શિયાળામાં ગાજર કે મગની દાળનો નહીં, પણ ચાખો આ ટેસ્ટી હલવો

• વટાણાનો હલવો હેલ્થ માટે રહેશે બેસ્ટ
  
• ફ્રોઝન વટાણાની મદદથી પણ બનાવી શકાશે હલવો
• સરળ સ્ટેપ્સમાં બની જશે આ સ્વીટ ડિશ

શિયાળામાં વટાણા ભરપૂર પ્રમાણમાં માર્કેટમાં જોવા મળે છે. આ સાથે જ ગાજર પણ જોવા મળે છે. આ બંને ચીજો દરેક ઘરમાં શિયાળામાં સરળતાથી મળી જાય છે. શિયાળામાં મગની દાળ, ગાજરનો હલવો તો તમે સૌએ ખાધો હશે પણ શું તમે ક્યારેય વટાણાનો હલવો ચાખ્યો છે. જો તમે અત્યાર સુધી ક્યારેય તેને ટ્રાય કર્યો નથી તો તમે તેને હવે ઘરે જ સરળતાથી બનાવી શકો છો. તેનો સ્વાદ તમને પસંદ આવશે અને સાથે જ તમને નવી ડિશ ટ્રાય કરવાનો અવસર પણ મળશે. તો જાણો કઈ રીતે આ ટેસ્ટી અને હેલ્ધી હલવો ઘરે બનાવી શકાય છે.

સામગ્રી

• 3 કપ વટાણા
• 1/2 લીટર દૂધ
• 1/2 કપ માવો
• 2 ટેબલસ્પૂન ડ્રાય ફ્રૂટ્સ
• 1 ટી સ્પૂન પિસ્તાની કતરણ
• 1/2 ટીસ્પૂન એલચી પાવડર
• 1/2 ચપટી કેસરના તાંતણા
• 3 ટેબલ સ્પૂન ઘી
• 3 ટીસ્પૂન નારિયેળનું છીણ
• ખાંડ સ્વાદ અનુસાર

બનાવવાની રીત

વટાણાનો હલવો બનાવવા માટે સૌથી પહેલા વટાણાને ધોઈને તેને સારી રીતે સાફ કરી લો, તેને માટે તમે ફ્રોઝન વટાણાનો પણ ઉપયોગ કરી શકો છો. ફ્રેશ વટાણાનો હલવો સારો સ્વાદ આપે છે. વટાણાના દાણાને મિક્સરમાં નાંખો અને તેમાં 2-3 ટીસ્પૂન દૂધ મિક્સ કરીને કકરું પીસી લો. ધ્યાન રાખો કે તેની લીસી પેસ્ટ ન બને. આ પછી એક કડાહી ગરમ કરવા મૂકો અને તેમાં દૂધ અને વટાણાનું મિશ્રણ ઉમેરો. તેને ધીમા ગેસ પર શેકો. હવે 1 મિનિટ સુધી હલાવતા રહો. તેમાં દેશી ઘી ઉમેરો અને પછી સતત હલાવો. વટાણાનું પાણી સૂકાઈ જાય ત્યારે તેમાં નારિયેળનું છીણ, ડ્રાયફ્રૂટ્સ મિક્સ કરો. થોડા સમય બાદ તેમાં માવા અને સ્વાદઅનુસાર ખાંડ મિક્સ કરો. હલવામાં કેસરના તાંતણા અને એલચી પાવડર મિક્સ કરો અને હલાવતા રહો. આ હલવો મસ્ત સુગંધ આપે છે અને સાથે તે ચઢી જાય ત્યારે ગેસ બંધ કરો. સ્વાદથી ભરપૂર હલવો બનીને તૈયાર છે. તેને ડ્રાય ફ્રૂટ્સથી ગાર્નિશ કરીને સર્વ કરો.