Team Indiaની એશિયા કપમાં પાકિસ્તાન સામે 8 વિકેટથી કારમી હાર, વૈભવ સૂર્યવંશીનું ધમાકેદાર પ્રદર્શન ગયું વ્યર્થ

પાકિસ્તાને ભારતને 8 વિકેટથી હરાવ્યું. એશિયા કપ રાઈઝિંગ સ્ટાર્સ 2025ની આ મેચમાં પાકિસ્તાની બેટ્સમેન માઝ સદકતે એકલા હાથે ભારતીય બોલરોને હેરાન કર્યા. સદકતે 79 રનની અણનમ ઈનિંગ રમી. પહેલા બેટિંગ કરતા ટીમ ઈન્ડિયા 136 રનમાં ઓલઆઉટ થઈ ગઈ અને પાકિસ્તાને 14મી ઓવરમાં આ ટાર્ગેટ હાંસલ કરી લીધો. આ જીત સાથે પાકિસ્તાન ગ્રુપ Bમાં પહેલા સ્થાને પહોંચી ગયું છે.

ટીમ ઈન્ડિયાની ધમાકેદાર શરુઆત

પ્રથમ બેટિંગ કરતા ટીમ ઈન્ડિયાએ વૈભવ સૂર્યવંશીને કારણે સારી શરૂઆત આપી હતી. તેને 28 બોલમાં 45 રન બનાવ્યા હતા, જ્યારે નમન ધીરે પણ 20 બોલમાં 35 રન બનાવીને પાકિસ્તાની બોલરોને હેરાન કર્યા હતા. પરંતુ અન્ય કોઈ બેટ્સમેન સારી ઈનિંગ રમી શક્યો ન હતો. કેપ્ટન જીતેશ શર્મા અને આશુતોષ શર્મા પણ નિષ્ફળ ગયા. પરિણામે ભારતીય ઈનિંગ ફક્ત 136 રન સુધી મર્યાદિત રહી.

એક પાકિસ્તાની આખી ભારતીય ટીમ માટે બન્યો વિલન

પાકિસ્તાની ઓપનર માઝ સદકતે આખી ભારતીય ટીમને દબાવી દીધી. તેને 47 બોલમાં 79 રન ફટકાર્યા, જેમાં તેને પોતાની અણનમ ઈનિંગમાં 7 ચોગ્ગા અને 4 જબરદસ્ત છગ્ગા ફટકાર્યા. અન્ય કોઈ પાકિસ્તાની બેટ્સમેન મોટો સ્કોર કરવામાં સફળ રહ્યો નહીં, પરંતુ સદકતે એક છેડો મજબૂતીથી પકડી રાખ્યો. ભારત તરફથી યશ ઠાકુર અને સુયશ શર્માએ 1-1 વિકેટ લીધી. મોહમ્મદ ફૈકે છગ્ગો ફટકારીને પાકિસ્તાનનો 8 વિકેટથી જીત પાક્કી કરી.

આ જીતથી પાકિસ્તાન ગ્રુપ B પોઈન્ટ ટેબલમાં ટોપ પર પહોંચી ગયું છે. પાકિસ્તાન તેની બંને મેચ જીતીને 4 પોઈન્ટ સાથે પ્રથમ સ્થાને છે, જ્યારે ભારત બે મેચમાંથી એક જીત સાથે બીજા સ્થાને છે. યુએઈ અને ઓમાન પણ એક જ ગ્રુપમાં છે.