પશ્ચિમ બંગાળમાં ટીએમસીની જબરદસ્ત હાર થઇ.આ હાર બાદ એવી અફવાઓ સામે આવી કે લગભગ 20 ટીએમસી સાંસદો બળવો કરી રહ્યા છે. આ દરમિયાન એક નવી યાદી બહાર આવી છે, જેમાં 19 સાંસદોના હસ્તાક્ષર છે. આ યાદીમાં સયોની ઘોષ અને યુસુફ પઠાણના નામ પણ શામેલ છે.
18મેના રોજ સ્પીકરને લખ્યો હતો પત્ર
સૂત્રોના જણાવ્યા અનુસાર, તેમણે 18 મેના રોજ લોકસભા સ્પીકરના કાર્યાલયમાં પોતાના નામ સુપરત કર્યા હતા. અગાઉ ઘણા મીડિયા અહેવાલોમાં સૂચવવામાં આવ્યું હતું કે શત્રુઘ્ન સિંહાનો પણ મમતા બેનર્જી સામે બળવો કરનારા સાંસદોની યાદીમાં સમાવેશ કરવામાં આવ્યો હતો, પરંતુ તેમનું નામ નવી યાદીમાંથી ગાયબ છે. આ પત્ર બળવાખોર જૂથે 18 મેના રોજ લખ્યો હતો. આ પત્ર પર સાંસદોના બળવાખોર જૂથના નેતા કાકોલી ઘોષ દસ્તીદાર સહિત અન્ય 17 સાંસદોના હસ્તાક્ષર છે. બાદમાં એક સાંસદે વિદ્રોહી જૂથને ટેકો આપતા સ્પીકરને અલગ પત્ર લખ્યો હતો.
અલગ જૂથ બનાવવાની માગ
જ્યારે સ્પીકરને આ પત્ર લખવામાં આવ્યો ત્યારે કાકોલી ઘોષ ટીએમસીના ચીફ વ્હીપ હતા. 20 મેના રોજ, ટીએમસીએ લોકસભા અધ્યક્ષને પત્ર લખીને જાણ કરી હતી કે કાકોલી ઘોષ દસ્તીદારને હટાવીને તેમની જગ્યાએ કલ્યાણ બેનર્જીને ચીફ વ્હીપ બનાવવામાં આવી રહ્યા છે. અલગ જૂથની માન્યતા માટેનો પત્ર કાકોલી જૂથ દ્વારા 18 મેના રોજ જ આપવામાં આવ્યો હતો.
કાકોલી ઘોષને દાવો 20 સાંસદોએ બળવો કર્યો
ટીએમસીના ચીફ વ્હીપ પદેથી હટાવ્યા પહેલા પણ, કાકોલી ઘોષે સ્પીકરને પત્ર લખીને દાવો કર્યો હતો કે તેમને ટીએમસીના 28 માંથી 20 સાંસદોનું સમર્થન છે. કાકોલી જૂથે જણાવ્યું હતું કે બંધારણની દસમી અનુસૂચિ હેઠળ, તેમની બાજુમાં પાર્ટીના 28 માંથી 20 સાંસદો છે. આ આંકડો બે તૃતીયાંશ કરતા વધુનું પ્રતિનિધિત્વ કરે છે. તેથી, તેમને એક અલગ જૂથ ગણવા જોઈએ અને વિપક્ષી બેન્ચથી અલગ બેસવા જોઈએ.
સ્પીકરને લખેલા પત્ર પર આ સાંસદોના હસ્તાક્ષર
બળવાખોર ટીએમસી જૂથ વતી સ્પીકર ઓમ બિરલાને મોકલવામાં આવેલા પત્ર પર 18 સાંસદોના હસ્તાક્ષર છે. કાકોલી ઘોષ દસ્તીદાર પત્ર પર સહી કરનારા સૌપ્રથમ છે, ત્યારબાદ શતાબ્દી રોય, બાપી હલદર, ડૉ. શર્મિલા સરકાર, પ્રસૂન બંદોપાધ્યાય, જગદીશ બાસુનિયા અને અસિત કુમાર માલ છે.
યાદીમાં કયા નામો છે?
- કાકોલી ઘોષ
- .શતાબ્દી રોય
- બાપી હલદર
- ડૉ. શર્મિલા સરકાર
- પ્રસૂન બંદોપાધ્યાય
- જગદીશ બર્મા બાસુનિયા
- અસિત કુમાર માલ
- અરૂપ ચક્રવર્તી
- .રચના બેનર્જી
- .સયોની ઘોષ
- ખલીલુર રહેમાન
- અબુ તાહિર ખાન
- .યુસુફ પઠાણ
- મિતાલી બેગ
- માલા રોય
- કાલીપદ સોરેન
- દીપક અધિકારી
- જૂન માલિયા
- પાર્થ ભૌમિક
બળવાખોરોની યાદીમાં સૌથી આશ્ચર્યજનક નામ સયોની ઘોષનું છે. તે અભિષેક બેનર્જીની નજીક હોવાનું કહેવાય છે. તે પાર્ટીના લોકપ્રિય ચહેરા તરીકે પણ ઉભરી આવી છે. જો તે બળવાખોર જૂથમાં જોડાય છે, તો તે મમતા બેનર્જી માટે મોટો ફટકો હશે. સયોની જાધવપુર મતવિસ્તારમાંથી લોકસભા સાંસદ છે. સૂત્રોના જણાવ્યા અનુસાર, તેમણે તાજેતરમાં પક્ષની અંદરના રાજકીય ઉથલપાથલ વચ્ચે કાકોલી ઘોષનો સંપર્ક કર્યો હતો.
કીર્તિ આઝાદે બળવાખોર સાંસદોની યાદી અંગે પ્રશ્નો ઉઠાવ્યા
ગુરુવારે (11 જૂન) પહેલા, ટીએમસી સાંસદ કીર્તિ આઝાદે, બળવા અંગેની અટકળો અને ટીએમસી છોડી રહેલા નેતાઓની યાદી અંગેના સસ્પેન્સ અંગે સમાચાર એજન્સી આઈએએનએસ સાથે વાત કરતા કહ્યું હતું કે, "દરરોજ એક નવી યાદી બહાર આવે છે. એક દિવસે 19 નામો હોય છે, બીજા દિવસે ત્રણ નામ બદલાય છે, અને પછી અલગ અલગ નામોવાળી બીજી યાદી બહાર આવે છે. આ યાદીઓ બદલાતી રહે છે અને તેમની કોઈ વિશ્વસનીયતા નથી.
તેમણે વધુમાં કહ્યું, "જો કોઈ છોડવા માંગે છે, તો તે કરી શકે છે. પરંતુ પાર્ટી છોડ્યા પછી, તેમણે તૃણમૂલ કોંગ્રેસનું પ્રતિનિધિત્વ કરવાનો દાવો ન કરવો જોઈએ. જો તેઓ ભાજપમાં જોડાવા અથવા મર્જ કરવાનો ઇરાદો ધરાવે છે, તો તેમણે ખુલ્લેઆમ આવું કરવું જોઈએ."
