અવકાશયાત્રી સુનીતા વિલિયમ્સ અને બુચ વિલ્મોર હજુ પણ અવકાશમાં ફસાયેલા છે. સ્પેસ એજન્સી નાસાના જણાવ્યા અનુસાર હવે તેમની વાપસી આવતા વર્ષ સુધી જ શક્ય છે. સુનીતા વિલિયમ્સે પણ તેની માતા સાથે વાત કરી અને તેને સમગ્ર પરિસ્થિતિ જણાવી. હવે સવાલ એ છે કે, જ્યારે સ્પેસમાં ફોન અને ઈન્ટરનેટ નથી તો સુનીતા વિલિયમ્સે તેની માતા સાથે કેવી રીતે વાતચીત કરી.
સ્પેસ
સ્પેસની દુનિયા રહસ્યોથી ભરેલી છે. અવકાશયાત્રી સુનિતા વિલિયમ્સ અને બૂચ વિલ્મોર અવકાશમાં ફસાયેલા છે. જ્યારે અમેરિકાની સ્પેસ એજન્સી નાસાએ કહ્યું કે, આ વર્ષે અવકાશયાત્રીઓનું પરત આવવું શક્ય નથી. પરંતુ આ દરમિયાન સમાચાર આવ્યા છે કે અંતરિક્ષમાં ફસાયેલી ભારતીય મૂળની નાસા અવકાશયાત્રી સુનિતા વિલિયમ્સે તેની માતાનો સંપર્ક કર્યો છે. સુનિતાએ તેની માતાને ત્યાં ટેકનિકલ ખામીઓ વિશે પણ જણાવ્યું છે. તેમણે કહ્યું કે, કેટલાક ટેકનિકલ કારણોસર વિલંબ થઈ રહ્યો છે. સુનીતાએ તેની માતાને પૃથ્વી પર સુરક્ષિત પરત ફરવાની ખાતરી આપી છે. વિલિયમ્સે તેની માતા બોની પંડ્યાને કહ્યું કે, ચિંતા ન કરો અને તે સુરક્ષિત પરત ફરશે.
સુનિતાની માતાએ શું કહ્યું?
મીડિયા અહેવાલો અનુસાર સુનીતાની માતા બોની પંડ્યાએ કહ્યું કે, સુનીતાએ મને કહ્યું કે તેની ચિંતા ન કરો, બધું સારું થઈ જશે. જ્યારે તેમની પુત્રીના અંતરિક્ષમાં રહેવાના સમયગાળા વિશે પૂછવામાં આવ્યું ત્યારે બોનીએ કહ્યું કે, હું 20 વર્ષથી અવકાશયાત્રીની માતા છું અને આ તેમની ત્રીજી ઉડાન છે. કેટલીક સમસ્યાઓ હોઈ શકે છે, પરંતુ અમને નથી લાગતું કે કોઈ મોટી સમસ્યા છે. નાસાના અધિકારીઓ ફક્ત ખાતરી કરવા માંગે છે કે તેઓ પાછા ફરે ત્યારે તેઓ સુરક્ષિત છે. તેથી તેઓએ તેને વધુ સમય માટે ત્યાં રાખવાનો નિર્ણય કર્યો છે.
અંતરિક્ષમાં કોમ્યુનિકેશન કેવી રીતે થાય છે?
હવે સવાલ એ છે કે, અંતરિક્ષમાં કોઈ ટાવર નથી, કેબલ પણ નથી, તો પછી અવકાશયાત્રીઓ કેવી રીતે વાત કરે છે. તમને જણાવી દઈએ કે સ્પેસ કોમ્યુનિકેશન અને નેવિગેશન દ્વારા પૃથ્વી અને સ્પેસ વચ્ચે સંચાર થાય છે. વૈજ્ઞાનિકોના મતે, અંતરિક્ષમાં વાતચીત સરળ નથી, પરંતુ તેમ છતાં સ્પેસ એજન્સી નાસાએ તેમાં ઘણું કામ કર્યું છે અને હવે તે શક્ય છે.
સેટેલાઈટની મદદ કરાઈ છે કોમ્યુનિકેશન
ચંદ્ર પર હાજર રોવર હોય, ઇન્ટરનેશનલ સ્પેસ સ્ટેશન હોય કે આર્ટેમિસ મિશન, માત્ર નાસાનું સ્પેસ કોમ્યુનિકેશન એન્ડ નેવિગેશન જ તેમનો સંપર્ક કરવાનું કામ કરે છે. ડાયરેક્ટ-ટુ-અર્થ સેટેલાઈટ ઉપરાંત નાસા પાસે ઘણા રિલે સેટેલાઈટ પણ છે. ઉદાહરણ તરીકે સ્પેસ સ્ટેશન સાથે વાતચીત ટ્રેકિંગ અને ડેટા રિલે સેટેલાઇટ્સ (TDRS)ની મદદથી કરવામાં આવે છે. આ સેટેલાઈટ ન્યુ મેક્સિકો અને ગુઆમ સ્થિત ગ્રાઉન્ડ સેટેલાઇટને સિગ્નલ મોકલે છે. આ કામ માટે તેઓ ચંદ્રની આસપાસ ફરતા ભ્રમણકક્ષાની મદદ પણ લે છે જે મેસેજને ફોરવર્ડ કરે છે. પૃથ્વીની ઉપરના ત્રણ TDRS એવી ભ્રમણકક્ષામાં સેટ છે કે તેઓ સમગ્ર પૃથ્વીને આવરી લે છે અને તેમની સાથે દિવસના 24 કલાક અને અઠવાડિયાના સાતેય દિવસ વાતચીત કરી શકે છે.
