Telangana: કાળા જાદુની આશંકાથી મહિલાને જીવતી સળગાવી! વાંચો હૃદય કંપાવતી કરૂણ ઘટના

અંધશ્રદ્ધાના નામે બનતી હેરાનગતિ અને મારપીટની ઘટનાઓ આપણા દેશના ઘણા લોકોની પોકળ માનસિકતા છતી કરે છે. કાળા જાદુના કારણે ઘણી મોટી ઘટનાઓ જોવા મળે છે. આવી જ ચોકાવનારી ઘટના તેલંગાણાના મેડક જિલ્લામાંથી સામે આવ્યું છે. અહીં એક ગામમાં કાળા જાદુની શંકામાં એક મહિલાને જીવતી સળગાવી દેવાનો મામલો સામે આવ્યો છે. પોલીસે શુક્રવારે આ ભયાનક ઘટના અંગે માહિતી આપી છે. 

શું છે સમગ્ર મામલો?

આ ઘટના અંગે માહિતી આપતા તેલંગાણા પોલીસે જણાવ્યું કે આ ઘટના ગુરુવારે બની હતી. રામાયામપેટ મંડલના કટરિયાલ ગામમાં લગભગ 6 લોકોએ રાત્રે 45 વર્ષની મહિલાના ઘર પર હુમલો કર્યો અને તેને આગ ચાંપી દીધી. એક મહિલા પર હુમલો કરીને તેને સળગાવી દેવામાં આવી હોવાની માહિતી મળતાં જ પોલીસ ઘટનાસ્થળે પહોંચી હતી અને ઘાયલ મહિલાને હોસ્પિટલમાં લઈ જવામાં આવી હતી. જોકે, તેને બચાવી શકાયો ન હતો અને સારવાર દરમિયાન મહિલાનું મોત થયું હતું.

કાળા જાદુની આશંકાથી ક્રૂર અંજામ

પ્રાથમિક તપાસના આધારે સ્થાનિક પોલીસે કહ્યું છે કે આ ઘટનાને અંજામ આપનારા લોકોએ મહિલા પર તેના પરિવારના સભ્ય પર કાળો જાદુ કરવાનો આરોપ લગાવ્યો હતો. જેના કારણે 6 જેટલા લોકોએ મહિલા પર હુમલો કર્યો હતો. તેઓએ મહિલાને જીવતી સળગાવી હતી.

આરોપીઓની ઓળખ થઈ ગઈ છે: પોલીસ

સમગ્ર ઘટના અંગે પોલીસે જણાવ્યું હતું કે કાળા જાદુના આરોપમાં મહિલાને સળગાવવાના મામલામાં હત્યાનો કેસ નોંધવામાં આવ્યો છે. પોલીસે એમ પણ કહ્યું છે કે આ ઘટનાને અંજામ આપનાર આરોપીઓની ઓળખ થઈ ગઈ છે. પોલીસે આ મામલે વધુ તપાસ અને કાર્યવાહી હાથ ધરી છે.