આપણા રસોડામાં રહેલો દરેક મસાલો કોઈને કોઈ ગુણ ધરાવે છે, પરંતુ 'વરિયાળી' એક એવું અદ્ભુત તત્વ છે જે માત્ર સ્વાદ જ નહીં, પણ સ્વાસ્થ્યનો પણ ખજાનો છે. ખાસ કરીને ઉનાળાની ઋતુમાં વરિયાળીનું સેવન શરીરમાં ઠંડક જાળવી રાખવા માટે ખૂબ જ લાભદાયી માનવામાં આવે છે. તેમાં રહેલા પોષક તત્વોની વાત કરીએ તો, પ્રોટીન, ફાઇબર, કેલ્શિયમ, મેગ્નેશિયમ, પોટેશિયમ અને વિવિધ વિટામિન્સ જેવા કે વિટામિન-સી અને એ (બીટા-કેરોટીન) થી ભરપૂર છે.
સ્વાસ્થ્ય સમસ્યાઓમાં વરિયાળીના ઉપાયો:
માસિક દરમિયાન થતી પીડામાં રાહત
ઘણી સ્ત્રીઓને માસિક સ્રાવ દરમિયાન તીવ્ર ખેંચાણ અને પાચન સંબંધી તકલીફોનો સામનો કરવો પડે છે. આવા સમયે વરિયાળીનું પાણી એક રામબાણ ઈલાજ છે. એક ગ્લાસ પાણીમાં એક ચમચી વરિયાળી ઉકાળી, તેને ગાળી લો. ત્યારબાદ તેમાં એક ચમચી મધ ઉમેરીને હૂંફાળું પીવાથી દુખાવામાં ઘણી રાહત મળે છે.
ગેસ અને એસિડિટીમાંથી મુક્તિ
આજના અનિયમિત જીવનમાં ગેસ અને એસિડિટી સામાન્ય સમસ્યાઓ છે. જમ્યા પછી અડધી ચમચી વરિયાળી ચાવવાથી પાચક ઉત્સેચકો (Digestive Enzymes) સક્રિય થાય છે, જે ખોરાકને પચાવવામાં મદદ કરે છે અને પેટનું ફૂલવું અટકાવે છે. એસિડિટીની ગંભીર સમસ્યા હોય તો વરિયાળીનું પાણી પીવું જોઈએ.
શ્વાસની દુર્ગંધ દૂર કરવા
જો તમે શ્વાસની દુર્ગંધથી પરેશાન હોવ, તો વરિયાળી તમારા માટે કુદરતી માઉથ ફ્રેશનર તરીકે કામ કરે છે. તેમાં રહેલા એન્ટીબેક્ટેરિયલ ગુણધર્મો મોઢામાં રહેલા બેક્ટેરિયાનો નાશ કરે છે અને શ્વાસને તાજગી આપે છે. દિવસમાં બે-ત્રણ વાર વરિયાળી ચાવવાથી પાચનતંત્ર પણ સુધરે છે.
ઉનાળામાં ઠંડક અને ડિહાઇડ્રેશન
ઉનાળામાં ગરમીને કારણે શરીરનું તાપમાન વધી જાય છે અને ડિહાઇડ્રેશનની શક્યતા રહે છે. વરિયાળીની તાસીર ઠંડી હોવાથી તે શરીરમાં શાંતિ આપે છે. તમે વરિયાળીનું શરબત બનાવીને અથવા તેને ચા તરીકે ઉપયોગમાં લઈ શકો છો.
આ પણ વાંચોઃ Clock Hands Movement: ઘડિયાળના કાંટા હંમેશા એક જ દિશામાં કેમ ફરે છે? જાણો તેના ફરવા પાછળનું રહસ્ય
