ભારત સામેની મેચ હાર્યા બાદ પાકિસ્તાન ક્રિકેટ બોર્ડે એશિયા કપમાંથી મેચ રેફરી એન્ડી પાયક્રોફ્ટને દૂર કરવાની માગ કરી હતી. પરંતુ ICCએ તેમની માગણી ફગાવી દીધી હતી. આ દરમિયાન પાકિસ્તાને UAE સામેની મેચ પહેલા એક મોટો નિર્ણય લીધો છે. પાકિસ્તાને UAE સામેની ગ્રુપ A મેચ પહેલા તેની મેચ પહેલાની પ્રેસ કોન્ફરન્સ રદ્દ કરી દીધી છે.
પાકિસ્તાને પ્રેસ કોન્ફરન્સ કરી રદ્દ
પાકિસ્તાનના કેપ્ટન આજે રાત્રે UAE સામેની મેચ પહેલા મીડિયા સાથે વાત કરવાના હતા, પરંતુ આ પ્રેસ કોન્ફરન્સ કોઈ કારણ આપ્યા વિના રદ્દ કરવામાં આવી હતી. મીડિયા રિપોર્ટ્સ મુજબ પાકિસ્તાનની ટીમ આ મેચ પહેલા પ્રેક્ટિસ કરશે. સુપર-4માં પહોંચવા માટે ટીમને કોઈપણ કિંમતે UAE સામેની મેચ જીતવી પડશે. ટીમ ઈન્ડિયા આ ગ્રુપમાંથી સુપર-4 માટે ક્વોલિફાય થઈ ચૂકી છે.
ભારતીય ખેલાડીઓએ પાકિસ્તાની ખેલાડીઓ સાથે હાથ ન મિલાવ્યો
રવિવારે ભારત-પાકિસ્તાન મેચ દરમિયાન ટીમ ઈન્ડિયાના ખેલાડીઓએ પાકિસ્તાની ખેલાડીઓ સાથે હાથ મિલાવ્યા ન હતા. આ પછી પીસીબીએ આ સમગ્ર મામલાની ફરિયાદ આઈસીસીને કરી અને આ સમગ્ર મામલા માટે મેચ રેફરી એન્ડી પાયક્રોફ્ટને જવાબદાર ઠેરવ્યા. એન્ડી પાયક્રોફ્ટે પાકિસ્તાની કેપ્ટન સલમાન આગાને મેચ દરમિયાન ભારતીય ખેલાડીઓ સાથે હાથ ન મિલાવવા કહ્યું હતું. આ દરમિયાન મેચ રેફરી પર જાણી જોઈને ભારતીય ટીમને સપોર્ટ કરવાનો પણ આરોપ મૂકવામાં આવ્યો હતો. પરંતુ આઈસીસીએ તેની તપાસ બાદ પાકિસ્તાનની માગને ફગાવી દીધી છે.
પાકિસ્તાન માટે UAE સામેની મેચ જીતવી ખૂબ જ મહત્વપૂર્ણ
એશિયા કપ 2025ની વાત કરીએ તો ભારત, પાકિસ્તાન, યુએઈ અને ઓમાનને ગ્રુપ A માં રાખવામાં આવ્યા છે. ઓમાનની ટીમ સુપર-4 ની રેસમાંથી બહાર થઈ ગઈ છે કારણ કે તે બંને મેચ હારી ગઈ છે. ટીમ ઈન્ડિયા એકમાત્ર ટીમ છે જેને સુપર-4 માટે ક્વોલિફાય કર્યું છે. ટીમ ઈન્ડિયા અત્યાર સુધી બંને મેચ જીતવામાં સફળ રહી છે.
પાકિસ્તાન અને UAE એ એક-એક મેચ જીતી છે અને એક-એક મેચ હારી છે. આ પરિસ્થિતિમાં પાકિસ્તાન અને UAE વચ્ચેની મેચ બંને ટીમો માટે ખૂબ જ મહત્વપૂર્ણ છે. જો પાકિસ્તાન બુધવારની મેચમાંથી બહાર થઈ જાય છે, તો UAE ને બે પોઈન્ટ મળશે અને તેમના કુલ 4 પોઈન્ટ થશે. આ પરિસ્થિતિમાં પાકિસ્તાનની ટીમ એશિયા કપ 2025માંથી બહાર થઈ જશે.
