- ઓસ્ટ્રેલિયાએ પાકિસ્તાન સામે 3-0થી ટેસ્ટ સિરીઝ જીતી
- મોહમ્મદ રિઝવાન ભારતીય સંસ્કૃતિના રંગમાં રંગાયો
- મેકગ્રાના પરિવાર સામે હાથ મિલાવવાના બદલે પ્રણામ કર્યા
ઓસ્ટ્રેલિયા અને પાકિસ્તાન વચ્ચે 3 મેચની ટેસ્ટ સિરીઝ સમાપ્ત થઈ ગઈ છે. ઓસ્ટ્રેલિયાએ ત્રણેય મેચો જીતીને સિરીઝ પર કબ્જો કરી લીધો છે. આ સિરીઝમાં પાકિસ્તાનને કારમી હારનો સામનો કરવો પડ્યો છે. જેના કારણે પાકિસ્તાનને વર્લ્ડ ટેસ્ટ ચેમ્પિયનશિપના પોઈન્ટ ટેબલમાં પણ ઘણું નુકસાન થયું છે. પાકિસ્તાનના વિકેટકીપર બેટ્સમેન મોહમ્મદ રિઝવાને સિરીઝની ત્રીજી મેચ દરમિયાન કંઈક એવું કર્યું, જેના કારણે તે ચર્ચામાં આવી ગયો. તેનો વીડિયો પણ સોશિયલ મીડિયા પર વાયરલ થઈ રહ્યો છે. આ વીડિયોમાં જોઈ શકાય છે કે રિઝવાન ભારતીય સંસ્કૃતિના રંગમાં રંગાયેલો છે.
હાથ મિલાવવાના બદલે પ્રણામ કર્યા
ઓસ્ટ્રેલિયાએ પાકિસ્તાન સામે સતત 17મી જીત નોંધાવી છે. ગઈકાલે એટલે કે શનિવારે સિડની ક્રિકેટ ગ્રાઉન્ડ પર ત્રીજી ટેસ્ટ મેચ સમાપ્ત થયા બાદ તમામ ખેલાડીઓ એકબીજા સાથે હાથ મિલાવી રહ્યા હતા. પાકિસ્તાનના તમામ ખેલાડીઓ પૂર્વ ઓસ્ટ્રેલિયન ક્રિકેટર મેકગ્રાના પરિવારજનોને મળી રહ્યા હતા. આ દરમિયાન પાકિસ્તાનના તમામ ખેલાડીઓ મેકગ્રાના પરિવારના સભ્યો સાથે હાથ મિલાવતા જોવા મળ્યા હતા, પરંતુ જ્યારે મોહમ્મદ રિઝવાન ત્યાં પહોંચ્યો ત્યારે તેણે હાથ મિલાવ્યા ન હતા. આના પરથી તમને લાગશે કે રિઝવાને તેની અવગણના કરી, પરંતુ રિઝવાને ભારતીય સંસ્કૃતિને અપનાવી છે અને તેને બંને હાથ જોડીને પ્રણામ કર્યા હતા.
ઓસ્ટ્રેલિયા સામે રિઝવાનનો દબદબો
મેચ બાદ જ્યારે મોહમ્મદ રિઝવાનનો હાથ મિલાવવાનો વારો આવ્યો ત્યારે તેણે હાથ જોડીને પ્રણામ કર્યા હતા. હવે આ વીડિયો સોશિયલ મીડિયા પર વાયરલ થઈ રહ્યો છે. સોશિયલ મીડિયા પર ફેન્સના રિએક્શન પરથી લાગે છે કે રિઝવાને હજારો ફેન્સના દિલ જીતી લીધા છે. એવા ઘણા ચાહકો છે જેઓ કહી રહ્યા છે કે રિઝવાનને ભારતીય સંસ્કૃતિની લત લાગી ગઈ છે, તેથી જ તે હાથ મિલાવવાના બદલે પ્રણામ કરી રહ્યો છે. પાકિસ્તાન ભલે ઓસ્ટ્રેલિયા સામે એકતરફી સિરીઝ હારી ગયું હોય, પરંતુ રિઝવાને અદભૂત રમત બતાવી છે. રિઝવાન પ્રથમ મેચ રમ્યો ન હતો. રિઝવાન માત્ર બીજી અને ત્રીજી મેચ માટે પ્લેઈંગ-11માં હતો. રિઝવાને આ બે મેચમાં 193 રન બનાવ્યા છે.
