કપડાં ધોવા માટે આપણને દરરોજ સાબુ કે ડિટર્જન્ટની જરૂર પડે છે, પરંતુ શું તમે જાણો છો કે બજારમાંથી મોંઘા સાબુ ખરીદવાને બદલે તમે ઘરે જ ખૂબ જ સરળતાથી અને ઓછા ખર્ચે કપડાં ધોવાનો સાબુ બનાવી શકો છો? આ માટે તમારે કોઈ જટિલ સામગ્રીની પણ જરૂર પડતી નથી. યુટ્યુબ ચેનલ 'અમ્માઝ કિચન' દ્વારા ઘરે જ સાબુ બનાવવાની એક અત્યંત આસાન અને અસરકારક પદ્ધતિ દર્શાવવામાં આવી છે, જેનો ઉપયોગ કરીને તમે એક સાથે અનેક સાબુ બનાવી શકો છો.
ઘરે કપડાં ધોવાનો સાબુ બનાવવા માટે નીચે મુજબની સામગ્રીની જરૂર પડશે:
વપરાયેલું તેલ (તળવામાં વપરાયેલું તેલ પણ ચાલે)
1 કિલો કોસ્ટિક સોડા
250 ગ્રામ વોશિંગ સોડા (સોડિયમ કાર્બોનેટ)
250 ગ્રામ ડિટર્જન્ટ પાવડર
500 ગ્રામ ઘઉંનો લોટ
4 લિટર પાણી અને ઈચ્છા અનુસાર રંગ (ઓપ્શનલ)
1. કોસ્ટિક સોડાનું મિશ્રણ: સૌપ્રથમ એક મોટા અને મજબૂત વાસણમાં લગભગ ૪ લિટર પાણી લો. તેમાં ૧ કિલો કોસ્ટિક સોડા ધીમે-ધીમે ઉમેરો. કોસ્ટિક સોડા ત્વચાને નુકસાન પહોંચાડી શકે છે, તેથી હાથનો સીધો સંપર્ક ટાળવો અને તેને લાકડી વડે જ હલાવવું. આ મિશ્રણને ઢાંકીને ૨૪ કલાક માટે એમ જ રહેવા દો.
2. બીજા દિવસે તેલ અને સામગ્રીનું મિશ્રણ: ૨૪ કલાક પછી એક અલગ કન્ટેનરમાં વપરાયેલું તેલ લો. તેમાં ૨૫૦ ગ્રામ વોશિંગ સોડા, ૨૫૦ ગ્રામ ડિટર્જન્ટ પાવડર અને ૫૦૦ ગ્રામ ઘઉંનો લોટ એક પછી એક ઉમેરતા જાઓ. મિશ્રણમાં ગઠ્ઠા ન પડે તે માટે તેને સતત હલાવતા રહેવું.
3. બંને મિશ્રણનું એકીકરણ: હવે આ તૈયાર કરેલા તેલ અને લોટના મિશ્રણને અગાઉથી તૈયાર રાખેલા કોસ્ટિક સોડાના પાણીમાં રેડી દો. તેને લાકડાની જાડી લાકડીથી સારી રીતે મિક્સ કરીને સતત હલાવતા રહો. જો તમે ઇચ્છો તો આ સમયે તમારો મનપસંદ રંગ પણ ઉમેરી શકો છો.
4. સેટ કરવું અને કાપવું: થોડી વાર સતત હલાવ્યા બાદ મિશ્રણ જાડું થવા લાગશે. ત્યારબાદ તેને ૫ થી ૬ કલાક માટે સેટ થવા માટે મૂકી દો. જ્યારે મિશ્રણ સંપૂર્ણપણે કડક અને સેટ થઈ જાય, ત્યારે તેને વાસણમાંથી બહાર કાઢીને સાબુના આકારના નાના-નાના ટુકડા કરી લો.
કોસ્ટિક સોડાનો ઉપયોગ કરતી વખતે ગ્લોવ્સ પહેરવા અને સુરક્ષાનું ખાસ ધ્યાન રાખવું જરૂરી છે. તમારો હોમમેઇડ કપડાં ધોવાનો સાબુ હવે વાપરવા માટે બિલકુલ તૈયાર છે.