- ભારત અને શ્રીલંકા વચ્ચે છેલ્લી વનડે સિરીઝ રમાઈ હતી
- આ સિરીઝમાં ટીમ ઈન્ડિયાને હારનો સામનો કરવો પડ્યો હતો
- ટીમ ઈન્ડિયાએ આ ફોર્મેટમાં બે વર્લ્ડકપનો ખિતાબ પણ જીત્યો છે
ટીમ ઈન્ડિયાએ તાજેતરમાં શ્રીલંકા સાથે તેની છેલ્લી વનડે સિરીઝ રમી હતી. આ સિરીઝમાં ભારતને હારનો સામનો કરવો પડ્યો હતો. ત્યારથી ભારતીય ટીમ આંતરરાષ્ટ્રીય ક્રિકેટમાંથી બ્રેક પર છે. ટીમ ઈન્ડિયાએ વર્ષ 1971માં ODI ક્રિકેટમાં ડેબ્યૂ કર્યું હતું. ભારતીય ટીમ માટે અત્યાર સુધીમાં 256 ખેલાડીઓએ ODI ક્રિકેટમાં પદાર્પણ કર્યું છે.
ટીમ ઈન્ડિયાએ આ ફોર્મેટમાં બે વર્લ્ડકપનો ખિતાબ પણ જીત્યો છે. જેમાં 1983 અને 2011ના વર્લ્ડ કપનો સમાવેશ થાય છે. આ સિવાય ટીમ ઈન્ડિયાએ આ ફોર્મેટમાં ICC ચેમ્પિયન્સ ટ્રોફી પણ જીતી છે. આજે અમે તમને એવા 5 ખેલાડીઓ વિશે જણાવવા જઈ રહ્યા છીએ જેમના વનડે ડેબ્યૂમાં ટીમ ઈન્ડિયાને હાર મળી હતી.
વિરેન્દ્ર સહેવાગ
આ યાદીમાં ટીમ ઈન્ડિયાના વિસ્ફોટક પૂર્વ ઓપનિંગ બેટ્સમેન વીરેન્દ્ર સેહવાગનું નામ પણ સામેલ છે. સેહવાગે ભારત તરફથી 1999માં પાકિસ્તાન સામે વનડેમાં ડેબ્યૂ કર્યું હતું. સેહવાગ પણ આ મેચમાં ખાસ કરી શક્યો ન હતો અને માત્ર એક રન બનાવીને આઉટ થયો હતો. આ મેચમાં ભારતને પાકિસ્તાનના હાથે હારનો સામનો કરવો પડ્યો હતો.
સુરેશ રૈના
ટીમ ઈન્ડિયાના પૂર્વ ઓલરાઉન્ડર સુરેશ રૈનાએ 2005માં શ્રીલંકા સામે ભારત તરફથી વનડેમાં ડેબ્યૂ કર્યું હતું. આ મેચમાં ભારતીય ટીમને હારનો સામનો કરવો પડ્યો હતો. રૈનાએ પોતાની કારકિર્દીમાં ભારત માટે 226 ODI મેચ રમી હતી. જેમાં તેના નામે 5615 રન સામેલ છે.
વિરાટ કોહલી
ટીમ ઈન્ડિયાના સ્ટાર બેટ્સમેન અને રન મશીન વિરાટ કોહલીએ 2008માં શ્રીલંકા સામે ભારત માટે વનડે ડેબ્યૂ કર્યું હતું. આ મેચમાં કોહલી 22 બોલમાં માત્ર 12 રન બનાવીને આઉટ થયો હતો. શ્રીલંકાએ 8 વિકેટ બાકી રહેતા મેચ જીતી લીધી હતી.
રવિન્દ્ર જાડેજા
ટીમ ઈન્ડિયાના સ્ટાર ઓલરાઉન્ડર રવિન્દ્ર જાડેજાએ 2009માં શ્રીલંકા સામે ભારતીય ટીમ માટે ODI ક્રિકેટમાં ડેબ્યુ કર્યું હતું. આ મેચમાં જાડેજાએ 6 ઓવર ફેંકી હતી, પરંતુ તેને કોઈ વિકેટ મળી ન હતી. પરંતુ જાડેજાએ બેટિંગમાં અજાયબીઓ કરી હતી. પોતાની ડેબ્યૂ મેચમાં જાડેજાએ 60 રનની અણનમ ઇનિંગ રમી હતી. પરંતુ ટીમ ઈન્ડિયા આ મેચ જીતી શકી ન હતી.
આર અશ્વિન
ભારતીય ટીમના અનુભવી સ્પિન બોલર આર અશ્વિને 2010માં શ્રીલંકા સામે ટીમ ઈન્ડિયા માટે વનડે ડેબ્યૂ કર્યું હતું. આ મેચમાં અશ્વિને બેટિંગ કરતા 38 રન બનાવ્યા હતા. આ સિવાય તેણે બોલિંગ દરમિયાન 2 વિકેટ પણ લીધી હતી, પરંતુ ટીમ ઈન્ડિયા મેચ જીતી શકી નહોતી.
