અમદાવાદ શહેરમાં ઉત્તરાયણ પર્વ દરમિયાન પતંગની ઘાતક દોરી અને તેને લગતા અકસ્માતોમાં કુલ 42 લોકો ગંભીર રીતે ઘાયલ થયા છે. શહેરની વિવિધ હોસ્પિટલોમાં ઇમરજન્સી ઓપીડી (OPD) માં દર્દીઓનો ધસારો જોવા મળ્યો હતો. અત્યાર સુધીના આંકડા મુજબ, 7 દર્દીઓને હોસ્પિટલમાં દાખલ કરીને સઘન સારવાર આપવામાં આવી રહી છે, જ્યારે પ્રાથમિક સારવાર બાદ 17 દર્દીઓને રજા (Discharge) આપી દેવામાં આવી છે. હાલમાં 5 દર્દીઓ હોસ્પિટલમાં નિષ્ણાત તબીબોની દેખરેખ હેઠળ છે, જેમાંથી 2 દર્દીઓની હાલત અત્યંત નાજુક હોવાથી તેમને વેન્ટિલેટર સપોર્ટ પર રાખવામાં આવ્યા છે.
ખુશીઓ વચ્ચે માતમ
પતંગબાજીની મજા વચ્ચે સર્જાયેલા અકસ્માતોમાં અન્ય પણ માઠા સમાચાર સામે આવ્યા છે. ઉત્તરાયણના દિવસે થયેલા કુલ 50 અકસ્માત કેસો પૈકી એક વ્યક્તિનું કરુણ મોત નીપજ્યું છે, જેના કારણે શોકની લાગણી પ્રસરી ગઈ છે. મોટાભાગના કેસોમાં વાહનચાલકોના ગળા અને ચહેરાના ભાગે પતંગની તીક્ષ્ણ દોરી વાગવાથી ઊંડા ઘા પડ્યા હોવાનું સામે આવ્યું છે. તબીબોની ટીમ દિવસ-રાત કાર્યરત છે અને ગંભીર દર્દીઓને બચાવવા માટે સતત પ્રયત્નો કરી રહી છે. પોલીસ અને તંત્ર દ્વારા નાગરિકોને વાહન ચલાવતી વખતે સેફ્ટી ગાર્ડ અથવા મફલરનો ઉપયોગ કરવા વારંવાર અપીલ કરવામાં આવી રહી છે.