Pakistanની પ્લેઈંગ ઈલેવનમાં ભારતીય ટીમની એન્ટ્રી? સોશિયલ મીડિયામાં મીમ્સ થયા વાયરલ

બાંગ્લાદેશ અને પાકિસ્તાન વચ્ચેની પહેલી ટેસ્ટ મેચ દરમિયાન સોશિયલ મીડિયા પર એક દ્રશ્યે ધમાલ મચાવી દીધી. પાકિસ્તાનની પ્લેઈંગ ઈલેવન બતાવતી વખતે બ્રોડકાસ્ટર્સે એવી ભૂલ કરી કે ફેન્સ પોતાનું હાસ્ય રોકી શક્યા નહીં.

લાઈવ પ્રસારણ દરમિયાન પાકિસ્તાન ટીમના નામને બદલે, રોહિત શર્મા અને શુભમન ગિલ સહિત ભારતીય ખેલાડીઓના નામ સ્ક્રીન પર દેખાયા. આ ઘટનાનો એક વીડિયો હવે સોશિયલ મીડિયા પર વાયરલ થઈ રહ્યો છે, અને પાકિસ્તાન ટીમની વ્યાપક મજાક ઉડાવવામાં આવી રહી છે.

પાકિસ્તાનની જોરદાર મજાક ઉડાવવામાં આવી

આ રમુજી ઘટના ત્યારે બની જ્યારે બ્રોડકાસ્ટર્સ પાકિસ્તાનની પ્લેઈંગ ઈલેવનના આંકડા બતાવી રહ્યા હતા, પરંતુ ગ્રાફિક્સમાં ખેલાડીઓના નામ સંપૂર્ણપણે બદલાઈ ગયા હતા. પાકિસ્તાની ખેલાડીઓની જગ્યાએ, રોહિત શર્મા, શુભમન ગિલ, તિલક વર્મા, શિવમ દુબે, જીતેશ શર્મા, રિંકુ સિંહ, અક્ષર પટેલ, વોશિંગ્ટન સુંદર, રવિ બિશ્નોઈ, અર્શદીપ સિંહ અને મુકેશ કુમારના નામ સ્ક્રીન પર દેખાયા.

આ વિચિત્ર ભૂલથી સોશિયલ મીડિયા પર મીમ્સ અને જોક્સનો પૂર આવ્યો. ઘણા ફેન્સે દાવો કર્યો કે આ કદાચ દર્શકો અને ટીઆરપી વધારવા માટે કરવામાં આવ્યું હતું. એક ફેન્સે પૂછ્યું કે "શું આ ભૂલ હતી કે ભારતીય ફેન્સને ઉશ્કેરવાનું કાવતરું?" બીજા ફેન્સે લખ્યું કે ગ્રાફિક્સ ટીમ પણ જાણે છે કે વાસ્તવિક ટીઆરપી કોણ લાવે છે.

પહેલી ટેસ્ટ ઢાકામાં રમાઈ રહી છે

મેચની વાત કરીએ તો બંને ટીમો લગભગ 6 મહિના પછી ટેસ્ટ ક્રિકેટ રમી રહી છે. પાકિસ્તાનનો બાંગ્લાદેશ પ્રવાસ 8 મેના રોજ ઢાકામાં શરૂ થયો હતો. બંને ટીમો બે મેચની ટેસ્ટ સિરિઝ રમી રહી છે. ઘૂંટણની ઈજાને કારણે બહાર રહેલા બાબર આઝમની ગેરહાજરીથી પાકિસ્તાની ફેન્સને મોટો ઝટકો પડ્યો હતો. બીજી તરફ બાંગ્લાદેશે તેની ઝડપી બોલિંગ પર આધાર રાખ્યો હતો, જેમાં નાહિદ રાણા અને તસ્કિન અહેમદ મુખ્ય ભૂમિકાઓ ભજવી રહ્યા હતા.

પ્રથમ ટેસ્ટના બીજા દિવસે બાંગ્લાદેશે તેની પ્રથમ ઈનિંગમાં 117.1 ઓવરમાં 413 રન બનાવ્યા. કેપ્ટન નઝમુલ હુસૈન શાંતોએ 130 બોલમાં 101 રનની શાનદાર ઈનિંગ રમી, જેમાં 12 ચોગ્ગા અને બે છગ્ગાનો સમાવેશ થાય છે. મોમિનુલ હકે 91 રન બનાવ્યા, જ્યારે મુશફિકુર રહીમે 71 રનનું યોગદાન આપ્યું.

આ પણ વાંચો: BCCIએ શુભમન ગિલને નવા T20 કેપ્ટન તરીકે કર્યો નિયુક્ત, સૂર્યકુમાર યાદવ પાસેથી છીનવાઈ કેપ્ટનશીપ?