દેશના વિવિધ રાજ્યોમાં અત્યારે શીતલહેર છવાઇ છે. ક્યાંક તાપમાન માઇનસમાં પહોંચતા બરફવર્ષા થઇ રહી છે તો ક્યાંક માવઠાની આગાહી કરવામાં આવી રહી છે. ત્યારે આગામી દિવસોમાં દેશમાં ક્યાં કેવુ વાતાવરણ રહેશે તેને લઇને આગાહી કરવામાં આવી છે.
ભારતીય હવામાન વિભાગ (IMD) એ આગામી થોડા દિવસોમાં દિલ્હી-NCR તેમજ ઉત્તર પ્રદેશ, હરિયાણા અને પંજાબમાં વરસાદની આગાહી કરી છે. આ તમામ રાજ્યોમાં પહેલેથી જ પ્રવર્તી રહેલી ઠંડીમાં હજુ વધારો થશે. હવામાન વિભાગે ઘણા રાજ્યોમાં વરસાદ અને કોલ્ડવેવ બંને માટે એલર્ટ આપ્યું છે. મહત્વનું છે કે પહાડોમાં હિમવર્ષાની સાથે જ ઉત્તર ભારતના ઘણા રાજ્યોમાં કડકડતી ઠંડી પડી રહી છે. જ્યારે વેસ્ટર્ન ડિસ્ટર્બન્સના કારણે ઘણા રાજ્યોનું હવામાન બગડવાનું છે. દિલ્હી-NCRમાં આકાશમાં કાળા વાદળો છે. સોમવારે સવારે પણ કેટલાક વિસ્તારોમાં હળવો વરસાદ થયો હતો.
આજે પણ વરસાદ પડશે
હવામાન વિભાગે કહ્યું કે સોમવારે (23 ડિસેમ્બર) દિલ્હી, એનસીઆર, ઉત્તર પ્રદેશ અને હરિયાણાના ઘણા જિલ્લાઓ વાદળછાયું રહેશે. આજે સવારે દિલ્હી-એનસીઆરના કેટલાક વિસ્તારોમાં હળવો વરસાદ પણ નોંધાયો હતો. દિવસ દરમિયાન પણ વરસાદની સંભાવના છે.
26 અને 27 ડિસેમ્બરે ભારે વરસાદની આગાહી
જોકે હવામાન વિભાગે 26 અને 27 ડિસેમ્બરે દિલ્હી-NCR, ઉત્તર પ્રદેશ અને હરિયાણાના મોટા ભાગોમાં ભારે વરસાદની આગાહી કરી છે. વરસાદને કારણે ઠંડીમાં વધારો થશે. આ સમયગાળા દરમિયાન શીત લહેર પણ પ્રવર્તશે.
આ રાજ્યોમાં કોલ્ડ વેવ એલર્ટ
હવામાન વિભાગે કહ્યું કે માવઠાને કારણે હિમાચલ પ્રદેશ, પંજાબ, જમ્મુ-કાશ્મીર, હરિયાણા જેવા વિસ્તારોમાં તાપમાનમાં ભારે ઘટાડો થશે અને મધ્ય પ્રદેશમાં શીત લહેર જોવા મળશે.
વેસ્ટર્ન ડિસ્ટર્બન્સના કારણે હવામાન બદલાયું
બદલાતી હવામાનની પેટર્ન નવા પશ્ચિમી વિક્ષેપના આગમનથી પશ્ચિમ હિમાલયના પ્રદેશ અને આસપાસના મેદાનો પર વરસાદ અને હવામાનની સ્થિતિમાં ફેરફાર થવાની ધારણા છે. સોમવારે દિલ્હી-એનસીઆરમાં હળવા વરસાદની સાથે મંગળવારે ગાઢ ધુમ્મસ રહેશે. તીવ્ર ઠંડી માટે યલો એલર્ટ આપવામાં આવ્યું છે.
અત્યારે અહીં વરસાદી માહોલ
હવામાન વિભાગે જણાવ્યું કે તટીય આંધ્રપ્રદેશ, ઉત્તર તમિલનાડુ, પુડુચેરી અને રાયલસીમામાં તાજેતરમાં ભારે વરસાદ થયો છે. ઓડિશા, દરિયાકાંઠાના પશ્ચિમ બંગાળ, નાગાલેન્ડ, મણિપુર, મિઝોરમ, ત્રિપુરા, આસામ અને મેઘાલયના ભાગોમાં પણ વરસાદ નોંધાયો હતો.
હિમાચલમાં હિમવર્ષાનું એલર્ટ
જ્યારે હિમાચલ પ્રદેશમાં 23, 24 અને 27 ડિસેમ્બરે કેટલીક જગ્યાએ વરસાદની સંભાવના છે. આગામી 24 કલાક દરમિયાન ઉના, હમીરપુર, બિલાસપુર અને મંડી જિલ્લાઓ માટે ઓરેન્જ એલર્ટ જારી કરવામાં આવ્યું છે. હિમાચલના અનેક વિસ્તારોમાં હિમવર્ષા થતાં ઠંડીમાં હજુ વધારો થશે.
કાશ્મીરમાં તાપમાન માઈનસમાં
કાશ્મીરના વિવિધ ભાગોમાં તાપમાન માઈનસ ડિગ્રીથી નીચે ગયું છે. કાશ્મીરમાં સરોવરો, ધોધ, નાળા અને પાણીની પાઈપલાઈન થીજી ગઈ છે. અહીં તાપમાન માઈનસથી 14 થી 18 ડિગ્રી નીચે છે. કાશ્મીરમાં મોટી સંખ્યામાં પ્રવાસીઓ આવી રહ્યા છે.
