એશિયન ગેમ્સ 2026માં ભારત અને પાકિસ્તાન વચ્ચેનો મેન્સ હોકી સેમિફાઇનલ મુકાબલો અપેક્ષા મુજબ જબરદસ્ત રોમાંચક રહ્યો. જાપાનના ગિફુ પ્રીફેક્ચરલ ગ્રીન સ્ટેડિયમમાં રમાયેલી મેચમાં ડિફેન્ડિંગ ચેમ્પિયન ભારતે પાકિસ્તાનને 4-3થી હરાવીને ફાઇનલમાં જગ્યા બનાવી. આ જીત સાથે ભારતે મેડલ પણ પાક્કો કરી લીધો છે. ભારતે મેચની શરૂઆતથી જ આક્રમક રમત બતાવી. કેપ્ટન હરમનપ્રીત સિંહે 5મી અને 13મી મિનિટે પેનલ્ટી કોર્નર પરથી 2 ગોલ કરીને ભારતને 2-0ની લીડ અપાવી. બંને ગોલમાં હરમનપ્રીતની ડ્રેગ-ફ્લિકની સચોટતા જોવા મળી.
સુખજીતે વધારી લીડ
બીજા ક્વાર્ટરમાં પણ ભારતે પાકિસ્તાનને વધુ તક આપી નહીં. 23મી મિનિટે સુખજીત સિંહે ફિલ્ડ ગોલ કરીને ભારતની લીડ 3-0 કરી દીધી. આ સમયે ભારતીય ટીમ મેચ પર સંપૂર્ણ કંટ્રોલમાં દેખાઈ રહી હતી. પરંતુ હાફ ટાઈમ પહેલાં પાકિસ્તાને વાપસીની શરૂઆત કરી. 30મી મિનિટે અબુ બકર મહમૂદે પેનલ્ટી કોર્નર પરથી ગોલ કરીને સ્કોર 3-1 કર્યો. આમ, હાફ ટાઈમ સુધી ભારત 2 ગોલની લીડ સાથે આગળ હતું.
3-0ની લીડ 3-3 થઈ ગઈ
ત્રીજા ક્વાર્ટરમાં ભારતને પાકિસ્તાનના સતત હુમલાનો સામનો કરવો પડ્યો. ભારત તરફથી દિલપ્રીત સિંહને ગ્રીન કાર્ડ મળ્યા બાદ પાકિસ્તાનને સંખ્યાત્મક ફાયદો મળ્યો અને તેણે દબાણ વધાર્યું. 45મી મિનિટે હન્નાન શાહિદે ગોલ કરીને પાકિસ્તાનને 2-3 સુધી પહોંચાડ્યું. ત્યારબાદ ચોથા ક્વાર્ટરની શરૂઆતમાં જ 49મી મિનિટે રાણા વહીદ અશરફે ગોલ કરીને સ્કોર 3-3 કરી દીધો. થોડા જ સમયમાં ભારતની 3-0ની લીડ સંપૂર્ણપણે ખતમ થઈ ગઈ હતી.
છેલ્લી ઘડીએ અભિષેકનો ધમાકો
મેચ 3-3ની બરાબરી પર પહોંચ્યા બાદ બંને ટીમો વિજયી ગોલ માટે પ્રયાસ કરી રહી હતી. પાકિસ્તાને પણ પેનલ્ટી કોર્નર મેળવ્યો, પરંતુ ભારતીય ડિફેન્સે તેને ગોલમાં ફેરવવા દીધો નહીં. મેચમાં માત્ર 50 સેકન્ડ બાકી હતા ત્યારે અભિષેકે ભારત માટે નિર્ણાયક ગોલ કર્યો. તેના શોટને શરૂઆતમાં પાકિસ્તાની ગોલકીપરે રોક્યો, પરંતુ રિબાઉન્ડ બાદ બોલ પાકિસ્તાની સ્ટિક સાથે ડિફ્લેક્ટ થઈને ગોલમાં ગયો. આ ગોલથી ભારત 4-3થી આગળ થયું અને બાકીનો સમય કાઢીને ફાઇનલમાં પહોંચી ગયું.
મેડલ પાક્કો, હવે ગોલ્ડની લડાઈ
પાકિસ્તાન સામેની જીત સાથે ભારતે એશિયન ગેમ્સમાં સતત બીજી વખત મેન્સ હોકીની ફાઇનલમાં પ્રવેશ કર્યો છે. ભારત હવે ગોલ્ડ મેડલ માટે મલેશિયા અને દક્ષિણ કોરિયા વચ્ચેની બીજી સેમિફાઇનલના વિજેતા સામે રમશે. ફાઇનલ શનિવારે રમાશે. આ જીત ભારત માટે માત્ર ફાઇનલની ટિકિટ પૂરતી નથી. એશિયન ગેમ્સનો ગોલ્ડ મેડલ 2028 લોસ એન્જલસ ઓલિમ્પિક્સ માટે સીધી ક્વોલિફિકેશન પણ આપે છે. એટલે હવે ભારત પાસે ગોલ્ડ જીતીને ઓલિમ્પિક્સમાં સીધી જગ્યા મેળવવાની તક છે.
પાકિસ્તાન સામે ભારતની આ જીતથી બંને ટીમો વચ્ચેનો લાંબો અજેય સિલસિલો પણ આગળ વધ્યો છે. પરંતુ મેચે ભારતીય ટીમ માટે એક મહત્વનો સંદેશ પણ આપ્યો છે—3-0ની લીડ હોવા છતાં મેચ અંત સુધી સુરક્ષિત માનવી નહીં. હવે ફાઇનલમાં ભારતનું લક્ષ્ય મેડલને ગોલ્ડમાં બદલવાનું રહેશે.
આ પણ વાંચો: Asian games: 1962 પછી પહેલીવાર ભારતીય રેસલર ફાઇનલમાં, નિતેશ સિવાચે ગ્રીકો-રોમનમાં રચ્યો ઈતિહાસ
