રવિવારે રાત્રે 11:47 વાગ્યે અફઘાનિસ્તાનમાં ભયાનક ભૂકંપના આંચકા અનુભવાયા. રિક્ટર સ્કેલ પર આ ભૂકંપની તીવ્રતા 6 માપવામાં આવી હતી. આ ભૂકંપે અફઘાનિસ્તાનમાં વિનાશ સર્જયો છે.

આજે સોમવાર 1 સપ્ટેમ્બરના રોજ 4.6ની તીવ્રતાનો ભૂકંપ પણ આવ્યો હતો. અફઘાનિસ્તાનમાં થયેલા આ ભૂકંપમાં 800 થી વધુ લોકોએ જીવ ગુમાવ્યા છે, જ્યારે 2500 થી વધુ લોકો ઘાયલ થયા છે.

આ પરિસ્થિતિમાં અફઘાનિસ્તાન ક્રિકેટ બોર્ડે તેના દેશના લોકોને મદદનો હાથ લંબાવ્યો છે. દેશમાં આ વિનાશમાંથી લોકોને બચાવવા માટે અફઘાનિસ્તાન ટીમે તેની સંપૂર્ણ મેચ ફી દાનમાં આપવાની જાહેરાત કરી છે.

અફઘાનિસ્તાન ક્રિકેટ બોર્ડ સંપૂર્ણ મેચ પગાર આપશે

એશિયા કપ પહેલા અફઘાનિસ્તાન ક્રિકેટ ટીમ યુએઈમાં જ સંયુક્ત આરબ અમીરાત અને પાકિસ્તાન સાથે ટ્રાઈ T20 સિરીઝ રમી રહી છે. આ સિરીઝની ત્રીજી મેચ આજે 1 સપ્ટેમ્બરના રોજ રમાઈ રહી છે. આ મેચ પહેલા અફઘાન એટલાનના સોશિયલ મીડિયા હેન્ડલ પર એક પોસ્ટ શેર કરવામાં આવી હતી. આ પોસ્ટમાં એવી માહિતી આપવામાં આવી હતી કે અફઘાનિસ્તાનની ટીમ કુનારમાં આવેલા ભૂકંપથી પ્રભાવિત પરિવારોને મદદ કરવા માટે UAE સામેની આજની મેચનો સંપૂર્ણ પગાર દાન કરશે.

અફઘાનિસ્તાન ક્રિકેટ બોર્ડે એવી પણ જાહેરાત કરી છે કે પૂર્વી અફઘાનિસ્તાન શહેર ખોસ્તમાં યોજાઈ રહેલી પ્રાદેશિક લિસ્ટ A ટુર્નામેન્ટમાં રમી રહેલા ખેલાડીઓને આવતીકાલે 2 સપ્ટેમ્બરના રોજ તેમના તરફથી નાણાકીય સહાય પણ આપવામાં આવશે.

અફઘાનિસ્તાન-યુએઈ મેચમાં 2 મિનિટનું મૌન

અફઘાનિસ્તાનના કુનારમાં આવેલા ભૂકંપથી થયેલા વિનાશએ સમગ્ર દુનિયાને હચમચાવી નાખ્યું છે. T20 મેચ પહેલા અફઘાનિસ્તાન અને UAE ટીમોએ આ ભૂકંપમાં જીવ ગુમાવનારાઓની યાદમાં બે મિનિટનું મૌન પાળ્યું હતું અને ફાતિહા વાંચી.

Also Read