ભારતીય મહિલા કબડ્ડી ટીમે જાપાનમાં ચાલી રહેલી એશિયન ગેમ્સ 2026માં શાનદાર પ્રદર્શન કરતા ગોલ્ડ મેડલ પોતાના નામે કર્યો છે. ભારતે 26 સપ્ટેમ્બરે રમાયેલી ફાઈનલમાં ઈરાનને 37-34થી હરાવીને સતત બીજી વખત એશિયન ગેમ્સમાં મહિલા કબડ્ડીમાં ગોલ્ડ જીત્યો. આ જીત સાથે કોચ નીતા ધાડવે માટે પણ આ ક્ષણ ખાસ બની ગઈ છે. તેઓ અગાઉ 2014ની એશિયન ગેમ્સમાં પણ ભારતીય મહિલા ટીમને ગોલ્ડ અપાવી ચૂક્યા છે.
‘આ વખતેની જીત વધુ યાદગાર’
નીતા ધાડવેએ જીત બાદ કહ્યું કે આ વખતનું ગોલ્ડ તેમના માટે વધુ યાદગાર છે. 2014ની ટીમમાં ઘણી દિગ્ગજ ખેલાડીઓ હતી, જ્યારે આ ટીમમાં માત્ર ત્રણ સિનિયર ખેલાડીઓ છે. તેમણે ખાસ કરીને જુનિયર ખેલાડીઓના પ્રદર્શનની પ્રશંસા કરી અને નિકિતાના શાનદાર ખેલને ટીમ માટે મહત્વનો ગણાવ્યો. તેમના મતે ટીમમાં હુમલા અને બચાવ બંનેમાં સારું સંતુલન જોવા મળ્યું હતું.
ફાઈનલમાં બદલેલી રણનીતિ કામ કરી ગઈ
ઈરાન સામેની ફાઈનલમાં ભારતે શરૂઆતથી જ દબાણ બનાવ્યું હતું. પ્રથમ હાફમાં ભારત 22-16થી આગળ હતું. બીજા હાફમાં ઈરાને જોરદાર વાપસી કરી અને એક સમયે સ્કોર 27-26 સુધી લાવી દીધો હતો. જોકે ભારતે ત્યારબાદ ફરી રમત પર કાબૂ મેળવ્યો. સંજુ દેવીએ સુપર રેઈડ કરીને ભારતને મહત્વની લીડ અપાવી, જ્યારે કેપ્ટન પુષ્પા રાણાએ પણ ઓલઆઉટમાં મહત્વની ભૂમિકા ભજવી. અંતે ભારતે 37-34થી મેચ જીતી લીધી. નીતા ધાડવેએ જણાવ્યું કે ફાઈનલ માટે ટીમે ખાસ રણનીતિ બનાવી હતી. ખાસ કરીને ડાબી બાજુથી રેઈડ કરતી નિકિતા પર ધ્યાન કેન્દ્રિત કરવામાં આવ્યું હતું અને આ પ્લાન સફળ રહ્યો. તેમણે મેચ દરમિયાન સ્ટેડિયમમાં ભારતીય ચાહકો તરફથી મળેલા જોરદાર સમર્થનને પણ યાદ કર્યું.
ખેલાડીમાંથી કોચ સુધીનો લાંબો સફર
નીતા ધાડવે પોતે પણ કબડ્ડીની જાણીતી ખેલાડી રહી ચૂક્યાં છે. તેમણે ઈન્ડિયન રેલવે માટે લાંબા સમય સુધી રમ્યા અને 14 સતત ગોલ્ડ મેડલ જીત્યા હતા. 2002માં યુનાઈટેડ આંધ્ર પ્રદેશ તરફથી નેશનલ ગેમ્સમાં ગોલ્ડ જીત્યા બાદ તેમણે ખેલાડી તરીકેની કારકિર્દીનો અંત કર્યો હતો. ત્યારબાદ કોચ તરીકે ભારતીય મહિલા કબડ્ડી ટીમ સાથે જોડાઈને 2014માં એશિયન ગેમ્સ ગોલ્ડ અપાવ્યો હતો.
મહિલા કબડ્ડી માટે પ્રો લીગની જરૂર
ગોલ્ડ જીત્યા બાદ પણ નીતા ધાડવે ભારતીય મહિલા કબડ્ડીના ભવિષ્યને લઈને મહત્વની વાત કરી છે. તેમના મતે હવે મહિલાઓ માટે સંપૂર્ણ પ્રો લીગ શરૂ થવી જોઈએ, જેથી ખેલાડીઓને આંતરરાષ્ટ્રીય સ્તરના ખેલાડીઓ સાથે રમવાનો અનુભવ મળે. તેમણે એ પણ જણાવ્યું કે એશિયન ગેમ્સ પહેલાં બેલ્લારી અને ગાંધીનગરમાં યોજાયેલા બે તૈયારી કેમ્પથી ટીમની નબળી બાબતો પર કામ કરવામાં મદદ મળી હતી. નીતા ધાડવે કહ્યું કે ખેલાડી તરીકે તેઓ એશિયન ગેમ્સમાં ગોલ્ડ જીતી શક્યાં નહોતાં, કારણ કે મહિલા કબડ્ડી 2010માં એશિયન ગેમ્સમાં સામેલ થઈ હતી. હવે કોચ તરીકે ટીમને ફરી ગોલ્ડ અપાવવામાં પોતાની ભૂમિકા ભજવી શક્યાં તે તેમના કરિયરની સૌથી યાદગાર ક્ષણોમાંની એક છે.
ભારતનો સતત બીજો મહિલા કબડ્ડી ગોલ્ડ
ભારતીય મહિલા ટીમે આ જીત સાથે હાંગઝોઉ 2022માં જીતેલા ગોલ્ડનું સફળતાપૂર્વક ડિફેન્ડ કર્યું છે. એશિયન ગેમ્સમાં મહિલા કબડ્ડીની શરૂઆત 2010માં થઈ ત્યારથી ભારતે 2010, 2014 અને 2022માં ગોલ્ડ જીત્યો હતો, જ્યારે 2018માં સિલ્વર મેડલ મળ્યો હતો. 2026નું ગોલ્ડ ભારતનું આ ઈવેન્ટમાં ચોથું ગોલ્ડ છે.
આ પણ વાંચો: Asian games: ભારતીય કોચે બદલી થાઈલેન્ડની કબડ્ડી, 36 વર્ષ બાદ પહેલીવાર મળ્યો ઐતિહાસિક બ્રોન્ઝ
