શિયાળામાં બનાવો ટેસ્ટી અને હેલ્ધી મકાઈના લોટની ઈડલી, ભાવશે બધાને

• રોજિંદી ઈડલીને સીઝનલ ટ્વિસ્ટ આપો
  
• મકાઈના લોટની ઈડલીને ચટણી સાથે માણો
• ગરમાગરમ ઈડલી બનશે બ્રેકફાસ્ટનો બેસ્ટ સોર્સ

સામાન્ય રીતે ખીરાથી બનતી ઈડલીનો સ્વાદ દરેકને પસંદ આવે છે. સાઉથ ઇન્ડિયન ડિશ લગભગ દરેક રેસ્ટોરન્ટમાં સરળતાથી મળી રહે છે. પરંતુ જો તમે આ ઈડલીથી કંટાળ્યા હોવ તો તમે શિયાળામાં મકાઈના લોટની મદદથી પણ હેલ્ધી ઈડલી બનાવી શકો છો. શિયાળામાં રોજિંદી અનેક વાનગીઓને તમે સીઝનલ ટ્વિસ્ટ આપી શકો છો. તો આ સીઝનમાં દાળ અને ચોખાની રૂટિન ઈડલી ખાધા બાદ હવે તમે મકાઇના લોટની ઈડલી ટ્રાય કરો. તે ટેસ્ટમાં ખૂબ જ સ્વાદિષ્ટ હોય છે અને સાથે તેની મજા પણ વધે છે.

સામગ્રી

- એક કપ મકાઈનો લોટ

- એક કપ દહીં

- બે ટીસ્પૂન તેલ

- ત્રણ ટીસ્પૂન કોથમીર

- દસ નંગ લીમડાના પાન

- અડધી ચમચી રાઈ

- એક ચમચી ચણા દાળ

- એક ચમચી અડદની દાળ

- એક બારીક સુધારેલું લીલું મરચું

- એક ઇંચ આદુનો ટુકડો

- મીઠું સ્વાદ અનુસાર

- ત્રણ ચમચી ઈનો

રીત

એક પેનમાં બે ચમચી તેલ ગરમ કરવા રાખો. તેમાં રાઈનો વઘાર કરો, તેમાં ચણા અને અડદની દાળ નાંખીને તે સોનેરી થાય ત્યાં સુધી શેકો. આદુ, મરચું અને લીમડો ઉમેરીને તેને શેકો. હવે તેમાં મકાઈનો લોટ ઉમેરો અને ત્રણ મિનિટ સુધી શેકો. આ મિશ્રણને એક અલગ વાસણમાં કાઢી લો. તેમાં મીઠું, દહીં અને કોથમીર ઉમેરો અને પાણી નાંખીને ઈડલી જેવું ખીરું બનાવો. તેને સારી રીતે હલાવીને મિક્સ કરો અને દસ મિનિટ માટે રહેવા દો. એક કૂકરમાં 2-3 કપ પાણી નાંખો અને તેને ઉકળવા રાખો. તેમાં ઈડલી સ્ટેન્ડમાં તેલ લગાવીને તેને ચિકણું કરો. હવે ઈડલીના ખીરામાં ઈનો ઉમેરો અને તેને હલાવી લો. આ મિશ્રણને ઈડલી સ્ટેન્ડમાં રાખો, કૂકર ખોલો અને સાથે 15 મિનિટ બાદ ઈડલીને ચપ્પાથી ચેક કરો. જો તે તૈયાર થઇ ગઇ હોય તો તેને ગરગમાગરમ ઈડલીને ચટણી સાથે પીરસો.