એશિયન ગેમ્સ 2026માં ભારતના એથ્લેટ ગુલવીર સિંહે વધુ એક મોટી સફળતા મેળવી છે. ગુલવીરે શુક્રવારે પુરુષોની 10,000 મીટર ફાઈનલમાં સિલ્વર મેડલ જીત્યો છે. તેણે રેસ પૂરી કરવામાં 28 મિનિટ 29.38 સેકન્ડનો સમય લીધો. બહેરીનના બિરહાનુ બાલેવે 28:27.51ના સમય સાથે ગોલ્ડ મેડલ જીત્યો હતો. બંને વચ્ચે માત્ર 1.87 સેકન્ડનો તફાવત રહ્યો. આ ગુલવીરનો એશિયન ગેમ્સમાં સતત બીજી વખત 10,000 મીટરમાં મેડલ છે. 2023ની હાંગઝોઉ એશિયન ગેમ્સમાં તેણે આ જ ઈવેન્ટમાં બ્રોન્ઝ મેડલ જીત્યો હતો. એટલે 3 વર્ષ બાદ ગુલવીરે પોતાના મેડલનો રંગ બ્રોન્ઝમાંથી સિલ્વરમાં બદલ્યો છે.
બાલેવ સાથે આખી રેસમાં ટક્કર
10,000 મીટરની રેસ કુલ 25 લેપની હોય છે. ગુલવીર અને બાલેવ શરૂઆતથી જ આગળના ખેલાડીઓમાં રહ્યા હતા. રેસ આગળ વધતી ગઈ તેમ બંને વચ્ચે ગોલ્ડ માટેની સ્પર્ધા જોવા મળી. છેલ્લા તબક્કામાં બાલેવે પોતાની ઝડપ વધારી અને ગુલવીરથી થોડું અંતર બનાવી લીધું. ગુલવીરે અંત સુધી તેનો પીછો કર્યો, પરંતુ અંતિમ લાઇન સુધીમાં ગોલ્ડ માટેનો તફાવત પૂરો કરી શક્યો નહીં. પરિણામે તેને સિલ્વરથી સંતોષ માનવો પડ્યો.
https://www.instagram.com/reel/Ddt2soXlGjr/?utm_source=ig_web_button_share_sheet
હાંગઝોઉના બ્રોન્ઝ બાદ સિલ્વર
ગુલવીરે 2023માં હાંગઝોઉ એશિયન ગેમ્સમાં 28:17.21ના સમય સાથે બ્રોન્ઝ મેડલ જીત્યો હતો. તે વખતે ભારતના કાર્તિક કુમારે સિલ્વર અને બાલેવે ગોલ્ડ જીત્યો હતો. આ વખતે ગુલવીર અગાઉ કરતાં વધુ અનુભવ સાથે એશિયન ગેમ્સમાં આવ્યો હતો. 2026માં કોમનવેલ્થ ગેમ્સમાં પણ તેણે પુરુષોની 10,000 મીટરમાં સિલ્વર મેડલ જીત્યો હતો.
ગુલવીરનો રાષ્ટ્રીય રેકોર્ડ પણ તેના નામે
ગુલવીર ભારતના લાંબા અંતરના દોડવીરોમાં અગ્રણી નામ બની ચૂક્યો છે. 2025માં તેણે 10,000 મીટરમાં 27:00.22નો સમય નોંધાવીને રાષ્ટ્રીય રેકોર્ડ બનાવ્યો હતો. તેના નામે 5,000 મીટરનો પણ રાષ્ટ્રીય રેકોર્ડ છે. 2025ની એશિયન એથ્લેટિક્સ ચેમ્પિયનશિપમાં તેણે 5,000 અને 10,000 મીટર બંનેમાં ગોલ્ડ મેડલ જીત્યા હતા.
ભારતના એથ્લેટિક્સમાં વધુ એક મેડલ
એશિયન ગેમ્સ 2026માં ભારતીય એથ્લેટિક્સ ટીમ માટે ગુલવીરનો સિલ્વર વધુ એક મહત્વનો મેડલ છે. ગુલવીર પહેલાં મહિલાઓની 10,000 મીટરમાં સીમા કુમારીએ બ્રોન્ઝ મેડલ જીત્યો હતો. આ રીતે 10,000 મીટરની બંને ઈવેન્ટમાં ભારતના ખેલાડીઓએ પોડિયમ પર સ્થાન મેળવ્યું છે. ગુલવીરના સિલ્વરથી ભારતના મેડલ અભિયાનમાં વધુ એક મેડલ ઉમેરાયો છે.
આ પણ વાંચો : India vs West Indies 1st ODI : કોહલી-રોહિત નહીં, આ 2 બોલરો વેસ્ટ ઈન્ડિઝ સામે બનશે કાળ!
