- T20 વર્લ્ડકપનું 9મું એડિશન 2 જૂનથી વેસ્ટ ઈન્ડિઝ અને અમેરિકામાં શરૂ થશે
- T20 વર્લ્ડકપમાં ઘણા રેકોર્ડ બન્યા અને તૂટ્યા છે
- T20 વર્લ્ડકપમાં સૌથી વધુ રન બનાવવાનો રેકોર્ડ એશિયન ખેલાડીઓ નામે
T20 વર્લ્ડકપનું 9મું એડિશન 2 જૂનથી વેસ્ટ ઈન્ડિઝ અને અમેરિકામાં શરૂ થઈ રહ્યું છે. આ વખતે આ ટુર્નામેન્ટમાં 20 ટીમો ભાગ લઈ રહી છે. જેને પાંચ ગ્રુપમાં વહેંચવામાં આવ્યા છે. T20 વર્લ્ડકપમાં ઘણા રેકોર્ડ બન્યા અને તૂટ્યા છે. આવો જ એક રેકોર્ડ છે જેમાં એશિયન ખેલાડીઓનું સંપૂર્ણ વર્ચસ્વ છે. જે T20 વર્લ્ડકપમાં સૌથી વધુ રન બનાવવાનો રેકોર્ડ છે.
સૌથી વધુ રન બનાવવાના મામલે કિંગ કોહલી સૌથી આગળ
2007માં શરૂ થયેલી T20 વર્લ્ડકપ ટૂર્નામેન્ટમાં સૌથી વધુ રન બનાવવાના મામલે એશિયન ખેલાડીઓ ટોપ 5માં વર્ચસ્વ ધરાવે છે. 8 વખત યોજાયેલી આ ટૂર્નામેન્ટમાં વિરાટ કોહલીએ સૌથી વધુ રન બનાવ્યા છે. આ યાદીમાં ટોચના પાંચમાં ક્રિસ ગેલ એકમાત્ર એવો ખેલાડી છે જે એશિયન નથી.
વિરાટ કોહલીઃ T20 વર્લ્ડકપ 2024 પહેલા વિરાટ કોહલી T20 વર્લ્ડકપમાં 27 મેચ રમી ચૂક્યો છે. આ 27 મેચોમાં તેને 25 ઇનિંગ્સમાં બેટિંગ કરવાનો મોકો મળ્યો. કોહલીએ 25 ઇનિંગ્સમાં 131.30ના સ્ટ્રાઇક રેટથી 1141 રન બનાવ્યા છે. જેમાં 14 અડધી સદી સામેલ છે. T20 વર્લ્ડકપની આઠમી આવૃત્તિ સુધી વિરાટ કોહલીએ 103 ચોગ્ગા અને 28 છગ્ગા ફટકાર્યા છે.
મહેલા જયવર્દને: મહેલા જયવર્દનેનો છેલ્લો T20 વર્લ્ડકપ વર્ષ 2024માં રમાયો હતો. T20 વર્લ્ડકપમાં તેણે 31 મેચ રમી છે. આ 31 મેચોમાં જયવર્દને 134.74ના સ્ટ્રાઈક રેટથી 1016 રન બનાવ્યા છે. તેણે T20 વર્લ્ડકપમાં 6 અડધી સદી અને એક સદી ફટકારી છે. જયવર્દનેએ આ ટૂર્નામેન્ટમાં 111 ચોગ્ગા અને 25 છગ્ગા ફટકાર્યા છે.
ક્રિસ ગેલઃ ક્રિસ ગેલે છેલ્લે વર્ષ 2021માં ટી20 વર્લ્ડકપ રમ્યો હતો. તેણે T20 વર્લ્ડકપમાં 33 મેચોની 31 ઇનિંગ્સ રમી છે. આ 31 ઈનિંગ્સમાં ગેઈલે 142.75ના સ્ટ્રાઈક રેટથી 965 રન બનાવ્યા છે. જેમાં 7 અડધી સદી અને 2 સદી સામેલ છે. ક્રિસ ગેલે T20 વર્લ્ડકપમાં 78 ફોર અને 63 સિક્સર ફટકારી છે.
રોહિત શર્માઃ રોહિત શર્મા T20 વર્લ્ડકપમાં અત્યાર સુધી સૌથી વધુ મેચ રમ્યો છે. રોહિતે 39 મેચમાં 36 ઇનિંગ્સ રમી છે. આ 36 ઇનિંગ્સમાં તેણે 127.88ની સ્ટ્રાઇક રેટથી 963 રન બનાવ્યા છે. જેમાં 9 અડધી સદીનો પણ સમાવેશ થાય છે. આ ટૂર્નામેન્ટમાં અત્યાર સુધી રોહિત શર્માએ 91 ફોર અને 35 સિક્સર ફટકારી છે.
તિલકરત્ને દિલશાન: તિલકરત્ને દિલશાને તેનો છેલ્લો ટી20 વર્લ્ડકપ 2016માં રમ્યો હતો. દિલશાને 35 T20 વર્લ્ડકપ મેચોમાં 34 ઇનિંગ્સ રમી છે. આ 34 ઇનિંગ્સમાં તેણે 124.06ના સ્ટ્રાઇક રેટથી 987 રન બનાવ્યા છે. જેમાં 6 અડધી સદી સામેલ છે. તિલકરત્ને દિલશાને T20 વર્લ્ડકપમાં 101 ફોર અને 20 સિક્સર ફટકારી છે.
