ચીનનું એક અનોખું ઇન્શ્યોરન્સ પ્રોડક્ટ અચાનક વાયરલ થયું છે. વૂ નામની એક મહિલાને તેના મૂળ રોકાણ કરતા લગભગ 50 ગણા વધુ લાભ મળ્યો. તેમણે 2016માં માત્ર 199 યુઆનમાં લવ ઇન્શ્યોરન્સ નામની પૉલિસી ખરીદી હતી. લગભગ એક દાયકા બાદ આ પૉલિસી તેમને 10,000 યુઆનના નાણાકીય ફાયદામાં બદલાઈ ગઈ.
લવ ઇન્શ્યોરન્સ શું છે?
લવ ઇન્શ્યોરન્સ એક ટૂંકા સમય માટે રજૂ કરાયેલ પરંતુ ઘણી ચર્ચામાં રહેલું પ્રોડક્ટ હતું. 2015–16 દરમિયાન કેટલીક ચીની ઇન્શ્યોરન્સ કંપનીઓએ તેને રજૂ કર્યું હતું. આ પૉલિસી હેલ્થ, લાઇફ કે પ્રોપર્ટી કવર કરવા માટે નહોતી, પરંતુ રોમેન્ટિક સંબંધો માટે બનાવવામાં આવી હતી. ખાસ કરીને કોલેજ વિદ્યાર્થીઓ અને યુવા કપલ્સને ધ્યાનમાં રાખીને તેને વેચવામાં આવતી હતી. આ પરંપરાગત ઇન્શ્યોરન્સ કરતાં વધુ રિલેશનશિપ આધારિત શરતો પર કામ કરતી હતી. આ ઇન્શ્યોરન્સ પાછળનો વિચાર બહુ સરળ હતોજો કોઈ કપલ લાંબા સમય સુધી સાથે રહે અને અંતે લગ્ન કરે, તો તેમને નાણાકીય લાભ મળશે. પરંતુ જો બંને અલગ થઈ જાય, તો ઇન્શ્યોરન્સ કંપની કોઈ પણ ચુકવણી કરતી નહોતી.
પૉલિસી પાછળની મુખ્ય શરત
આ પૉલિસી સાથે એક ખાસ નિયમ જોડાયેલો હતો. ઇન્શ્યોર્ડ વ્યક્તિએ પૉલિસીમાં દર્શાવેલા એ જ પાર્ટનર સાથે નિશ્ચિત સમયમર્યાદા અંદર લગ્ન કરવા ફરજિયાત હતા. આ મુજબ, લગ્ન પૉલિસી ખરીદ્યા બાદ 3 વર્ષ પહેલાં નહીં અને 10 વર્ષ પછી નહીં થવા જોઈએ. ફક્ત આ સમયગાળામાં થયેલા રજિસ્ટર્ડ લગ્નને જ ચુકવણી માટે માન્ય ગણવામાં આવતા હતા.
વિજેતાઓને શું મળતું હતું?
જે કપલ્સ આ શરતો પૂર્ણ કરતા હતા, તેઓ અનેક ઇનામ વિકલ્પોમાંથી પસંદગી કરી શકતા હતા. તેમાં 10,000 ગુલાબ, 0.5 કેરેટની હીરાની અંગૂઠી, અથવા લગભગ 10,000 યુઆનનું સીધું કેશ પેમેન્ટ સામેલ હતું. આ ઇનામો ભાવનાત્મક તેમજ ભૌતિક રીતે આકર્ષક બનાવવામાં આવ્યા હતા.
આવો પ્રોડક્ટ કેમ લાવવામાં આવ્યો હતો?
કંપનીના દૃષ્ટિકોણથી જોવામાં આવે તો આ એક ગણતરી કરેલો જોખમ હતો. કંપનીના આંતરિક ડેટા અનુસાર, 98%થી વધુ કોલેજ સંબંધો 3 વર્ષમાં તૂટી જાય છે. એટલે મોટા ભાગના કેસમાં ઇન્શ્યોરન્સ કંપનીઓ પ્રીમિયમ તો વસૂલ કરી લેતી હતી, પરંતુ ચુકવણી કરવાની ફરજ પડતી નહોતી. બહુ ઓછા કપલ્સ જ એટલા લાંબા સમય સુધી સાથે રહેતા કે પાત્ર બનતા.
આ પ્રોડક્ટ પર બેન કેમ લાગ્યો?
ચીની નિયમનકારી સંસ્થાઓને આ વિચાર પસંદ આવ્યો નહોતો. 2017થી 2018 વચ્ચે સરકારે લવ ઇન્શ્યોરન્સ પ્રોડક્ટ્સ પર પ્રતિબંધ મૂકી દીધો. સરકારનું માનવું હતું કે આ સાચી ઇન્શ્યોરન્સ સ્કીમ નહોતી. અધિકારીઓના જણાવ્યા અનુસાર, આવી પૉલિસીઓ જોખમ કવર કરતા વધુ જુગાર અને માર્કેટિંગ યુક્તિઓ જેવી હતી.
આ પણ વાંચો- Americaના ટેક્સાસ રાજ્યનો મોટો નિર્ણય, H-1B વિઝા પર પ્રતિબંધ, જાણો ભારતીયો પર શું થશે તેની અસર!
