એશિયા કપ 2025ની ચોથી સુપર 4 મેચ આજે દુબઈમાં ભારત અને બાંગ્લાદેશ વચ્ચે રમાશે. ટીમ ઈન્ડિયા આ મેચ જીતીને ફાઈનલમાં પહોંચવાનું ટાર્ગેટ રાખશે. આ દરમિયાન હાર્દિક પંડ્યા બાંગ્લાદેશ સામે એક ખાસ સિદ્ધિ હાંસલ કરી શકે છે.
હાર્દિક પંડ્યા T20 ઈન્ટરનેશનલ મેચોમાં 100 વિકેટ લેવાથી ત્રણ વિકેટ દૂર
ટીમ ઈન્ડિયા આજે એશિયા કપ 2025ના સુપર ફોરમાં બાંગ્લાદેશ સામે ટકરાશે. આ મેચ ભારતીય સમય મુજબ રાત્રે 8 વાગ્યે દુબઈ ઈન્ટરનેશનલ સ્ટેડિયમમાં રમાશે. આ મેચમાં જીત મેળવવાથી ટીમ ઈન્ડિયા એશિયા કપ 2025 ના ફાઈનલમાં પહોંચશે. આજની મેચમાં ધ્યાન ટીમ ઈન્ડિયાના સ્ટાર ઓલરાઉન્ડર હાર્દિક પંડ્યા પર રહેશે. હાર્દિક પંડ્યા T20 ઈન્ટરનેશનલ ક્રિકેટમાં એક ખાસ સિદ્ધિ હાંસલ કરવાની નજીક પર છે.
હાર્દિક પંડ્યા હાંસલ કરશે આ ખાસ સિદ્ધિ!
બાંગ્લાદેશ સામે શાનદાર બોલિંગ પ્રદર્શન સાથે હાર્દિક પંડ્યા પાસે 100 T20 ઈન્ટરનેશનલ વિકેટો પૂર્ણ કરવાની તક છે. હાલમાં, હાર્દિકના નામે T20 ઈન્ટરનેશનલ મેચોમાં 97 વિકેટ છે અને તે આ ફોર્મેટમાં ભારત માટે બીજા નંબરે સૌથી વધુ વિકેટ લેનાર બોલર છે.
અર્શદીપ સિંહે અગાઉ આ સિદ્ધિ મેળવી હતી. ઓમાન સામે એક વિકેટ લઈને તે T20 ઈન્ટરનેશનલ મેચોમાં 100 વિકેટ લેનાર પહેલો ભારતીય બોલર બન્યો. અર્શદીપે સૌથી ઓછી મેચોમાં આ સિદ્ધિ મેળવી. હાર્દિક પંડ્યા આ સિદ્ધિ હાંસલ કરવાથી ત્રણ વિકેટ દૂર છે. જો તે બાંગ્લાદેશ સામે ત્રણ વિકેટ લે, તો તે 100 વિકેટ લેનાર બીજો ભારતીય બોલર બનશે.
T20I માં સૌથી વધુ વિકેટ લેનારા ભારતીય બોલરો
| ખેલાડીનું નામ | મેચોની સંખ્યા | વિકેટોની સંખ્યા |
| અર્શદીપ સિંહ | 63 | 100 |
| હાર્દિક પંડ્યા | 118 | 97 |
| યુઝવેન્દ્ર ચહલ | 80 | 96 |
| જસપ્રીત બુમરાહ | 73 | 92 |
ફાઈનલની નજીક છે ટીમ ઈન્ડિયા
એશિયા કપ 2025 ટીમ ઈન્ડિયા માટે એક સારી સીઝન રહી છે. ટીમ ઈન્ડિયાએ અત્યાર સુધીની બધી મેચ જીતી છે. સૂર્યકુમાર યાદવની આગેવાની હેઠળની ટીમ ઈન્ડિયાએ આ ટુર્નામેન્ટમાં પાકિસ્તાનને બે વાર હરાવ્યું છે. તેની પહેલી સુપર ફોર મેચમાં ટીમ ઈન્ડિયાએ પાકિસ્તાનને 6 વિકેટથી હરાવ્યું. હાર્દિક પંડ્યાએ 4 ઓવરમાં 29 રન આપીને 1 વિકેટ લીધી. અભિષેક શર્મા અને શુભમન ગિલે પણ બેટિંગમાં શાનદાર પ્રદર્શન કર્યું. ટીમ ઈન્ડિયા અને ફેન્સ બાંગ્લાદેશ સામે આ ખેલાડીઓ પાસેથી આવા જ પ્રદર્શનની અપેક્ષા રાખશે.
