147 વર્ષ પહેલા... ઈન્ટરનેશનલ ક્રિકેટમાં બનેલી ઘટનાની આજે પણ થાય છે ચર્ચા

સદી ફટકારવી એ કોઈપણ બેટ્સમેન માટે ખાસ હોય છે. આંતરરાષ્ટ્રીય ક્રિકેટમાં સદી ફટકારવાની પ્રક્રિયા 147 વર્ષ પહેલા ઓસ્ટ્રેલિયાના એક બેટ્સમેને શરૂ કરી હતી. ક્રિકેટની રમત હવે વૈશ્વિક સ્તરે પહોંચી ગઈ છે, જ્યાં તેને પસંદ કરનારા લોકોની સંખ્યા સતત વધી રહી છે. આ રમતનો ઈતિહાસ ઘણો જૂનો છે. ઈંગ્લેન્ડ અને ઓસ્ટ્રેલિયા વચ્ચે શરૂ થયેલી આ રમત હવે ઘણા દેશોમાં રમાય છે.

ટેસ્ટ ક્રિકેટના ઈતિહાસમાં પ્રથમ મેચ ઓસ્ટ્રેલિયા અને ઈંગ્લેન્ડ વચ્ચે 1877માં મેલબોર્નમાં 15 થી 19 માર્ચ દરમિયાન રમાઈ હતી અને તેની સાથે જ આ સુંદર રમતની શરૂઆત થઈ હતી. ટેસ્ટ ક્રિકેટમાં પહેલી સદી ફટકારવાનો શ્રેય ઓસ્ટ્રેલિયાના ચાર્લ્સ બેનરમેનને જાય છે.

20 રન પાર કરનાર પ્રથમ ખેલાડી

તેને ઈંગ્લેન્ડ સામેની પહેલી જ ટેસ્ટમાં 165 રનની જોરદાર ઈનિંગ રમીને આ સિદ્ધિ મેળવી હતી. માત્ર સદી જ નહીં, ટેસ્ટમાં પહેલી અડધી સદી અને પ્રથમ 150 રન બનાવવાનો રેકોર્ડ પણ બેનરમેનના નામે છે. બેનરમેને ઈંગ્લેન્ડ સામેની પ્રથમ ટેસ્ટની પ્રથમ ઈનિંગમાં શાનદાર સદી ફટકારી હતી અને 20નો સ્કોર પાર કરનાર ઓસ્ટ્રેલિયન ટીમનો એકમાત્ર ખેલાડી હતો. 285 બોલનો સામનો કરતા તેને 165 રન બનાવ્યા હતા. ક્રિકેટ ઈતિહાસમાં તેની સદી દેખીતી રીતે ખૂબ જ ખાસ હતી કારણ કે તે પ્રથમ સદી હતી.

રિટાયર્ડ હર્ટ થનાર પ્રથમ ક્રિકેટર બેનરમેન

બેનરમેન 165 રને અણનમ રહ્યો અને રિટાયર્ડ હર્ટ થયો. આંતરરાષ્ટ્રીય ક્રિકેટ મેચમાં રમતી વખતે ઈજાગ્રસ્ત થનાર તે કદાચ પ્રથમ ક્રિકેટર હતો. બેનરમેનની 165 રનની ઈનિંગની મદદથી ઓસ્ટ્રેલિયાએ ઈંગ્લેન્ડ સામે પ્રથમ દાવમાં 245 રન બનાવ્યા હતા. ઓસ્ટ્રેલિયન ઈનિંગ્સમાં કુલ રનમાં બેનરમેનના રનનો હિસ્સો 67.3% હતો. બેનરમેને 165 રનની ઈનિંગમાં 18 ચોગ્ગા ફટકાર્યા હતા. આ રીતે તે એક ઈનિંગમાં 15 કે તેથી વધુ ચોગ્ગા મારનાર પ્રથમ બેટ્સમેન હતો.

આવી રહી મેચની સ્થિતિ

ઓસ્ટ્રેલિયાના 245 રનના જવાબમાં ઈંગ્લેન્ડની ટીમે પ્રથમ દાવમાં 196 રન બનાવ્યા હતા. ટીમ તરફથી ઓપનર હેરી જુપે સૌથી વધુ 63 રનની ઈનિંગ રમી હતી. બેનરમેન બીજા દાવમાં મોટો સ્કોર કરવામાં નિષ્ફળ રહ્યો હતો અને માત્ર ચાર રન બનાવીને આઉટ થયો હતો. અહીં ટીમ 104 રનમાં ઓલઆઉટ થઈ ગઈ હતી અને આ રીતે ઈંગ્લેન્ડને 153 રનનો ટાર્ગેટ મળ્યો હતો. પરંતુ ટીમ 108 રન જ બનાવી શકી અને 45 રનથી મેચ હારી ગઈ.