આજના સમયમાં વજન ઘટાડવું એ એક મોટો પડકાર બની ગયો છે. મોટાભાગના લોકો વજન ઓછું કરવા માટે વિવિધ પ્રકારના પ્રયોગો કરતા હોય છે. ખાસ કરીને લોકોમાં એવો વ્યાપક ભ્રમ જોવા મળે છે કે જો રાત્રિભોજન (Dinner) સંપૂર્ણપણે છોડી દેવામાં આવે, તો શરીરને ઓછી કેલરી કે ઉર્જા મળશે અને વજન ખૂબ જ ઝડપથી ઘટવા લાગશે. પરંતુ, શું માત્ર રાત્રિભોજન છોડવાથી જ વજન ઘટે છે? વાસ્તવિકતા આ માન્યતાથી થોડી અલગ છે. નિષ્ણાતોના મતે માત્ર રાત્રિભોજન છોડવાથી વજન ઘટશે જ તેવું ચોક્કસપણે કહી શકાતું નથી.
રાત્રિભોજન છોડવું શું યોગ્ય છે?
જો રાત્રિભોજન ન કરવાથી દિવસભર કુલ કેલરી અથવા ઊર્જાનો વપરાશ ઘટે છે, તો વજનમાં ઘટાડો થઈ શકે છે. પરંતુ રાત્રિભોજન છોડવું એ વજન ઘટાડવાનો કોઈ સચોટ કે સુરક્ષિત રસ્તો નથી. ઘણીવાર જે લોકો રાત્રે જમવાનું ટાળે છે તેમને મોડી રાત્રે અચાનક તીવ્ર ભૂખ લાગે છે, જેના કારણે તેઓ વધુ પડતું ખાઈ લે છે. આનાથી દિવસભરનું ઊર્જા સેવન વધારવાનું જોખમ ઊભું થાય છે.
સંતુલિત આહાર અને યોગ્ય સમયનું મહત્વ
વજન ઘટાડવા માટે રાત્રિભોજન સંપૂર્ણપણે બંધ કરવું જરૂરી નથી. તેના બદલે રાત્રિનું ભોજન હળવું અને પૌષ્ટિક હોવું જોઈએ, જેમાં શાકભાજી, દાળ, પનીર, ઈંડા કે અન્ય પ્રોટીનયુક્ત આહારનો સમાવેશ કરી શકાય છે. આ ઉપરાંત વ્યક્તિ પોતાની જરૂરિયાત મુજબ રોટલી કે ભાત પણ યોગ્ય માત્રામાં ખાઈ શકે છે. ડૉ. પ્રત્યાક્ષા ભારદ્વાલના મતે, વજન નિયંત્રણમાં સૌથી મહત્વપૂર્ણ બાબત એ છે કે તમે દિવસ દરમિયાન કેવો અને કેટલો આહાર લો છો. તળેલા, વધુ ગળ્યા કે હેવી ફાસ્ટ ફૂડનું સેવન મર્યાદિત કરવું ખૂબ જ જરૂરી છે.
આદતોમાં કરો જરૂરી ફેરફાર
મોડી રાત્રે ખાવાની આદત વજન વધારવામાં મોટો ભાગ ભજવે છે, તેથી મોડી રાત્રે જમવાનું ટાળવું ફાયદાકારક સાબિત થઈ શકે છે. વજન ઘટાડવાની આખી પ્રક્રિયા માત્ર ખોરાક પૂરતી સીમિત નથી, પરંતુ તેમાં પૂરતી ઊંઘ, નિયમિત શારીરિક પ્રવૃત્તિ અને સંતુલિત દૈનિક જીવનશૈલીનો પણ સમાવેશ થાય છે. જો તમે દિવસ દરમિયાન પૂરતો અને સંતુલિત આહાર લેતા હો, તો માત્ર વજન ઘટાડવા માટે રાત્રિભોજન છોડી દેવાની કોઈ જરૂર રહેતી નથી. જોકે, જે લોકોને મોડી રાત્રે ખાવાની ટેવ હોય તેમણે ભોજનના સમય અને માત્રામાં યોગ્ય બદલાવ કરવો જોઈએ.
આ પણ વાંચોઃ CJPના વિરોધ પ્રદર્શન પર UNની ટિપ્પણીથી ભારત નારાજ, બેવડા ધોરણોનો આરોપ
