પાકિસ્તાનને પછાડીને ભારતીય ટીમ બની નંબર વન, ઓસ્ટ્રેલિયા પાંચમાં સ્થાને યથાવત

• ઓસ્ટ્રેલિયાએ પાકિસ્તાન સામે 360 રનથી હરાવ્યું
  
• પાકિસ્તાનને પછાડીને ભારતીય ટીમ બની નંબર વન 
• WTC પોઈન્ટ ટેબલમાં ભારત ટોચના સ્થાને

પર્થમાં રમાયેલી ત્રણ મેચની સિરીઝની પ્રથમ મેચમાં ઓસ્ટ્રેલિયાએ પાકિસ્તાનને 360 રનથી હરાવ્યું હતું. આ મેચમાં પાકિસ્તાનની હાર થતાં ભારતીય ટીમને ફાયદો થયો છે. ઓસ્ટ્રેલિયાએ મેચ જીત્યા બાદ પણ ભારત અને પાકિસ્તાનની પાછળ છે. વર્લ્ડ ટેસ્ટ ચેમ્પિયનશિપ 2023-25ના પોઈન્ટ ટેબલમાં ભારતીય ટીમ પાકિસ્તાનને પછાડીને નંબર વન બની ગઈ છે.

WTC પોઈન્ટ ટેબલની સ્થિતિ શું છે?

ભારતીય ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં 66.67 ટકાની જીતની ટકાવારી સાથે ટોચ પર છે. જ્યારે પાકિસ્તાનની જીતની ટકાવારી પણ એટલી જ છે. પરંતુ તે પોઈન્ટ ટેબલ પર બીજા સ્થાને છે. પાકિસ્તાનને હરાવ્યા બાદ પણ ઓસ્ટ્રેલિયન ટીમ પોઈન્ટ ટેબલમાં પાંચમા સ્થાને છે. વર્તમાન વર્લ્ડ ચેમ્પિયન ટીમ 41.67 ટકા સાથે પાંચમા સ્થાને છે. જ્યારે ન્યુઝીલેન્ડ અને બાંગ્લાદેશની પણ જીતની ટકાવારી 50-50 જેટલી છે. આ સિવાય વેસ્ટ ઈન્ડિઝ છઠ્ઠા સ્થાને (16.67%) અને ઈંગ્લેન્ડ સાતમા સ્થાને (15%) છે.

પાકિસ્તાનની શરમજનક હાર

પર્થ ટેસ્ટમાં પાકિસ્તાનને ઓસ્ટ્રેલિયા સામે કારમી હારનો સામનો કરવો પડ્યો હતો. આ મેચની બીજી ઈનિંગમાં પાકિસ્તાનની ટીમ માત્ર 89 રનમાં ઓલઆઉટ થઈ ગઈ હતી. પ્રથમ ઈનિંગમાં ઓસ્ટ્રેલિયાએ 487 રન બનાવ્યા હતા. જવાબમાં પાકિસ્તાનની ટીમ માત્ર 271 રન જ બનાવી શકી હતી. બીજી ઈનિંગમાં ઓસ્ટ્રેલિયાએ 5 વિકેટના નુકસાને 233 રન બનાવીને દાવ ડિકલેર કર્યો હતો. પાકિસ્તાનને જીત માટે 450 રનનો ટાર્ગેટ મળ્યો હતો. ટાર્ગેટનો પીછો કરવા મેદાનમાં ઉતરેલી પાકિસ્તાનની ટીમ માત્ર 89 રનમાં ઓલઆઉટ થઈ ગઈ હતી. ઓસ્ટ્રેલિયાના બેટ્સમેન બાદ બોલરોએ પણ શાનદાર પ્રદર્શન કર્યું હતું.