ભારતીય ક્રિકેટ કંટ્રોલ બોર્ડ (BCCI)ની એપેક્સ કાઉન્સિલની બેઠક 21 ડિસેમ્બરે યોજાવા જઈ રહી છે. વીડિયો કોન્ફરન્સિંગ દ્વારા યોજાનારી આ બેઠકના કાર્યસૂચિમાં 12 મુદ્દાઓ સૂચિબદ્ધ છે. આ દરમિયાન ટીમ ઈન્ડિયાના ખેલાડીઓના સેન્ટ્રલ કોન્ટ્રાક્ટ પર પણ ચર્ચા થશે. મીડિયા રિપોર્ટ્સ અનુસાર, ભારતીય ટીમની બહાર ચાલી રહેલા અજિંક્ય રહાણે, વિકેટકીપર રિદ્ધિમાન સાહા અને ઝડપી બોલર ઈશાંત શર્માને આગામી સિઝન (2022-23) માટે કેન્દ્રીય કરારમાંથી બહાર કરવામાં આવી શકે છે.
હાર્દિક-સૂર્યા-ગિલને મળશે પ્રમોશન
તેનાથી વિપરિત, હાર્દિક પંડ્યા, શુભમન ગિલ અને સૂર્યકુમાર યાદવ જેવા ખેલાડીઓને પ્રમોટ કરવામાં આવે તેવી શક્યતા છે. હાર્દિક પંડ્યા, જેને ભાવિ T20 કેપ્ટન તરીકે પ્રોજેક્ટ કરવામાં આવી રહ્યો છે અને T20 ક્રિકેટમાં કમાલ કરી રહેલા સૂર્યાને ગ્રેડ-Cમાંથી બઢતી આપવામાં આવશે અને ગ્રેડ-B સુધીમાં જગ્યા મળી શકે છે. BCCIના એક અધિકારીએ જણાવ્યું હતું કે, 'સૂર્યકુમાર ગ્રેડ-Cમાં છે પરંતુ છેલ્લા એક વર્ષમાં તેના પ્રદર્શનને કારણે તે ઓછામાં ઓછું ગ્રેડ-Bમાં સ્થાન મેળવી શકે છે. ગિલ હવે બે ફોર્મેટમાં નિયમિત રમે છે અને તેને ગ્રેડ-Cમાંથી ગ્રેડ-Bમાં બઢતી મળવાની આશા છે.
ઈશાન કિશનને સેન્ટ્રલ કોન્ટ્રાક્ટ મળી શકે છે
ઈશાન કિશન જેવા બેટ્સમેને પણ હાલના સમયમાં T20 અને વનડે ફોર્મેટમાં ઘણી મેચ રમી છે. તેને આ યાદીમાં સ્થાન મળવાની લગભગ ખાતરી છે. અગાઉની યાદીમાં હાર્દિક પંડ્યાને ગ્રેડ-Bમાં ઉતારવામાં આવ્યો હતો કારણ કે તે ઈજાને લઇ સિઝનમાં વધુ ક્રિકેટ રમી શક્યો ન હતો. હાર્દિકે આ વર્ષે બે T20 શ્રેણીમાં ભારતીય ટીમનું નેતૃત્વ કર્યું હતું અને તે T20 ટીમની નિયમિત કેપ્ટનશિપનો દાવેદાર છે. તે આવનારી યાદીમાં ગ્રેડ-Bમાં સ્થાન બનાવી શકે છે.
28 ભારતીય ખેલાડીઓ પાસે હાલમાં સેન્ટ્રલ કોન્ટ્રાક્ટ
ભારતીય ક્રિકેટ કંટ્રોલ બોર્ડ (BCCI) દર વર્ષે ખેલાડીઓની સેન્ટ્રલ કોન્ટ્રાક્ટ લિસ્ટ બહાર પાડે છે. આ દરમિયાન ખેલાડીઓને કુલ ચાર કેટેગરીમાં વિભાજિત કરવામાં આવ્યા છે, ગ્રેડ A+, ગ્રેડ A, ગ્રેડ B અને ગ્રેડ C. A+ના ખેલાડીઓને રૂ. 7 કરોડ, ગ્રેડ Aના ખેલાડીઓને રૂ. 5 કરોડ, ગ્રેડ Bના ખેલાડીઓને રૂ. 3 કરોડ અને ગ્રેડ Cના ખેલાડીઓને વાર્ષિક રૂ. 1 કરોડ મળે છે. આ તે રકમ છે જે ખેલાડીઓ માટે નક્કી કરવામાં આવે છે પછી ભલે તેઓ ગમે તેટલી મેચો રમે. બોર્ડે 2021-22 સિઝન માટે કુલ 28 ખેલાડીઓને સેન્ટ્રલ કોન્ટ્રાક્ટ આપ્યો હતો.
પ્રદર્શન અને રેન્કિંગના આધારે સિલેકશન
A+, અને A એ એવી શ્રેણીઓ છે જેમાં સામેલ ખેલાડીઓ ક્યા તો તમામ ફોર્મેટમાં નિયમિતપણે રમ્યા છે અથવા ટેસ્ટ સહિત મર્યાદિત ઓવરના ફોર્મેટમાંના એકમાં સ્થાન મેળવવાની પુષ્ટિ કરવામાં આવી છે. ગ્રેડ-Bમાં સ્થાન મેળવવા માટે, ક્રિકેટરે ઓછામાં ઓછા બે ફોર્મેટમાં રમવાનું હોય છે, જ્યારે ગ્રેડ-C મુખ્યત્વે એક ફોર્મેટમાં રમતા ખેલાડીઓ માટે હોય છે. જોકે, ખેલાડીઓનું પ્રમોશન પ્રદર્શન પર આધારિત છે અને ICC રેન્કિંગને પણ ધ્યાનમાં લેવામાં આવે છે.
2021-22 સિઝન માટે સેન્ટ્રલ કોન્ટ્રાક્ટ પ્લેયર્સની યાદી:
ગ્રેડ A+ (રૂ. 7 કરોડ):
વિરાટ કોહલી, રોહિત શર્મા, જસપ્રિત બુમરાહ.
ગ્રેડ A (રૂ. 5 કરોડ):
અજિંક્ય રહાણે, ચેતેશ્વર પૂજારા, હાર્દિક પંડ્યા, ઇશાંત શર્મા, કેએલ રાહુલ, મોહમ્મદ શમી, શિખર ધવન, રિષભ પંત, રવિન્દ્ર જાડેજા, રવિચંદ્રન અશ્વિન.
ગ્રેડ B (રૂ. 3 કરોડ):
ભુવનેશ્વર કુમાર, મયંક અગ્રવાલ, શાર્દુલ ઠાકુર, ઉમેશ યાદવ, રિદ્ધિમાન સાહા.
ગ્રેડ C (રૂ. 1 કરોડ):
અક્ષર પટેલ, દીપક ચહર, હનુમા વિહારી, કુલદીપ યાદવ, મોહમ્મદ સિરાજ, નવદીપ સૈની, શ્રેયસ અય્યર, શુભમન ગિલ, વોશિંગ્ટન સુંદર, યુઝવેન્દ્ર ચહલ.
