Weather Update: ઠંડીથી ઠુંઠવાયુ ઉત્તર ભારત, ટ્રેન-ફ્લાઇટ સેવા ધુમ્મસના કારણે અટવાઇ

રાષ્ટ્રીય રાજધાની દિલ્હીમાં સતત ત્રીજી સવારે ગાઢ ધુમ્મસ છે. ઠંડા પવનો ફૂંકાઈ રહ્યા છે, જેના કારણે ઠંડીનુ જોર વધ્યુ છે. ખૂબ જ ઓછી વિઝિબિલિટીના કારણે ટ્રેનથી લઈને ફ્લાઈટ દરેક વસ્તુને અસર થઈ રહી છે. હવામાન વિભાગે જમ્મુ-કાશ્મીરમાં ભારે હિમવર્ષાને લઈને 'ઓરેન્જ એલર્ટ' જાહેર કર્યું છે. IMD એ પણ લદ્દાખ અને હિમાચલ પ્રદેશમાં હળવાથી મધ્યમ વરસાદ અને હિમવર્ષાની આગાહી કરી છે.

હવામાન વિભાગે જણાવ્યું હતું કે ઉત્તર-પશ્ચિમ ભારતમાં 10 થી 12 જાન્યુઆરીની વચ્ચે નવી પશ્ચિમી વિક્ષેપની સંભાવના છે

હવામાન વિભાગે જણાવ્યું હતું કે ઉત્તર-પશ્ચિમ ભારતમાં 10 થી 12 જાન્યુઆરીની વચ્ચે નવી પશ્ચિમી વિક્ષેપની સંભાવના છે, જેના કારણે 10 જાન્યુઆરીએ પ્રદેશમાં હળવો વરસાદ પડી શકે છે. આજે પણ ઈન્દિરા ગાંધી ઈન્ટરનેશનલ એરપોર્ટ પર ઘણી ફ્લાઈટ મોડી ચાલી રહી છે. આઈજીઆઈએ એડવાઈઝરીમાં કહ્યું કે, દિલ્હી એરપોર્ટ પર લેન્ડિંગ અને ટેક ઓફ ચાલુ છે. CAT III નું પાલન ન કરતી ફ્લાઈટ્સ પર અસર થઈ શકે છે. મુસાફરોને ફ્લાઇટની અપડેટ માહિતી માટે સંબંધિત એરલાઇનનો સંપર્ક કરવા વિનંતી કરવામાં આવે છે. કોઈપણ અસુવિધા માટે અમે દિલથી દિલગીર છીએ.

ટ્રેનો મોડી ચાલી રહી છે

હવામાન વિભાગના જણાવ્યા અનુસાર રવિવારે સવારે 5.30 વાગ્યે દિલ્હીમાં 10 ડિગ્રી સેલ્સિયસ તાપમાન નોંધાયું હતું. તે જ સમયે શનિવારે પણ તાપમાન 10.2 ડિગ્રી સેલ્સિયસ હતું. ધુમ્મસના કારણે નવી દિલ્હી રેલવે સ્ટેશન પર ઘણી ટ્રેનો મોડી ચાલી રહી છે. દિલ્હીમાં હવાની ગુણવત્તા પણ ખૂબ જ ખરાબ શ્રેણીમાં છે. આજે સવારે 6 વાગ્યે AQI 377 નોંધવામાં આવ્યો હતો. ગઈકાલે આ સમયે તે 385 હતો.

દિલ્હીમાં 9 કલાક સુધી વિઝિબિલિટી શૂન્ય હતી

આ પહેલા શનિવારે દિલ્હીમાં 10થી 12 કલાક સુધી ગાઢ ધુમ્મસ છવાયું હતું. લગભગ 9 કલાક માટે શૂન્ય વિઝિબિલિટી રેકોર્ડ કરવામાં આવી હતી. IMDએ જણાવ્યું હતું કે, પાલમમાં સાંજે 6 વાગ્યાથી સવારે 3 વાગ્યાની વચ્ચે 9 કલાક સુધી શૂન્ય વિઝિબિલિટી હતી, જે આ સિઝનનો સૌથી લાંબો સમયગાળો હતો. જ્યારે સફદરજંગ કેન્દ્રમાં આઠ કલાક સુધી ઝીરો વિઝિબિલિટી નોંધાઈ હતી. શહેરમાં મહત્તમ તાપમાન 20 ડિગ્રી સેલ્સિયસ નોંધાયું હતું જે સામાન્ય કરતાં 0.7 ડિગ્રી વધુ અને લઘુત્તમ તાપમાન સામાન્ય કરતાં 0.9 ડિગ્રી વધુ 7.8 ડિગ્રી સેલ્સિયસ નોંધાયું હતું.

ગાઢ ધુમ્મસ અને ઓછી વિઝિબિલિટીના કારણે દિલ્હી એરપોર્ટ પર ફ્લાઈટ્સ પ્રભાવિત થઈ હતી. ઉત્તર રેલવેએ જણાવ્યું હતું કે 59 ટ્રેનો છ કલાક સુધી મોડી ચાલી રહી હતી. જ્યારે 22 ટ્રેનો લગભગ આઠ કલાક મોડી ચાલી રહી છે. શનિવારે 19 ફ્લાઈટ ડાયવર્ટ કરવામાં આવી હતી. ઘણી ફ્લાઈટ્સ કેન્સલ કરવી પડી હતી અને 400થી વધુ ફ્લાઈટ્સ મોડી પડી હતી. શનિવારે પણ 81 ટ્રેનો મોડી દોડી હતી.