- પાલક આયર્નનો ભરપૂર સોર્સ છે
- દહીંથી બનાવેલી કઢી પણ આપે છે ખાસ ટેસ્ટ
- લંચ કે ડિનરની મજા વધારે છે પાલકની કઢી
શિયાળાની ઋતુમાં બપોરના ભોજનમાં ગરમ કઢીનો સ્વાદ ખૂબ જ સરસ લાગે છે. રોટલી હોય કે ખીચડી, કઢીનો સ્વાદ તેની સાથે સારી રીતે ભળી જાય છે. ખાટી મીઠી કઢીને બનાવવાનું સરળ છે. શિયાળામાં રોટલા સાથે કઢીનો સ્વાદ દરેક લોકોને પસંદ આવતો હોય છે. જો તમે એકની એક કઢીથી કંટાળ્યા છો તો તમે એકવાર આયર્નથી ભરપૂર પાલકની કઢી બનાવીને ટ્રાય કરો. તેનો ટેસ્ટ તમારા ભોજનની મજા તો વધારશે સાથે સાથે પાલક તમારી હેલ્થને પણ સારી રાખશે. તો રાહ કોની જુઓ છો, આજની રસોઈમાં ટ્રાય કરી લો આ પાલક કઢીનો સ્વાદ.
પાલક કઢી
સામગ્રી
- 500 ગ્રામ ખાટું દહીં
- 1/2 કપ ચણાનો લોટ
- 1/4 ચમચી લાલ મરચું પાવડર
- 1/4 ચમચી હળદર પાવડર
- સ્વાદ મુજબ મીઠું
- જરૂરિયાત મુજબ પાણી
- 100 ગ્રામ પાલક
વઘાર માટે
- 2 ચમચી તેલ
- 1 ટીસ્પૂન રાઈ
- એક ચપટી હીંગ
- 2 સૂકા લાલ મરચા
- 1 ચમચી મેથીના દાણા
- 4-5 લીમડાના પાન
- જરૂરિયાત મુજબ તેલ
પાલકની કઢી બનાવવાની રીત
પાલકની કઢી બનાવવા માટે સૌ પ્રથમ કઢીનું બેટર તૈયાર કરો. આના માટે તમે બજારમાંથી છાશ ખરીદી શકો છો, નહીં તો તમે દહીંને ફેંટીને પણ છાશ તૈયાર કરી શકો છો. સૌ પ્રથમ દહીંને સારી રીતે વલોવીને બેટર બનાવો, જો તે ઘટ્ટ લાગે તો તેમાં 1 કપ પાણી ઉમેરો. બરાબર ફેંટ્યા પછી તેમાં ચણાનો લોટ, 1/4 ચમચી લાલ મરચું પાવડર, 1/4 ચમચી હળદર પાવડર, સ્વાદ મુજબ મીઠું ઉમેરીને બરાબર મિક્સ કરી લો. હવે તેને બાજુ પર રાખો.
વઘાર કરો તૈયાર પાલક ઉમેરો
કઢીનું બેટર બનાવ્યા પછી પાલકને સારી રીતે ધોઈ લો અને તેને બારીક સમારી લો. આદુ, લીલા મરચા અને લસણને પણ બારીક સમારી લો. હવે તવાને ગેસ પર મૂકો અને તેમાં તેલ ઉમેરો અને તેને ગરમ કરો. તેલ ગરમ થાય એટલે તેમાં હિંગ, રાઈ, સૂકું લાલ મરચું, મેથી અને જીરું નાંખીને શેકો. આ પછી તેમાં આદુ, લીલા મરચા અને લસણ નાખીને સાંતળો. જ્યારે તે શેકાઈ જાય ત્યારે તેમાં સમારેલી પાલક નિચોવીને મિક્સ કરો. ચમચી વડે હલાવતા સમયે તેને સારી રીતે ફ્રાય કરો. 5 મિનિટ પછી ઉપર કઢીનું મિશ્રણ રેડવું અને મિક્સ કરો.
કઢીને સતત હલાવતા રહો
પાલક ઉમેર્યા પછી કઢીને હલાવતા રહો. જ્યારે તમને લાગે કે કઢી સારી રીતે ઉકળવા લાગી છે, તો કઢીને ધીમી અને મધ્યમ આંચ પર રાંધવા માટે રાખી દો. 20 મિનિટ પછી તમારી કઢી સારી રીતે તૈયાર થઈ જશે. ખીચડી, રોટલા કે રોટલી સાથે તમે તેનો સ્વાદ સરળતાથી માણી શકો છો.
