અમેરિકી પ્રમુખ ડોનાલ્ડ ટ્રમ્પ દ્વારા જાહેર કરવામાં આવેલો 'ઊર્જા યુદ્ધવિરામ' સંપૂર્ણપણે નિષ્ફળ સાબિત થયો છે. ટ્રમ્પે 11 ઓક્ટોબર, 2026 ના રોજ સોશિયલ મીડિયા પર જાહેરાત કરી હતી કે રશિયા અને યુક્રેન એકબીજાના ઊર્જા સ્થાપનો પર હુમલા રોકવા સંમત થયા છે. પરંતુ, રશિયાએ કિવ અને અન્ય વિસ્તારોમાં સતત મિસાઇલ અને ડ્રોન હુમલા ચાલુ રાખતાં, યુક્રેનના રાષ્ટ્રપતિ વ્લાદીમીર ઝેલેન્સકીએ રશિયન તેલ રિફાઇનરીઓ પર ફરીથી હુમલા શરૂ કરવાની સ્પષ્ટ જાહેરાત કરી દીધી છે.
રશિયાનો દગાબાજી અને ભયાનક વિનાશ
ઝેલેન્સકીએ એક ઇન્ટરવ્યુમાં ખુલાસો કર્યો હતો કે ટ્રમ્પની અપીલ બાદ યુક્રેને બે-ત્રણ દિવસ માટે રશિયન રિફાઇનરીઓ પરના હુમલા અટકાવ્યા હતા. જોકે, રશિયાએ આ તકનો ગેરફાયદો ઉઠાવીને 14 ઓક્ટોબરની રાત્રે 39 બેલિસ્ટિક મિસાઇલો અને 120 થી વધુ ડ્રોન વડે કિવ અને ખાર્કિવના પાવર પ્લાન્ટ્સ અને ગેસ સુવિધાઓ પર હુમલા કર્યા હતા. આ હુમલાઓમાં 26 ઊર્જા સુવિધાઓ અને ચાર તેલ-ગેસ સ્થાપનો નુકસાન પામ્યા હતા, જેના કારણે 6,00,000 થી વધુ લોકો અંધારામાં જીવવા મજબૂર બન્યા છે.
રશિયન તેલ ક્ષેત્ર પર યુક્રેનનો ત્રાટક
આંતરરાષ્ટ્રીય ઊર્જા એજન્સીના અહેવાલો દર્શાવે છે કે ૨૦૨૬માં યુક્રેનના લાંબા અંતરના ડ્રોન હુમલાઓએ રશિયાની અડધી રિફાઇનિંગ ક્ષમતાને પ્રભાવિત કરી છે અને તેના ડીઝલ ઉત્પાદનમાં 30 ટકાનો ઘટાડો કર્યો છે. રશિયામાં હાલમાં ઇંધણની ભારે અછત અને ભાવવધારો જોવા મળી રહ્યો છે. ઝેલેન્સકીએ સ્પષ્ટ કર્યું છે કે જો રશિયા યુક્રેનની ઊર્જા પ્રણાલીને નુકસાન પહોંચાડવાનું બંધ કરશે, તો જ કિવ હુમલા અટકાવશે. તેમણે સ્પષ્ટ કર્યું કે તેઓ કોઈ એકપક્ષીય છૂટછાટ આપશે નહીં અને યુએસ પાસે પેટ્રિઅટ મિસાઇલ સિસ્ટમ્સની માંગ કરી છે.
ટ્રમ્પના પ્રભાવ પર સવાલો
ટ્રમ્પે યુએસમાં ઇંધણના ભાવ ઘટાડવા રશિયન ડીઝલ આયાત પરના નિયંત્રણો હળવા કર્યા હતા અને કિવ પર હુમલા રોકવા દબાણ બનાવ્યું હતું. પરંતુ, મોસ્કોએ આ વચન પાળ્યું નહીં. આ ઘટનાક્રમ દર્શાવે છે કે વોશિંગ્ટનના ભારે દબાણ છતાં યુક્રેન પોતાની વ્યૂહાત્મક સ્વાયત્તતા જાળવી રાખવા કટિબદ્ધ છે. બંને પક્ષો વાસ્તવિક રીતે સંમત ન થાય ત્યાં સુધી આવી એકપક્ષીય યુદ્ધવિરામની ઘોષણાઓ બિનઅસરકારક જ રહે છે.
આ પણ વાંચોઃ Happiness: ખુશી માટે કંઇ પણ, આ રાજ્ય લોકોની ખુશી વધારવા બનાવી રહ્યો છે ખાસ 'હેપ્પીનેસ વિભાગ'
