Knowledge: ફોનનું ચાર્જર અસલી કે નકલી? આ રીતે કરી લો ચેક

ઘણીવાર માર્કેટમાં આપણે કોઇ પ્રોડક્ટની ખરીદી કરીએ ત્યારે સવાલ એવો થાય કે આ અસલી હશે કે પછી નકલી. તેમાં પણ ખાસ કરીને મોબાઇલ એક્સેસરીઝમાં. જેમ કે શોપ પર કોઇ ચાર્જર ખરીદીએ તો તેની કિંમત વધારે જ્યારે વેબસાઇટ પર સસ્તામાં વેચાતું જોવા મળે છે. ત્યારે આવી સ્થિતિમાં ચાર્જર અસલી છે કે ફેક તે કેવી રીતે ચકાસશો, આવો જાણીએ.

શું છે આર નંબર ?

તમારી સાથે શેર કરીશું કે કેવી રીતે ઇલેક્ટ્રોનિક ઉપકરણને તેના 'આર-નંબર' દ્વારા ઓળખી શકાય છે કે તે અસલી છે કે નકલી. આર નંબર એ બ્યુરો ઓફ ઇન્ડિયન સ્ટાન્ડર્ડ એટલે કે BISનો નોંધણી નંબર છે. જે ભારતમાં બજારમાં પ્રવેશતા પહેલા ફરજિયાત નોંધણી યોજના હેઠળ ઈલેક્ટ્રોનિક્સ અને આઈટી ઉત્પાદનો માટે ફરજિયાત છે. ઇલેક્ટ્રોનિક સામાનના તમામ ઉત્પાદકોએ BIS માનક સાઇનનો ઉપયોગ કરવા માટે BIS નોંધણી મેળવવી આવશ્યક છે, જેની સાથે R-નંબર પણ હોય છે.

કયા ઇલેક્ટ્રોનિક ઉપકરણો BIS નોંધણી હેઠળ આવે ?

પ્રિન્ટર, માઇક્રોવેવ ઓવન, ટેલિવિઝન, ચાર્જર, સ્માર્ટ સ્પીકર, સ્માર્ટફોન વગેરે જેવા ઇલેક્ટ્રોનિક ઉપકરણો BIS ફરજિયાત નોંધણી હેઠળ આવે છે. હવે તમને જણાવીએ કે આર નંબરના ઉપયોગથી કેવી રીતે અસલી અને નકલી ઉત્પાદન વચ્ચે ભેદ પારખી શકાય.

કેવી રીતે જોવું કે તે વાસ્તવિક છે કે નકલી?

પગલું 1: તમારા સ્માર્ટફોન પર UMANG એપ ડાઉનલોડ કરો

પગલું 2: UMANG એપ પર તમારી પ્રોફાઇલ બનાવો અને બધી ડિટેઇલ્સ ભરો.

પગલું 3: UMANG એપના હોમ પેજ પર જાઓ અને 'BIS R નંબર વેરિફાઈડ' શોધો.

પગલું 4: CRS હેઠળ 'Verify R-no' પર ક્લિક કરો.

પગલું 5: હવે તમે તમારા ઇલેક્ટ્રોનિક ઉત્પાદનનો આર નંબર દાખલ કરો. જે સામાન્ય રીતે લેબલ પર લખેલો હોય છે. તેમાં ઉત્પાદનના ઉત્પાદક, તેની કિંમત વગેરે વિશેની વિગતો હોય છે.

સ્ટેપ 6: નંબર દાખલ કર્યા બાદ વેરિફાઈ પર ક્લિક કરશો એટલે આગળના પેજ પર ઉત્પાદકનું નામ, દેશ, બ્રાન્ડ વગેરે જેવી તમામ વિગતો જોવા મળશે.