Pune Bar Case: ડ્રગ્સ પેડલરોનો પર્દાફાશ, નાઇજિરિયન નાગરિક સહિત 3ની ધરપકડ

• પૂણે બાર કેસ મામલે પોલીસની મોટી કાર્યવાહી
  
• પોલીસે અત્યાર સુધીમાં 13 લોકોની ધરપકડ કરી 
• નાઈજિરિયન નાગરિક સહિત ત્રણ લોકોની ધરપકડ

પૂણે બાર કેસ મામલે પોલીસે અત્યાર સુધીમાં 13 લોકોની ધરપકડ કરી છે. તે જ સમયે, આબકારી વિભાગે દારૂના જથ્થા અને અન્ય ઉલ્લંઘનના આરોપમાં 6 લોકોની ધરપકડ કરી છે. આબકારી વિભાગ દ્વારા લાયસન્સ રદ કરાયા બાદ બાર સીલ કરવામાં આવ્યું હતું.

મહારાષ્ટ્રમાં પુણે બાર કેસમાં એક નાઈજિરિયન નાગરિક સહિત ત્રણ લોકોની ધરપકડ કરવામાં આવી છે. હકીકતમાં, પુણેના ફર્ગ્યુસન કોલેજના કોલેજ રોડ પર સ્થિત એક બારમાં તાજેતરમાં કેટલાક લોકો ડ્રગ જેવા પદાર્થ સાથે જોવા મળ્યા હતા. આ ઘટનાનો વીડિયો વાયરલ થયા બાદ જ પુણે પોલીસે કાર્યવાહી શરૂ કરી હતી. આ વીડિયોમાં, પોલીસે બે લોકોની ઓળખ કરી હતી જેઓ પુણેના લિક્વિડ લેઝર લાઉન્જ (L3) બારમાં ડ્રગ્સ લઈ જતા જોવા મળ્યા હતા. 

પોલીસે ડ્રગ યુઝરની ઓળખ કરી

ધરપકડ કરાયેલા ત્રણ આરોપીઓમાંથી એક ડ્રગ્સ (મેફેડ્રોન) સપ્લાય કરતો હતો, જેનો ઉપયોગ આરોપી નીતિન થોમ્બરે અને કરણ મિશ્રાએ L3 બારમાં કર્યો હતો. ડેપ્યુટી કમિશનર ઓફ પોલીસ સંદીપ સિંહ ગિલે જણાવ્યું હતું કે, નાઈજિરિયન નાગરિક સહિત પકડાયેલા અન્ય બે લોકોએ ત્રીજા આરોપીને ડ્રગ્સ સપ્લાય કર્યું હતું. અમે 75,000 રૂપિયાનું કોકેન અને 7 ગ્રામ વજનનો મેફેડ્રોન પાઉડર જપ્ત કર્યો છે. ત્રણેયની નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ ધરપકડ કરવામાં આવી હતી અને કોર્ટમાં રજૂ કરવામાં આવ્યા હતા.