એશિયન ગેમ્સ 2026માં ભારતીય પુરુષ કબડ્ડી ટીમે શાનદાર પ્રદર્શન ચાલુ રાખ્યું છે. ડિફેન્ડિંગ ચેમ્પિયન ભારતે મંગળવારે ગ્રુપ-Aની બીજી મેચમાં દક્ષિણ કોરિયાને 63-31ના મોટા અંતરથી હરાવ્યું. આ જીત સાથે ભારતે ટૂર્નામેન્ટમાં સતત બીજી જીત નોંધાવી છે. ભારતે એક દિવસ પહેલા યજમાન જાપાનને 49-24થી હરાવીને પોતાના અભિયાનની શરૂઆત કરી હતી. સુનીલ કુમારની આગેવાનીમાં ભારતીય ખેલાડીઓએ રેડિંગ અને ડિફેન્સ બંનેમાં કોરિયાને તક આપી નહોતી.
પહેલા હાફમાં જ ભારતે મેચ પર પકડ બનાવી
મેચની શરૂઆતથી ભારતે આક્રમક રમત બતાવી. કોરિયાની ડિફેન્સ લાઇન પર ભારતીય રેડર્સ સતત દબાણ બનાવતા રહ્યા. બીજી તરફ ભારતીય ડિફેન્સે પણ કોરિયાના રેડર્સને રોકવામાં સફળતા મેળવી. પહેલા હાફના અંત સુધી ભારતે 34-14ની મોટી લીડ મેળવી લીધી હતી. એટલે કે 20 મિનિટની રમત પૂરી થતાં જ ભારત 20 પોઈન્ટથી આગળ હતું. આ દરમિયાન ભારતીય ટીમે 2 વખત કોરિયાને ઓલઆઉટ પણ કર્યું હતું. બીજા ઓલઆઉટ બાદ ભારતની સ્થિતિ વધુ મજબૂત બની ગઈ હતી. ભારતે રેડિંગ ઉપરાંત ટૅકલમાં પણ સતત પોઈન્ટ મેળવ્યા અને કોરિયાને વાપસી કરવાની તક આપી નહોતી.
બીજા હાફમાં પણ ભારતનો દબદબો
બીજા હાફમાં કોરિયાએ કેટલાક પોઈન્ટ મેળવ્યા હતા, પરંતુ ભારતની મોટી લીડને ઘટાડવામાં તે સફળ રહ્યું નહીં. ભારતે બીજા હાફમાં પણ આક્રમક રમત ચાલુ રાખી અને અંતે 63-31થી મેચ પોતાના નામે કરી. બીજા હાફમાં ભારતે 29 પોઈન્ટ મેળવ્યા, જ્યારે કોરિયાના ખાતામાં 17 પોઈન્ટ આવ્યા. આ રીતે આખી મેચમાં ભારતે 32 પોઈન્ટના અંતરથી જીત મેળવી. ભારતે મેચ દરમિયાન કુલ 3 વખત કોરિયાને ઓલઆઉટ કર્યું હતું.
ગ્રુપ-Aમાં ભારત ટોચ પર
આ જીત સાથે ભારત ગ્રુપ-Aમાં સતત 2 જીત સાથે મજબૂત સ્થિતિમાં છે. ભારતે પહેલા જાપાન અને હવે દક્ષિણ કોરિયાને હરાવ્યું છે. ગ્રુપમાં ભારત સાથે જાપાન, દક્ષિણ કોરિયા, બાંગ્લાદેશ અને ચાઈનીઝ તાઈપેઈ છે. ભારતની આગામી મેચ હવે બાંગ્લાદેશ સામે 23 સપ્ટેમ્બરે રમાશે. ત્યારબાદ ગ્રુપ સ્ટેજની છેલ્લી મેચમાં ભારત ચાઈનીઝ તાઈપેઈ સામે રમશે. ગ્રુપ સ્ટેજમાં દરેક ટીમ પોતાના ગ્રુપની અન્ય ટીમો સામે એક-એક મેચ રમશે અને દરેક ગ્રુપમાંથી ટોચની 2 ટીમો સેમિફાઈનલમાં પહોંચશે.
આ પણ વાંચો: Sandesh Digital Explainer : નેશનલ ફિલ્મ એવોર્ડ્સના આયોજનથી ગુજરાતને શું થશે ફાયદો?
