NCP નેતા બાબા સિદ્દીકીની હત્યા બાદ સલમાનની સુરક્ષા વધારી દેવામાં આવી છે. બાબા સિદ્દીકી હત્યા કેસની જવાબદારી લોરેન્સ બિશ્નોઈએ લીધી છે. જે બાદ પોલીસે બિશ્નોઈ ગેંગ સાથે જોડાયેલા શૂટરોની શોધ તેજ કરી છે. આ દરમિયાન મુંબઈ પોલીસે તાજેતરમાં જ હરિયાણાના પાણીપતમાંથી સુખાની ધરપકડ કરી હતી. લોરેન્સ બિશ્નોઈ અને ગોલ્ડી બ્રારના કહેવા પર સુખાએ 2022માં મુંબઈમાં સલમાન ખાનના પનવાલ ફાર્મ હાઉસની રેકી કરાવી હતી. તે સલમાન ખાન પર હુમલો કરવાનો હતો, પરંતુ તે પ્લાન નિષ્ફળ ગયો. તેની ધરપકડ બાદ હવે ઘણા મોટા ખુલાસા થયા છે.
ગાર્ડ સાથે કરી હતી મિત્રતા
લોરેન્સ બિશ્નોઈ ગેંગના શૂટર સુખાએ રેકી કરવા માટે સલમાન ખાનના ગાર્ડ સાથે મિત્રતા કરી હતી. મુંબઈ પોલીસે જૂન 2024માં સલમાન ખાનને નવી મુંબઈમાં તેના ફાર્મહાઉસ તરફ જતી વખતે નિશાન બનાવ્યો હોવાનો પણ દાવો કર્યો છે. જો કે, આ યોજના નિષ્ફળ ગઈ હતી. આ ષડયંત્ર પહેલા એપ્રિલમાં બાંદ્રામાં સલમાન ખાનના ઘર ગેલેક્સી એપાર્ટમેન્ટની બહાર અજાણ્યા લોકોએ ગોળીબાર કર્યો હતો.
લોરેન્સ બિશ્નોઈ ગેંગ પર શંકા
આ ઘટનાને કારણે સલમાન ખાનની સુરક્ષા પર સવાલો ઉભા થયા છે. જ્યારે સલમાન ખાને મુંબઈ પોલીસને આપેલા નિવેદનમાં લોરેન્સ બિશ્નોઈ ગેંગ પર શંકા વ્યક્ત કરી હતી. સલમાન ખાને મુંબઈ પોલીસને આપેલા નિવેદનમાં કહ્યું હતું કે આ હુમલો તેને અને તેના પરિવારના સભ્યોને મારવાના ઈરાદાથી કરવામાં આવ્યો હતો.
આ રીતે લોરેન્સનો શાર્પ શૂટર સુખા ઝડપાયો
સુખાની તાજેતરમાં જ હરિયાણાના પાણીપતથી ધરપકડ કરવામાં આવી છે. મુંબઈ પોલીસને તેની ધરપકડ માટે ટીપ મળી હતી. આવી સ્થિતિમાં મુંબઈ પોલીસે સ્થાનિક પોલીસ અધિકારીઓ સાથે વાત કરી. જ્યારબાદ મુંબઈ પોલીસ પાણીપત પહોંચે હતી. અહીં પોલીસ હોટલમાં રોકાય હતી. આ દરમિયાન ખબર પડી કે સુખા આ હોટલમાં રોકાયો છે. જે બાદ મુંબઈ પોલીસે સંયુક્ત ઓપરેશનમાં સુખાની ધરપકડ કરી હતી.
નશામાં હતો સુખા
મુંબઈ પોલીસે જ્યારે સુખાની ધરપકડ કરી ત્યારે તે નશામાં હતો અને તેનું નામ બરાબર ઉચ્ચારી શકતો ન હતો. આ ઉપરાંત તેણે પોતાની ઓળખ છુપાવવા માટે દાઢી પણ વધારી હતી. પરંતુ પોલીસ રેકોર્ડમાં હાજર ફોટાની મદદથી તેની ધરપકડ કરવામાં આવી હતી.
સુખાની પુછપરછમાં અનેક ખુલાસા થયા
પૂછપરછ દરમિયાન સુખાએ જણાવ્યું કે, બિશ્નોઈ ગેંગનું નેટવર્ક ઘણા રાજ્યોમાં ફેલાયેલું છે. તેણે એ પણ જણાવ્યું કે, એપ્રિલમાં તેણે જ ગેંગના અન્ય શૂટર્સની મદદથી સલમાન ખાન પર ફાયરિંગ કરાવ્યું હતું. સુખાએ શૂટરોને પિસ્તોલ આપી હતી. આ ગોળીબાર બાદ મહારાષ્ટ્રના સીએમ શિંદેએ કહ્યું હતું કે, તેઓ બિશ્નોઈ ગેંગને જમીનદોસ્ત કરી દેશે. આમ છતાં બિશ્નોઈ ગેંગને આજ સુધી કંઈ કરવામાં આવ્યું નથી અને તેઓ સલમાન ખાનને ખુલ્લેઆમ ધમકીઓ આપી રહ્યા છે.
