ચોમાસાની ઋતુ ગરમીથી રાહત તો અપાવે છે, પરંતુ તે પોતાની સાથે હવામાં ભારે ભેજ (Humidity) પણ લાવે છે. આ ઋતુમાં જેમની ત્વચા તૈલી (Oily Skin) હોય છે, તેમની મુશ્કેલીઓ ઘણી વધી જાય છે. વરસાદની ઋતુમાં પરસેવો અને વાતાવરણની ગંદકી ત્વચા પરના કુદરતી તેલ સાથે ભળી જાય છે, જેના કારણે ચહેરો વધુ ચીકણો, કાળો અને બેજાન દેખાવા લાગે છે. જો તમે પણ આ ચોમાસામાં તૈલી ત્વચા અને પિમ્પલ્સ જેવી સમસ્યાઓનો સામનો કરી રહ્યા છો, તો કેટલાક સરળ અને અસરકારક ઘરેલું ઉપાયો તમારા ચહેરા પર કુદરતી ચમક પાછી લાવી શકે છે.
વરસાદી સિઝનમાં તૈલી ત્વચા માટેના ઘરેલુ ઉપાય
1. મુલતાની માટી અને ગુલાબજળનો ફેસપેક: તૈલી ત્વચા માટે મુલતાની માટી આશીર્વાદ સમાન માનવામાં આવે છે. બ્યુટી નિષ્ણાતોના મતે, મુલતાની માટી ત્વચાના રોમછિદ્રોમાં ભરાયેલા વધારાના તેલ અને ગંદકીને સરળતાથી શોષી લે છે. મુલતાની માટીના પાવડરમાં જરૂર મુજબ ગુલાબજળ મિક્સ કરીને પેસ્ટ બનાવી લો. આ પેસ્ટને ચહેરા પર લગાવો અને સુકાઈ ગયા બાદ ધોઈ લો.
2. ચંદન પાવડર અને કાચું દૂધ : ચંદન ત્વચાને ઠંડક આપવાની સાથે વધારાના તેલને નિયંત્રિત કરવામાં અને ત્વચાને કુદરતી ગ્લો આપવામાં મદદ કરે છે. બે ચમચી કાચા દૂધમાં ચંદન પાવડર મિક્સ કરીને સ્મૂધ પેસ્ટ બનાવો. તેને ચહેરા પર લગાવીને ૧૦ મિનિટ સુધી રહેવા દો અને પછી સામાન્ય પાણીથી ચહેરો ધોઈ લો.
3. ચણાનો લોટ, હળદર અને દહીંનો અકસીર નુસખો : ચણાના લોટમાં ત્વચામાંથી તેલ શોષી લેવાની અદ્ભુત ક્ષમતા હોય છે. આ દેશી ફેસપેક માત્ર ઓઇલ કંટ્રોલ નથી કરતો, પરંતુ ચહેરાના કાળા ડાઘ-ધબ્બા પણ દૂર કરે છે. એક બાઉલમાં ત્રણ ચમચી ચણાનો લોટ, એક ચપટી હળદર અને ત્રણ ચમચી દહીં સરસ રીતે મિક્સ કરી લો. આ પેસ્ટને ચહેરા પર લગાવી સુકાવા દો અને પછી હળવા હાથે મસાજ કરીને ધોઈ લો.
4. એલોવેરા જેલ : એલોવેરા એક એવો ઓલરાઉન્ડર છોડ છે જે ત્વચા, વાળ અને એકંદર સ્વાસ્થ્ય માટે ઉત્તમ માનવામાં આવે છે. તેમાં રહેલા મોઇશ્ચરાઇઝિંગ ગુણો ત્વચાને તેલ મુક્ત રાખીને અંદરથી હીલ કરે છે. ઉપયોગ કરવાની રીત: સવારે સ્નાન કરવાના ૧૦ મિનિટ પહેલાં ચહેરા પર ફ્રેશ એલોવેરા જેલ લગાવો. જ્યારે જેલ સુકાઈ જાય ત્યારે સાદા પાણીથી ચહેરો સાફ કરી લો.
કેમ ચોમાસામાં ત્વચા વધુ તૈલી થાય છે
ચોમાસાની ઋતુમાં હવામાં ભેજનું પ્રમાણ (Humidity) ખૂબ જ વધી જાય છે. આ અતિશય ભેજ અને ગરમીના કારણે આપણી ત્વચાની અંદર આવેલી સીબુમ ઉત્પન્ન કરતી ‘સેબેસીયસ ગ્રંથીઓ’ (Sebaceous glands) વધુ પડતી સક્રિય થઈ જાય છે. પરિણામે, તે સામાન્ય કરતાં વધુ પ્રમાણમાં સીબુમ એટલે કે કુદરતી તેલનું ઉત્પાદન કરવા લાગે છે. વરસાદની ઋતુમાં થતો પરસેવો અને વાતાવરણમાં રહેલી ગંદકી તેમજ પ્રદૂષણ આ તેલ સાથે ભળી જાય છે, જેના લીધે ત્વચા વધારે ચીકણી, તૈલી અને બેજાન દેખાવા લાગે છે. આ જ કારણ છે કે ચોમાસામાં તૈલી ત્વચા ધરાવતા લોકોને પિમ્પલ્સ અને ચીકાશની સમસ્યા વધુ પરેશાન કરે છે.
આ પણ વાંચો : Health Tips:બહારના ખાવાએ બગાડી તબિયત,પછી હરિયાણાની પૂજાએ માત્ર 15 દિવસ રોજ ખાધું દહીં...અને બદલાઈ ગઈ જિંદગી!
(Disclaimer: આ માહિતી વાચકોને વધારે વિગતો પુરી પાડવા માટે છે અને આ સંદર્ભમાં વધારે જાણકારી મેળવવા માટે આપ તજજ્ઞોનો સંપર્ક સાધી શકશો. )
