મહારાષ્ટ્રમાં વિધાનસભાની ચૂંટણી આવી રહી છે. ત્યારે પીએમ મોદી આજે મહારાષ્ટ્રના ધૂલે પહોંચ્યા હતા. અહીં તેમણે જમ્મુ કાશ્મીર વિધાનસભામાં ચાલી રહેલી સ્થિતિ અંગે વાત કરી હતી. તેમણે નેશનલ કોન્ફરન્સ અને કોંગ્રેસ પર આકરા પ્રહાર કર્યા હતા. પીએમ મોદીએ કહ્યું કે કોંગ્રેસ ફરીથી જમ્મુ કાશ્મીરમાં ષડયંત્ર કરી રહી છે. કોંગ્રેસ કાશ્મીરને તોડવા માગે છે. કોંગ્રેસ અને નેશનલ કોન્ફરન્સ જમ્મુ કાશ્મીરમાં કલમ 370 પરત લાવવા માગે છે. પીએમ મોદીએ કહ્યું કે જમ્મુ કાશ્મીર વિધાનસભામાં જે પણ કંઇ થયુ તે તમે જોયો.
કોંગ્રેસ અને NC પર વરસ્યા પીએમ મોદી
પીએમ મોદીએ કહ્યું કે કલમ 370 હટાવવાનો પ્રસ્તાવ વિધાનસભામાં પસાર કરવામાં આવ્યો હતો. વિધાનસભાની અંદર કલમ 370ના સમર્થનમાં બેનરો લહેરાવવામાં આવ્યા હતા. ભાજપના ધારાસભ્યોએ તેનો વિરોધ કર્યો છે. વિધાનસભાની બહાર બેનરો ફેંકવામાં આવ્યા હતા. કોંગ્રેસ જમ્મુ-કાશ્મીરમાં બાબાસાહેબનું બંધારણ નથી ઈચ્છતી. કોંગ્રેસ ગઠબંધન બંધારણના ખોટા પુસ્તકને લહેરાવી રહ્યું છે.
કોઇ તાકાત કલમ 370 પરત નહી લાવી શકે - પીએમ મોદી
પીએમ મોદીએ કહ્યું કે જમ્મુ-કાશ્મીરમાં બાબાસાહેબનું બંધારણ જ કામ કરશે. કોંગ્રેસે પાકિસ્તાનના એજન્ડાને પ્રોત્સાહન આપવાનું બંધ કરવું જોઈએ. કોંગ્રેસે કાશ્મીરને લઈને અલગતાવાદીઓની ભાષા ન બોલવી જોઈએ. પીએમ મોદીએ કહ્યું કે કલમ 370 હટવી એ 21મી સદીનો સૌથી મોટો નિર્ણય હતો. કોંગ્રેસ અને નેશનલ કોન્ફરન્સની યોજનાઓ સફળ નહીં થાય. દુનિયાની કોઈ પણ તાકાત જમ્મુ-કાશ્મીરમાં કલમ 370 પાછી નહી લાવી શકે.
એક થઇએ તો સુરક્ષિત છીએ- પીએમ મોદી
પીએમ મોદીએ વધુમાં કહ્યું કે કોંગ્રેસ એક જાતિને બીજી જાતિ સામે લડાવવાની ખતરનાક રમત રમી રહી છે અને આ રમત રમાઈ રહી છે કારણ કે કોંગ્રેસ ક્યારેય દલિતો, પછાત વર્ગો અને આદિવાસીઓને આગળ વધતા જોઈ શકતી નથી. આ કોંગ્રેસનો ઈતિહાસ છે, તેથી જ હું કહું છું કે 'જો આપણે એક થઈએ તો સુરક્ષિત છીએ' આપણે એક થઈને કોંગ્રેસની ખતરનાક રમતને નિષ્ફળ બનાવીને વિકાસના માર્ગે આગળ વધતા રહેવું જોઈએ. જ્યાં વિભાજનની આગ છે, તેના મૂળમાં કોંગ્રેસની રાષ્ટ્રવિરોધી ભાવના છે. કોંગ્રેસ હંમેશા દેશને તોડવાના ષડયંત્રનો ભાગ રહી છે.
4 પેઢી આવે તો પણ કલમ 370 પરત નહી આવે- અમિત શાહ
તો બીજી તરફ મહારાષ્ટ્રના શિરાલામાં કેન્દ્રીય મંત્રી અમિત શાહે જાહેર સભા સંબોધી હતી. તેમણે જમ્મુ-કાશ્મીરમાં કલમ 370 પુનઃસ્થાપિત કરવા અંગે તેમણે મોટું નિવેદન આપ્યું છે. શાહે કહ્યું કે કોંગ્રેસ જમ્મુ-કાશ્મીરમાં કલમ 370 પાછી લાવવા માંગે છે. હું કહું છું કે 4 પેઢી આવે તો પણ 370 પરત નહી આવે.
