉમેદવારો પાસેથી નોકરીના બદલામાં કરોડો રૂપિયા વસૂલવામાં આવ્યા હતા. અત્યાર સુધીમાં આ કેસમાં લગભગ 111 કરોડ રૂપિયા જપ્ત કરવામાં આવ્યા છે. અગાઉ પણ આ ભરતી કૌભાંડમાં ઘણા નગરપાલિકાઓના નામ સામે આવ્યા છે, જેમ કે કમરહાટી, ટીટીગઢ, કાંચરાપાડા અને અન્ય વિસ્તારો.
શું થશે આગળ કાર્યવાહી?
આ કેસમાં અગાઉ પણ અનેક રાજકીય નેતાઓ પર કાર્યવાહી થઈ ચૂકી છે. તપાસ એજન્સી હવે નવા પુરાવા એકત્રિત કરીને વધુ લોકોની ભૂમિકા તપાસી રહી છે. EDએ સ્પષ્ટ કર્યું છે કે તપાસ હજુ ચાલુ છે અને જરૂરી કાર્યવાહી આગળ પણ કરવામાં આવશે.
આ પણ વાંચો : Chandigarh : ધોળા દિવસે મેડિકલની દુકાનમાં ફાયરિંગ, માસ્ક પહેરેલા શખ્સોએ કેશિયરને ગોળી મારી
