BCCIના નવા ચીફની આ તારીખે થશે પસંદગી, IPL ચેરમેનને લઈને સામે આવ્યું મોટું અપડેટ

ભારતીય ક્રિકેટ કંટ્રોલ બોર્ડના પ્રમુખ રોજર બિન્નીએ 70 વર્ષના થયા બાદ પોતાના પદ પરથી રાજીનામું આપી દીધું. રાજીનામા બાદથી BCCI નવા અધ્યક્ષ શોધી શક્યું નથી. IPL ચેરમેન અરુણ કુમાર ધુમલ તેમના કુલ 6 વર્ષનો કાર્યકાળ પૂર્ણ કર્યા પછી ફરજિયાત બ્રેક (કૂલ-ઓફ પીરિયડ) પર જાય તેવી શક્યતા છે.

આ પરિસ્થિતિમાં BCCIમાં બે મોટા પદ ખાલી છે. હવે 28 સપ્ટેમ્બરે યોજાનારી સામાન્ય વાર્ષિક બેઠકમાં IPLના નવા પ્રમુખ અને નવા અધ્યક્ષની પસંદગી થવાની છે.

રોજર બિન્નીએ ભારતીય ટીમ સાથે ODI વર્લ્ડકપનો ખિતાબ જીત્યો

રોજર બિન્ની 1983 ODI વર્લ્ડકપ જીતનારી ટીમના સભ્ય હતા, જ્યારે તેમને ટુર્નામેન્ટમાં શાનદાર બોલિંગ કરી હતી અને સૌથી વધુ 18 વિકેટ લીધી હતી. તેઓ કર્ણાટક રાજ્ય ક્રિકેટ એસોસિએશનના પ્રમુખ પણ રહી ચૂક્યા છે.

આ પછી તેઓ 2022માં BCCIના પ્રમુખ બન્યા. BCCIનું બંધારણ કોઈપણ અધિકારીને 70 વર્ષથી વધુ ઉંમર સુધી કોઈપણ પદ સંભાળવાની મંજૂરી આપતું નથી. આ કારણોસર તેમને 70 વર્ષના થયા પછી રાજીનામું આપી દીધું.

દેવજીત સૈકિયા તેમના પદ પર રહેશે

બીસીસીઆઈના તમામ મુખ્ય હોદ્દાઓ માટે ચૂંટણી યોજાવાની છે પરંતુ તે અસરકારક રીતે ફક્ત એક જ પદ માટે છે કારણ કે અધિકારીઓને અન્ય હોદ્દાઓ પર જાળવી રાખવામાં આવે તેવી શક્યતા છે. જય શાહે આઈસીસી પ્રમુખ તરીકે કાર્યભાર સંભાળ્યા બાદ આ વર્ષે જાન્યુઆરીમાં દેવજીત સૈકિયાને સર્વાનુમતે સચિવ તરીકે ચૂંટવામાં આવ્યા હતા. અન્ય અધિકારીઓ જે તેમના પદો જાળવી રાખે તેવી શક્યતા છે તેમાં રોહન ગૌંસ દેસાઈ અને પ્રભતેજ ભાટિયાનો સમાવેશ થાય છે. રોહન ગૌંસ દેસાઈને આ વર્ષે માર્ચમાં સંયુક્ત સચિવ તરીકે ચૂંટવામાં આવ્યા હતા અને પ્રભતેજ ભાટિયાને જાન્યુઆરીમાં દેવજીત સૈકિયા સાથે ખજાનચી તરીકે ચૂંટવામાં આવ્યા હતા.

AGM ના એજન્ડામાં સામાન્ય સભામાં પ્રતિનિધિની ચૂંટણી અને નિમણૂક તેમજ ભારતીય ક્રિકેટર્સ એસોસિએશનના બે પ્રતિનિધિઓનો કાઉન્સિલમાં સમાવેશ કરવાનો સમાવેશ થાય છે. BCCI લોકપાલ અધિકારીની નિમણૂક પણ AGM દરમિયાન કરવામાં આવશે, તેમજ ICC માં બોર્ડના પ્રતિનિધિની પણ નિમણૂક કરવામાં આવશે.