ટેસ્ટમાં 8000 રન, 235 વિકેટ...! ODIમાં ખાતું ના ખોલાવી શક્યો મહાન ખેલાડી

વેસ્ટ ઈન્ડિઝના પૂર્વ ક્રિકેટર સર ગેરી સોબર્સનું નામ વિશ્વના મહાન ઓલરાઉન્ડરોમાં ગણવામાં આવે છે. બાર્બાડોસમાં 28 જુલાઈ 1936ના રોજ જન્મેલા સોબર્સે તેની કારકિર્દીમાં 93 ટેસ્ટ રમી અને 57.78ની પ્રભાવશાળી સરેરાશથી 8032 રન બનાવ્યા. તેની પાસે એક ઓવરમાં 6 છગ્ગા મારવાનો અને વેસ્ટ ઈન્ડિઝ માટે ટેસ્ટમાં પ્રથમ ત્રેવડી સદી ફટકારવાનો રેકોર્ડ પણ છે.

ટેસ્ટમાં શાનદાર પ્રદર્શન

તેમના સમય દરમિયાન સોબર્સ એકમાત્ર એવો ખેલાડી હતો જેણે 200 થી વધુ ટેસ્ટ વિકેટ લીધી હતી અને 50 થી વધુની સરેરાશથી 8000થી વધુ રન બનાવ્યા હતા. ટેસ્ટ ક્રિકેટરના આ આંકડા ખૂબ જ આકર્ષક લાગે છે. પરંતુ તમને જાણીને નવાઈ લાગશે કે એક સમયે વિશ્વ ક્રિકેટ પર રાજ કરનાર આ ખેલાડી ODI ક્રિકેટમાં પોતાનું ખાતું પણ ખોલી શક્યો નથી.

ODIમાં ખાતું પણ ખોલાવી શક્યા ન હતા સોબર્સ

સોબર્સે 5 સપ્ટેમ્બર 1973ના રોજ તેની ODI કારકિર્દીની પ્રથમ ODI રમી હતી. આ મેચ તેની વનડે કારકિર્દીની છેલ્લી મેચ પણ સાબિત થઈ. લીડ્ઝમાં રમાયેલી આ મેચમાં વેસ્ટ ઈન્ડિઝે પ્રથમ બેટિંગ કરતા 54 ઓવરમાં 181 રન બનાવ્યા હતા. સોબર્સ આ મેચમાં છઠ્ઠા નંબર પર રમવા આવ્યો હતો અને અહીં ટીમે 132 રનમાં 4 વિકેટ ગુમાવી દીધી હતી. તેણે પ્રથમ 5 બોલ ડોટ્સ રમ્યા અને છઠ્ઠા બોલ પર ક્રિસ ઓલ્ડની બોલિંગ પર આઉટ થયા. તેમના આઉટ થયા બાદ વેસ્ટ ઈન્ડિઝનો દાવ લાંબો સમય ચાલ્યો ન હતો અને સમગ્ર ટીમ 181 રનમાં ઓલઆઉટ થઈ ગઈ હતી. આ ઈનિંગમાં વેસ્ટ ઈન્ડિઝના કેપ્ટન રોહન કન્હાઈએ સૌથી વધુ 55 રન બનાવ્યા હતા.

કોઈક રીતે ઈંગ્લિશ ટીમ જીતવામાં સફળ રહી હતી

ઈંગ્લેન્ડને વેસ્ટ ઈન્ડિઝની ટીમ તરફથી માત્ર 182 રનનો ટાર્ગેટ મળ્યો હતો, પરંતુ આટલા રન બનાવવામાં ટીમના બેટ્સમેનોનો પરસેવો છૂટી ગયો હતો. કેરેબિયન ટીમ માટે ત્રણ બોલર વેનબર્ન હોલ્ડર, કીથ બોયસ અને બર્નાર્ડ જુલિયનને બે-બે વિકેટ જ્યારે સોબર્સ અને લાન્સ ગિબ્સને એક-એક વિકેટ મળી હતી. આ રીતે ઈંગ્લેન્ડની ટીમ કોઈક રીતે એક વિકેટથી મેચ જીતવામાં સફળ રહી હતી. ઈંગ્લેન્ડ તરફથી માઈક ડેનેસે 66 રન જ્યારે ટોની ગ્રેગે 48 રન બનાવ્યા હતા.

સોબર્સે ટેસ્ટમાં 375 રનની ઈનિંગ્સ રમી

આ મેચ બાદ સર ગેરી સોબર્સ ટેસ્ટમાં રમ્યા હતા, પરંતુ તેમને ફરીથી ODIમાં રમવાની તક મળી ન હતી. તમને જણાવી દઈએ કે સોબર્સે 1958માં પાકિસ્તાન વિરૂદ્ધ 365 રનની ઈનિંગ રમી હતી. તેની આ ફનિંગ તે સમયે ટેસ્ટ ક્રિકેટની સર્વોચ્ચ ઈનિંગ હતી. તેમનો રેકોર્ડ 36 વર્ષ સુધી અકબંધ રહ્યો. વર્ષ 1994માં તેના દેશબંધુ બ્રાયન લારાએ 375 રનની ઈનિંગ રમીને આ રેકોર્ડ તોડ્યો હતો.