Team Indiaને એશિયા કપ 2025 શરૂ થાય તે પહેલા મળ્યા સારા સમાચાર, સ્ટાર ખેલાડી થયો ફિટ

એશિયા કપ 2025 શરૂ થાય તે પહેલા ટીમ ઈન્ડિયા માટે મોટા સમાચાર આવ્યા છે. ભારતીય ટીમનો કેપ્ટન સૂર્યકુમાર યાદવ યુએઈની ધરતી પર ધૂમ મચાવવા માટે સંપૂર્ણપણે ફિટ થઈ ગયો છે. સૂર્યકુમાર યાદવ લાંબા સમય પછી નેટ્સમાં સખત પ્રેક્ટિસ કરતો જોવા મળ્યો.

સૂર્યકુમારે પ્રેક્ટિસ દરમિયાન કેટલાક શક્તિશાળી શોટ માર્યા અને તે સારા ફોર્મમાં જોવા મળ્યો. ટીમ ઈન્ડિયા 4 સપ્ટેમ્બરે UAE જવા રવાના થશે. ભારતીય ટીમ 10 સપ્ટેમ્બરે તેની પહેલી મેચ UAE સામે રમશે.

ટીમ ઈન્ડિયા માટે સારા સમાચાર

ભારતીય ટીમના કેપ્ટન સૂર્યકુમાર યાદવ એશિયા કપ 2025માં ધૂમ મચાવવા માટે સંપૂર્ણપણે ફિટ છે. સૂર્યકુમાર યાદવે તેની ઈન્સ્ટાગ્રામ સ્ટોરીમાં એક વીડિયો શેર કર્યો છે, જેમાં તે બેટિંગની પ્રેક્ટિસ કરતો જોવા મળે છે. આ વીડિયોમાં ટીમ ઈન્ડિયાના T20 કેપ્ટન શક્તિશાળી શોટ મારતા જોવા મળે છે.

સૂર્યકુમાર યાદવ સંપૂર્ણપણે ફિટ જોવા મળે છે. સૂર્યકુમાર યાદવે જૂનમાં સ્પોર્ટ્સ હર્નિયા સર્જરી કરાવી હતી અને ત્યારથી તે પોતાની સંપૂર્ણ ફિટનેસ પરત મેળવવા માટે કામ કરી રહ્યો હતો. ભારતીય ટીમ એશિયા કપમાં તેના કેપ્ટન પાસેથી શાનદાર પ્રદર્શનની અપેક્ષા રાખશે.

ખરાબ ફોર્મમાંથી પસાર થઈ રહ્યો છે સૂર્યકુમાર યાદવ

કેપ્ટનશીપ સંભાળ્યા પછી સૂર્યકુમાર યાદવ ફોર્મમાં નથી. છેલ્લી 10 ઈનિંગમાં સૂર્યકુમારે ફક્ત એક જ વાર 50નો આંકડો પાર કર્યો છે. બે મેચમાં સૂર્યકુમાર યાદવ ખાતું ખોલાવ્યા વિના પેવેલિયન પરત ફર્યો છે. છેલ્લી પાંચ ઈનિંગમાં સૂર્યકુમારે ફક્ત 28 રન બનાવ્યા છે.

સૂર્યકુમાર યાદવ ચોક્કસપણે એશિયા કપમાં તેના ખરાબ ફોર્મમાંથી બહાર આવવા માગશે. સૂર્યકુમાર યાદવે UAE ની ધરતી પર 9 મેચ રમી છે અને આ સમય દરમિયાન તેને 158 ના સ્ટ્રાઈક રેટથી 181 રન બનાવ્યા છે. સૂર્યકુમાર UAE માં ફક્ત એક જ અડધી સદી ફટકારી શક્યો છે.