PNB કૌભાંડ કેસમાં EDની મોટી કાર્યવાહી, નીરવ મોદીની 29.75 કરોડની સંપત્તિ જપ્ત

ભારતીય બેંકોને હજારો કરોડ રૂપિયાની છેતરપિંડી કરનાર ભાગેડુ બિઝનેસમેન નીરવ મોદીને મોટો ઝટકો લાગ્યો છે. એન્ફોર્સમેન્ટ ડિરેક્ટોરેટએ નીરવ મોદીની 29 કરોડ 75 લાખ રૂપિયાની સ્થાવર મિલકત અને બેંક બેલેન્સ જપ્ત કરી છે. PNB બેંક કૌભાંડ કેસમાં ભાગેડુ નીરવ મોદી વિરુદ્ધ આ કાર્યવાહી કરવામાં આવી છે. 6498 કરોડના આ બેંક ફ્રોડ કેસમાં EDએ CBIની FIR પર તપાસ શરૂ કરી હતી. તપાસ દરમિયાન EDને નીરવ મોદી અને તેના ગ્રૂપ ઓફ કંપનીઓની જમીન અને બેંક ખાતાની જાણકારી મળી હતી.

EDએ અત્યાર સુધીમાં રૂ. 2596 કરોડની સંપત્તિ જપ્ત કરી છે

આ મિલકતોને પ્રિવેન્શન ઓફ મની લોન્ડરિંગ એક્ટ (PMLA), 2022 હેઠળ કામચલાઉ રીતે જોડવામાં આવી છે. PMLA તપાસ દરમિયાન, EDએ અગાઉ નીરવ મોદી અને તેના સહયોગીઓની ભારત અને વિદેશમાં લગભગ 2596 કરોડ રૂપિયાની જંગમ અને સ્થાવર મિલકતો જપ્ત કરી હતી.

નીરવ મોદી બ્રિટનની જેલમાં બંધ છે

આ વર્ષની શરૂઆતમાં નીરવ મોદીએ યુકેની કોર્ટમાં જામીન માટે અરજી કરી હતી અને યુકેની કોર્ટે સાતમી વખત તેના જામીન ફગાવી દીધા હતા. જામીનના આદેશ સામે નીરવ મોદીએ યુકે હાઈકોર્ટ સમક્ષ અપીલ દાખલ કરી હતી, જે બાદમાં પાછી ખેંચી લેવામાં આવી હતી. હાલ તે બ્રિટિશ જેલમાં બંધ છે અને તેની વધુ તપાસ ચાલી રહી છે.

પ્રાપ્ત માહિતી અનુસાર, ભારત સરકાર દ્વારા નીરવ મોદીને ભારત પરત લાવવાના તમામ પ્રયાસો કરવામાં આવી રહ્યા છે, જેથી ભારતીય કાયદા મુજબ કૌભાંડો માટે તેની સામે કાનૂની કાર્યવાહી થઈ શકે. આ કેસમાં ભારત સરકારે બ્રિટિશ સરકારને પ્રત્યાર્પણ માટે અપીલ પણ કરી હતી.