ગુજરાતમાં 26 એપ્રિલના રોજ 15 મહાનગરપાલિકાઓ, 34 જિલ્લા પંચાયતો અને 260 તાલુકા પંચાયતો માટે મતદાન યોજાનાર છે. એપ્રિલ માસની આકરી ગરમી અને હીટવેવની આગાહીને જોતા રાજ્ય ચૂંટણી પંચ દ્વારા મતદારો અને ચૂંટણી સ્ટાફના સ્વાસ્થ્યની રક્ષા માટે મહત્વની સૂચનાઓ જારી કરવામાં આવી છે. આ સંદર્ભે આયોગે રાજ્યના આરોગ્ય વિભાગ સહિત તમામ CDHO (જિલ્લા મુખ્ય આરોગ્ય અધિકારી) અને MO (મેડિકલ ઓફિસર)ને લેખિત પત્ર પાઠવી વિશેષ વ્યવસ્થા કરવા આદેશ આપ્યો છે.
મતદાન મથકો પર ‘ORS’ અને ‘ફર્સ્ટ એઇડ’ની વ્યવસ્થા
ચૂંટણી પંચની સૂચના મુજબ, દરેક મતદાન મથક પર ઉનાળાની ગરમીને કારણે ડિહાઈડ્રેશનની સમસ્યા ન સર્જાય તે માટે પૂરતા પ્રમાણમાં ORS (ઓરલ રીહાઈડ્રેશન સોલ્ટ) ના પેકેટ રાખવામાં આવશે. આ ઉપરાંત, કોઈપણ ઈમરજન્સી સ્થિતિને પહોંચી વળવા માટે દરેક બૂથ પર પ્રાથમિક સારવારની ફર્સ્ટ એઇડ કિટ ઉપલબ્ધ રાખવા જણાવાયું છે. ખાસ કરીને વડીલો અને બાળકો સાથે આવતા મતદારો માટે આ સુવિધા આશીર્વાદરૂપ સાબિત થશે.
મેડિકલ ટીમ અને પાણીની સુવિધા
પંચે દરેક ઝોનમાં મોબાઈલ મેડિકલ ટીમો તૈનાત રાખવા સૂચના આપી છે, જે લૂ લાગવા જેવી ઘટનાઓમાં ત્વરિત સારવાર આપી શકે. મતદાન મથકો પર મતદારોને લાંબી કતારમાં ઉભા રહેવું પડે ત્યારે શુદ્ધ અને ઠંડા પીવાના પાણીની વ્યવસ્થા સુનિશ્ચિત કરવા સ્થાનિક તંત્રને તાકીદ કરવામાં આવી છે.
આ પણ વાંચો--- Mehsanaમાં ફિલ્મી ઢબે લૂંટ, પુત્રને વિદેશ મોકલવા રાખેલા 64 લાખ પિસ્તોલની અણીએ લૂંટાયા, એજન્ટના માણસો જ નીકળ્યા લૂંટારા
